VOV4.Jarai - Prăp lui kơ bruă tlâ̆o vaccine pơgang Covid-19, mơguah lơ 22/4, Gơnong bruă ia jrao tơring čar Daklak hmâo pơphun pơhrăm hăng pơhlôm lom tlâ̆o vaccine pơgang brơi kơ 90 čô mơnuih mă bruă gah ia jrao ƀơi hơdôm anom ia jrao tơring glông, plơi prong amăng tơring čar.

Ƀơi anih pơhrăm, mơnuih nao hrăm dưi hrăm pơdŏng kơčăo bruă, pơphun bruă tlâ̆o vaccine pơgang Covid-19; tơlơi pơhing lăi nao kơ vaccine pơgang Covid-19; pơtô brơi mă yua vaccine pơgang klin, ruah mă hlâo kơ tlâ̆o pơgang; pơtô brơi bruă pơgang lom vaccine ngă kơañak drơi jăn, pơhlôm tlâ̆o pơgang hăng lăng tui anô̆ ba glăi tơdơi kơ tlâ̆o jrao pơgang; glông hơdră hơdôm gru, hră tlâ̆o pơgang. Ră anai, Daklak tŭ mă 15.700 liều vaccine pơgang Covid-19 hăng amra pok pơhai tlâ̆o brơi 3 djuai mơnuih dô̆ mă bruă ƀơi hơdôm anih anom ia jrao, mơnuih gum hrom pơgang pơgăn klin hăng Pơgang guai lŏn ia, Kông ang, Anom wai lăng bruă rô nao rai hăng tač rơngiao, Ƀirô git gai bruă ling tơhan tơring čar mơng lơ 27/4 truh lơ 7/5./.

Siu H’ Prăk: Pô pơblang