VOV4.Jarai -  Hăng rơbêh kơ 260 čô mơnuih ƀă klin Covid-19 hmâo čih pioh kơnong amăng ƀiă hrơi, tơring glông Krông Ƀuh jing anih anom hmâo mrô mơnuih ƀă Covid-19 lu hloh tơring čar Daklak. Hơdôm mơnuih anai biă ñu bơdjơ̆ nao mơng anih klin ngă ƀơi ƀôn Drao, să Čư̆ Nĕ. Bôh than ba truh phun lĕ yua kơ mơnuih ƀôn sang ƀu ngă tui tơpă tơlơi pơkă 5 mơta pơgang klin. Ră anai Krông Ƀuk glăk kơtưn đĭ pơčrang lăng, ruah mă abih hơdôm mơnuih ruă amăng plơi pla hăng lăng tui kơjăp hrom hăng gum djru mơnuih ƀôn sang hơđong ngă tui dô̆ čơlah mơnuih mơnam, djru tañ pơtrut kơdun klin ruă.

Pơwot glăi ƀôn Drao, să Čư̆ Nĕ, tơring glông Krông Ƀuk tal 2, ƀing gơmơi ƀuh rơđah tơlơi kơđiăng lom bưp mơnuih mơng anih pơkon nao, tơlơi bơngot kơ klin ruă lăng ƀơi ƀô̆ mơta mơnuih ƀôn sang ƀơi anih mă ia khak pơčrang lăng Covid-19. Jum dar anih mă ia khah, ia adung anai, lu sang dlông bah amăng sang krư̆ kret kruai, gah djeo sang lĕ glông phun trong phĭ tơsă tui ƀơ ƀrư̆ laih, pra dian bluh tơdŭ samơ̆ ƀu hmâo hlơi pĕ ôh. Yua kơ pô ñu leng kơ F0 sôh dưi ba nao pơjrao laih.

Ơi Y Krŭ Ayun, Kơ-iăng Khua git gai Ping gah, Khua Grŭp hyu mă bruă Jơnum min djop djuai ania mơnuih mơnam ƀôn Drao brơi thâo, 155 čô mơnuih F0, hăng rơbêh kơ 300 čô mơnuih F1, dưm dưm hăng 1/3 mrô mơnuih ƀôn sang mơng ƀôn khom nao pơjrao tơlơi ruă klin hăng dô̆ čơlah hơbit lĕ tơlơi mơ̆ ƀu hmâo hlơi kiăng ôh. Bôh than ba truh mơng tơlơi lar tưp klin ruă anai pơphun mơng bruă sa dua čô mơnuih ƀong mơñum  hơbit hăng ƀing gŏp, adơi ayong iao gah. Hơdôm hrơi rơgao, hơdôm khul grŭp amăng ƀôn gum hrom hăng khul ba jơlan hlâo, Grŭp Covid plơi pla ƀơi anăp nao rim sang pơsur mơnuih ƀôn sang ƀu tum pơƀut lu mơnuih, ngă tui tơpă 5 mơta pơgang klin. Hăng jơlan gah “Hơjan sui ia hram” abih bang neh wa amăng ƀôn thâo hluh hăng ngă tui tơpă laih.

“Ră anai tui phiăn juăt mơng pô, đơ đam plơi, đơ đam tơring glông wot să bơhmu hăng hlâo anai lĕ ƀu dưi dong tah. Hlâo adih pha ra, ră anai lĕ pha ra yua kơ glăk hmâo klin ngă tui anai. Hơdư̆ hĭ abih, tơdah hmâo tơlơi djai brŭ thơ lĕ hơdư̆ hĭ abih, ƀu kah hăng hlâo adih ôh. Mơng hrơi thâo hmâo tơlơi ruă klin anai, neh wa bơngot huĭ biă, neh wa ngă tui tơpă biă”.

Ơi Y Krŭ Ayun glăk lăi pơhing kơ mơnuih ƀôn sang ngă tui djơ̆ 5 mơta bruă pơgang klin Covid-19

Ơi Trần Thuận, Khua Anom ia jrao Krông Ƀuk brơi thâo, amăng 2 rơwang hrơi tơjuh rơgao khul ơi nai ia jrao hmâo gir run pơhư prong bruă hyu huĕt ĕp hăng pơčrang lăng plơi pla tal sa. Rơgao kơ anun, hmâo pơčrang lăng rơbêh kơ 6.000 čô mơnuih ƀôn sang hơdôm bôh ƀôn ƀơi să Čư̆ Nĕ hăng Čư̆ Kpô. Amăng rơwang glăk guang dar sa dua bôh plơi hăng đơ đam tơring glông glăk ngă tui Tơlơi črâo ba mrô 16 mơng Khua dêh čar, Gơnong bruă ia jrao gum hrom hăng hơdôm khul grŭp lăng tui hơdôm kual mơnuih ƀôn sang dô̆ “Kơjăp amăng lăm hăng kơjăp gah rơngiao”, hăng mă ia khak, ia adung ruah mă tal 2 ƀơi hơdôm anih anom phun hmâo klin ngă. Lom mă ia adung amra iâu anăn rim sang anô̆, khut khăt ƀu pioh val lui hlơi ôh kiăng ruah mă F0 tơbiă mơng plơi pla.

