VOV4.Jarai - Pơtô brơi pran hơdip hiam klă brơi ƀing čơđai mơng bruă brơi čơđai hrăm atông čing, pel ĕp hăng lăi glăi gru grua amăng mông ngă lơphet kơkuh kơ hla kơ amăng akŏ rơwang hrơi tơjuh. Anai lĕ bruă mơ̆ Sang hră gưl dua Y Ngông Niê Kđăm ƀơi tơring glông Čư̆ Mgar, tơring čar Daklak glăk pơphun ngă kiăng kơ pơtrut pran hor djă poih gru grua brơi ƀing čơđai sang hră.

Amăng mông tơbiă ngui ƀudah amăng hơdôm hrơi rơnuč hrơi tơjuh, ƀơi anăp sang hră gưl dua Y Ngông Niê Kđăm ƀơi tơring kual Ea Pôk, tơring glông Čư̆ Mgar, tơring čar Daklak hmư̆ dik dak jua čing krăm. Giăm 2 thun laih rơgao, jua čing krăm jing hmư̆ juăt laih. Amon H Doen Ni Adrơng, hrăm anih 7A1, ding kơna grup atông čing bơră ruai tom, yua kơ dưi hrăm atông čing yua anun amăng mông tơbiă ngui čơđai hok mơ-ak biă mă, ñu pô ăt dŏ lu tơlơi aka ƀu thâo kiăng kơ pơhrăm nao rai hăng gơyut gơyâo. Mơng anun jai pơ-ư pơ-ang gru grua djuai ania pô hăng tơlơi čang rơmang tơdơi anai amra jing mơnuih pơtô glăi gru rgua djuai ania Êđê.

Kâo hor mut hrŏm grup atông čing yua kơ anai lĕ gru grua mơng djuai ania Êđê kiăng kơ djă pioh hăng lăi pơthâo. Lơ̆m nao hrăm atông čing hăng ƀing gơyut gơyâo amăng sang hră kâo hok mơ-ak biă mă. Mơng thun hrăm anih 6 truh ră anai kâo dưi atông dua tơlơi adôh, hăng atông rơguăt ƀiă yơh. Kâo čang rơmang tơdơi anai amra jing nai pơtô brơi ƀing čơđai atông čing hơgor.

Ƀing čơđai amăng grup atông čing hrăm na nao kiăng thâo atông pơkhă lu tơlơi adôh

Akŏ pơjing mơng thun hrăm hlâo, grup atông čing krăm sang hră gưl dua Y Ngông Niê Kđăm hơmâo 12 čô čơđai wŏt đah rơkơi hăng đah kơmơi hrăm anih 6,7. Anai lĕ ƀing čơđai hor hăng thâo atông čing. Amăng mông tơbiă ngui, ƀing čơđai hơmâo arăng pơtô brơi atông sa, dua tơlơi adôh anun lĕ Gọi Mưa, Mơì Mưa, Mừng lúa mới ... Tơdơi kơ 3 blan gir kơtir hrăm atông, ƀing čơđai lêng kơ thâo atông hơdôm tơlơi adôh anai. Amon Võ Thanh Ngân, hrăm anih 7A1 brơi thâo, mut hrŏm grup atông čing ƀu djơ̆ kơnong yua kơ hor đôč ôh mơ̆ ăt kiăng pơlir mut hrŏm abih bang čơđai gir kơtir amăng hrăm hră:

Kâo lĕ djuai ania Yuăn samơ̆ ƀuh gru grua djuai ania Êđê hiam hăng yôm yua anun kâo mut hrŏm hăng grup atông čing. Amăng hrơi mông hrăm kâo hok mơ-ak lơ̆m hrăm atông čing hrŏm hăng gơyut gơyâo djuai ania Êđê. Ƀing gơmơi hrăm mơng thun hrăm anih 6, amăng rĭm hrơi năm lĕ ƀing gơmơi jak  gơyut gơyâo nao pơ sang gru grua plơi kiăng kơ hrăm atông čing, ăt hơmâo lu mơnuih nao pơ anai kiăng kơ pơđok hơdrôm hră.

Hrŏm hăng tŏ tui djă pioh grup atông čing, Sang hră gưl dua Y Ngông Niê Kđăm juăt pơphun lu tal pơplông bơdjơ̆ nao bruă djă pioh gru grua djuai ania pô. Kah amăng tal hơdor glăi hrơi pơpŭ nai pơtô Việt Nam (20/11) laih rơgao, sang hră hơmâo pơphun tal pơplông pơkra pơjing gơnam tam tui gru grua djuai ania Êđê brơi kơ ƀing nai kah hăng čơđai sang hră. Lơ̆m anun dưi pơkra rai 54 gơnam tam tui gru grua Êđê anun lĕ: abăn ao, akă hơrô, hrăo, đing ayup tơki kơbâo, get ia, gơnam pơkiăo đuăi ruai...

