VOV4.Jarai - Hrŏm hăng lu ƀôn lan amăng đơ đam dêh čar ta, tơring čar Daklak glăk gir run pơtrut tañ bruă tlâ̆o vaccine pơgang klin Covid-19 lơ̆m klin glăk dŏ ngă tơnap tap amăng tơring čar. Sit biă ñu, bruă tlâ̆o vaccine glăk hơmâo pơtrut ƀơi hơdôm plơi pla mơnuih djuai ania ƀiă, anai hơdôm anih bruă pơgang klin ăt dŏ lu tơlơi tơnap tap hăng ƀuh lu anih ngă lar hyu klin amăng plơi pla.

Phrâo tlâ̆o giong ară tal 2 vaccine pơgang klin Covid-19, ayong Y Dhuen Ƀuôn Krông, djuai ania Êđê, dŏ ƀơi ƀuôn Ea M’dhar, să Ea Ñuôl, tơring glông Ƀuôn Đôn, tơring čar Daklak hok mơ-ak brơi thâo, anai lĕ tal 4 arăng pơphun tlâ̆o vaccine brơi kơ ană plơi pla. Truh ră anai, abih bang mơnuih pơprong amăng plơi pla lêng kơ tlâ̆o vaccine soh, mơng anai amra plai ƀiă hŭi klin kheng, mơnuih ƀon sang amra hơđong pran jua bơwih ƀong huă, ngă đang hmua:

“Tơdơi kơ tlâ̆o vaccine giong, mơng hrơi tom brơi truh ră anai, kâo ƀuh amăng drơi jăn ăt găng añrăng mơn, huăi duam ôh, yua anun kâo hơđong amăng pran jua, huăi hŭi dong tah. Kâo bơni kơ Ping gah, Kơnuk kơna hơmâo đing nao, ngă gêh gal kiăng abih bang ană plơi pla lêng kơ dưi tlâ̆o vaccine soh, kâo ăt jak iâu ană plơi pla nao tlâ̆o vaccine, tlâ̆o ia jrao kiăng pơgang drơi jăn ta pô, ia jrao anai huăi ngă sat kơ drơi jăn ôh”.

Yă H’Pôly Êban, Kơ-iăng Khua ƀuôn Kŏ Đung B, să Ea Ñuôl, tơring glông Ƀuôn Đôn brơi thâo, tơdơi kơ 4 wŏt gong gai hăng gơnong bruă ia jrao pơphun tlâ̆o vaccine pơgang klin Covid-19 amăng plơi pla hơmâo laih 700 čô mơnuih mơng18 thun pơ glông amăng plơi arăng tlâ̆o brơi vaccine. Tui hăng yă H’Pôly, blung hlâo mơnuih ƀon sang dŏ sư̆ rơbư̆, hŭi nao tlâ̆o vaccine, hơmâo gong gai, gơnong bruă ia jrao pơtrut pơsur, pơblang brơi rơđah, mơng anun neh met wa thâo tơlơi dưi lơ̆m tlâ̆o vaccine. Laih anun, jai hrơi jai lu mơnuih nao tlâ̆o vaccine:

“Neh met wa amăng djop plơi pla hok mơ-ak lơ̆m arăng iâu nao tlâ̆o vaccine, hlơi hlơi lêng kơ hur har pran jua, djơ̆ hăng hrơi mông pơkă neh met wa nao tlâ̆o mơtăm, sit biă ñu ƀing mơnuih mơng 18 thun pơ glông. Ră anai amăng plơi anai hơmâo tlâ̆o ia jrao giăm djop laih, him lăng dŏ kơnong 15% aka ƀu tlâ̆o yua kơ neh met wa glăk mơñum jrao hăng hơmâo tơlơi ruă kă amăng drơi jăn”.

Git gai sa hrơi pơphun tlâ̆o vaccine pơgang klin Covid-19 amăng plơi pla, yă Phùng Thị Tý, Kơ-iăng khua anom bruă ia jrao să Ea Ñuôl, tơring glông Ƀuôn Đôn brơi thâo, hlâo anun anom bruă hơmâo gum hrŏm kjăp hăng gong gai să hăng grup wai lăng amăng plơi pla čih anăn ƀing mơnuih dưi nao tlâ̆o ia jrao, laih anun lăi pơthâo brơi abih bang ană plơi pla thâo rơđah hrơi mông nao tlâ̆o. Anai lĕ glăk bơyan pĕ pơhrui kơphê yua anun bruă tlâ̆o vaccine kiăng pơphun brơi kơ tañ, kiăng kơ huăi ngă rơngiă hrơi mông kơ mơnuih ƀon sang, juăt rĭm boh plơi pla gir run pơphun tlâ̆o giong amăng sa hrơi đôč.

“Sit biă ñu amăng bơyan pĕ pơhrui anai, mơnuih ƀon sang hăt he biă mă, tlâ̆o ia jrao tañ glăi pĕ pơhrui kơphê. Bruă pơphun tlâ̆o ia jrao ƀing gơmơi gir run pơčlah mơnuih tui hluai mông phara. Pơhmutu mơguah ƀing gơmơi amra tlâ̆o truh pơ 12 mông, yang hrơi tlam amra tlâ̆o truh pơ 6 mông”.

Ơi Trịnh Quang Tấn, Khua Jơnum min mơnuih ƀon sang să Ea Ñuôl, tơring glông Ƀuôn Đôn brơi thâo, să hơmâo rơbêh kơ 13.000 čô mơnuih, hăng giăm 3.900 čô mơng 18 thun pơ glông, mrô mơnuih djuai anai ƀiă giăm 50%. Gong gai să hok mơ-ak biă mă lơ̆m giăm anai ia jrao vaccine pơgang klin Covid-19 arăng kah pha lu, ngă kơ bruă tlâ̆o vaccine tañ ƀiă. Ră anai glăk pơphun tlâ̆o tal 4 hăng tal tơdơi dong, giăm 100% čô mơnuih 18 thun pơ glông amăng să lêng kơ tlâ̆o vaccine soh. Tui hăng ơi Tấn, kiăng kơ bruă tlâ̆o ia jrao amăng plơi pla pơphun rơnuk rơnua, klă hloh hăng pơhlôm pơgang klin, să hơmâo jao bruă kơ lu mơnuih kiăng hyu pơtô pơblang, pơtrut pơsur neh met wa nao tlâ̆o ia jrao djơ̆ hrơi mông pơkă, dŏ ataih tơdruă, ngă tui tơlơi pơkă 5K:

“Khul git gai amăng să, Khul git gai amăng tơring glông đing nao biă mă, git gai tơl anih, laih dong grup wai pơgang amăng plơi pla, hyu pơtô pơblang hăng tơlơi Yuăn rah, tơlơi Êđê rah, ƀing gơmơi ăt ba hyu hră pơ-ar tơl rĭm boh sang anŏ kiăng kơđiăng amăng bruă pơgang klin”.

Siu Đoan: Pơblang