Ơi Trần Thuận brơi thâo, ră anai tơring glông Krông Ƀuk glăk pơdŏng jơlan gah test tañ Sars-CoV-2 kơ abih bang mơnuih ƀôn sang, amăng anun đing nao ngă tui tañ hăng năng ai ñu 4.000 čô mơnuih ƀôn sang ƀơi kual Pơngŏ tơring glông, anih dŏng ƀơi krah 2 bôh să hmâo klin ngă:

“Ră anai Pơngŏ tơring glông Krông Ƀuk glăk dô̆ đôm tŏng krah 2 kual klin ngă lĕ Ea Nam hăng să Čư̆ Nĕ hăng ră anai hmâo sa dua čô mơnuih ƀôn sang dô̆ đôm amăng kual anun akă hmâo mơnuih ƀă kơman. Năng ai ñu sa hrơi hơpă amăng tơlơi rô nao rai kơplah wah plơi pla anai, hăng să anai să pơkon thơ pô đing nao test tañ amăng plơi pla amra thâo amăng plơi pla amra klă hloh”.

Mơnuih mă bruă ia jrao mă ia adung pơčrang lăng tañ tal 2 kơ mơnuih ƀôn sang ƀôn Drao

Yap truh ră anai, tơring glông Krông Ƀuk hmâo čih pioh rơbêh kơ 260 čô mơnuih ƀă kơman klin Sars-CoV-2. Amăng anun, lăp đing nao lĕ 2 ƀut mơnuih ruă pơ̆ să Čư̆ Nĕ hăng xă Čư̆ Kpô. Kơnong kơ ƀơi să Čư̆ Nĕ hmâo truh kơ 202 čô mơnuih F0, lu ñu ƀơi ƀôn Drao hăng ƀôn Ktơng Drun. Tui hăng ơi Hoàng Kiên Cường, Khua Jơnum min mơnuih ƀôn sang tơring glông Krông Ƀuk, ƀơi anăp tơlơi ngă tơnap mơng klin Covid-19, tơring glông hmâo črâo ba hơdôm khul grŭp, gong gai gum hrom hăng bruă hruă kơjăp hơdôm bruă lăng tui, guang dar kual hơdôm anih klin ngă khom pơsur, thâo kơjăp tơlơi pơmin mơng mơnuih ƀôn sang hăng djru gơnam ƀong huă hmao tlôn kiăng neh wa hơđong ngă tui hơdôm bruă dô̆ čơlah khut khăt. Hrom hăng anun, tơring glông pơdŏng grŭp dô̆ gak djru neh wa sĭ gơnam tam mă mơng đang hmua kah hăng bôh ƀơr, sầu riêng amăng bơyan klin ngă. Tơring glông ăt brơi mơn sang anô̆ sĭ mơdrô pơkiăo nao mơnuih hyu pơhrui blơi gơnam mơng mơnuih ƀôn sang, hăng tơlơi kiăng lĕ khom hmâo hră pơčrang lăng ƀu ƀă kơman klin Sars-CoV-2.

Bơ̆ hơdôm jơlan gah kiăng pơtrut kơdun klin Covid-19, ơi Hoàng Kiên Cường brơi thâo:

“Tơring glông amra kơtưn hơdôm bruă lăi pơhing, dua lĕ kơtưn hyu pel ĕp, 3 lĕ pơkiăo nao mơnuih lăng tui hơdôm bôh plơi pla kiăng ngă hiưm hơpă gum hrom hăng khul grŭp mơng să hăng mơng abih bang glông bruă kơđi čar kiăng ngă klă bruă wai lăng kơjăp mơnuih ƀôn sang pioh pơhlôm hlơi dô̆ pơ̆ hơpă, dô̆ hơđong pơ̆ anun kiăng bruă pơgang pơgăn klin mơng tơring glông ba glăi bôh tơhnal kloh”.

Hrom hăng tơlơi gum hrom mơnuih ƀôn sang, hơdôm tơlơi gir run mơng gơnong bruă ia jrao hăng tơlơi gum hrom khop mơng gong gai plơi pla, čang rơmang tơring glông Krông Ƀuk amra tañ pơtrut kơdun klin Covid-19, ba glăi tơlơi hơdip mơda hơđong kơ mơnuih ƀôn sang./.

            Nam Trang: Pô čih – Siu H’ Prăk: Pô pơblang