Sang gru grua - Sang pơđok hră pơdong tui gru grua sang dŏ djuai ania Êđê, anai lĕ anih pioh pơđok hơdrôm hră brơi ƀing čơđai

Amai Nguyễn Thị Thuý Ngọc, nai pơtô wai lăng ƀing čơđai brơi thâo, mơng tal pơplông, sang hră hơmâo hơmâo pơplih hơdră pơphun kơkuh hla kơ amăng akŏ rơwang hrơi tơjuh, pơlir hơbit kiăng kơ ƀing čơđai dưi pel ĕp hăng lăi pơthâo hơdôm gơnam yôm mơ ƀing gơña hơduah ĕp. Hăng tơlơi pơplih anai, ƀu djơ̆ kơnong nai pơtô đôč ôh mơ̆ čơđai sang hră ăt ngă tui mơn. Ƀing čơđai khin hơtai, lăi pơthâo hơdôm gơnam tam mơ̆ ƀing gơñu hơduah ĕp glăi hăng dua tơlơi Êđê - Yuăn. Hrŏm hăng anun, hơdôm bruă pơphun mơng sang hră hơmâo ƀing čơđai mut hrŏm soh.

Blung hlâo lĕ kơ bruă adôh suang ƀudah jơnum pơtum, pơphun ngui hơdor hrơi akŏ pơjing lĕ ƀing čơđai lêng kơ buh eng ao djuai ania Êđê soh, tơbiă pơ lan sang hră ayun suang hrŏm ƀing čơđao hok mơ-ak biă mă. Ră anai sang hră hơmâo dong sang dlông, grup atông čing ƀing čơđai pơ-ư pơ-ang biă mă, ƀing čơđai lêng kơ khin hơtai hăng tơña na nao kơ ƀing nai kiăng kơ pơphun pơplông brơi kơ ƀing gơñu mut hrŏm.

Thun hrăm anai, Sang hră gưl dua Y Ngông Niê Kđăm hơmâo 11 anih hrăm hăng 322 čô čơđai, amăng anun 95% lĕ čơđai djuai ania Êđê. Amăng lan sang hră man pơdong sang dlông tui gru grua djuai ania Êđê - Sang pioh pơđok hră ăt man pơkra tui anun mơn, hơmâo pơgiong amăng blan 8 thun hlâo. Amăng anun pơdă pơrưng lu rup rap mơng bruă mă amăng sang hră amăng djop thun, hơdôm gơnam djă pioh gru grua mơng djuai ania Êđê hăng dưm dăp djop mơta. anai lĕ anih djă pioh gơnam hơmâo lu čơđai hor, anih ƀing gơñu amra pơđok hơdôm hơdrôm hră ƀing gơñu hor ƀudah hrăm atông čing laih dong pel ĕp gru grua djuai ania Êđê.

Pơ anăp anai sang hră amra pơtrun hơdră bruă kiăng tŏ tui djă pioh bruă mă anai. biă mă ñu lĕ bruă pơtô hrăm tơlơi thâo rơguăt amăng tơlơi  hơdip pơlir hơbit hăng gru grua djuai ania pô, anun lĕ djă pioh na nao grup atông čing hăng pơđĭ kyar dong hơdôm bruă mă pơkŏn anun lĕ pơplông, pel ĕp, lăi pơthâo hơdôm gơnam yôm tui gru grua djuai ania Êđê laih dong pơhư prong hơdôm hơbô̆ bruă anai. Kiăng kơ tŏ ngă tui na nao, hơmâo ƀing čơđai hrăm giong ăt hơmâo čơđai mut rai hrăm, ƀing mơnuih phrâo amra tŏ tui hrăm tơlơi jơlan hơdră pơtô hrăm phrâo anai.

Pơtô brơi tơlơi thâo rơguăt amăng tơlơi hơdip pơlir hăng djă pioh gru grua lĕ bruă mă lăp djơ̆ mơng sang hră gưl dua Y Ngông Niê Kđăm. Hơdôm bruă mă anai ƀu djơ̆ kơnong djă pioh anih kiăng kơ ƀing čơđai dưi ngui ngor, pel ĕp tơdơi kơ mông hrăm hră đôč ôh mơ̆ ăt pơgôp pơtô pơblang brơi pran hor djă pioh gru grua djuai ania pô brơi kơ ƀing čơđai.

Siu Đoan: Pơblang