VOV4.Jarai - Mơguah lơ 30/11, tơring čar Daklak pơphun pok pơhai tlâ̆o vaccine pơgang Covid-19 brơi kơ čơđai sang hră gưl 3 hăng čơđai akă hrăm giong anih 12 hăng năng ai ñu 64.000 čô čơđai. Ơi Nguyễn Văn Lý, Kơ-iăng Khua Anom ia jrao plơi prong Buôn Ma Thuột brơi thâo: tal anai plơi prong amra tlâ̆o pơgang brơi năng ai 36.000 čô čơđai amăng hnưr thun 15-17 thun hăng amra tlâ̆o pơgang amăng 2 hrơi lơ 30/11 hăng lơ 1/12.

Đơ đam tơring čar Daklak ră anai hmâo 191.058 čô čơđai gưl 3, čơđai hrăm akă abih anih 12 hăng gưl 2. Tui hăng kơčăo bruă, tơdơi kơ ngă giong bruă tlâ̆o pơgang klin kơ čơđai gưl 3 čơđai hrăm akă abih anih 12, tơring čar Daklak amra pok pơhai dong tlâ̆o vaccine kơ čơđai gưl 2. Anom wai lăng tơlơi duam ruă tơring čar Daklak brơi thâo, kiăng prăp lui tŏng ten bruă tlâ̆o vaccine pơgang Covid-19 hăng čơđai sang hră, Gơnong bruă ia jrao hmâo pơpha mơnuih mă bruă djơ̆ hơdră pơhlôm rơnoh bruă hăng djơ̆ hăng tơlơi klin ruă ƀơi hơdôm anih anom./. 

Siu H’ Prăk: Pơblang