VOV4.Jarai -  Lơ 12/10 ƀơi să Dur Kmăl, tơring glông Krông Ana, tơring čar Daklak hmâo čih pioh sa ƀut mơnuih ƀă kơman Covid-19 amăng plơi pla akă rơđah ƀă mơng hơpă. Hlâo kơ anun, lơ 11/10 yă N.T.A nao pơ̆ Sang ia jrao să Dur Kmăl pel ĕp tơlơi ruă hăng dưi pơčrang lăng tañ kơman Covid-19, bôh tơhnal brơi ƀuh ƀă kơman Sars-CoV-2.

Tơdơi kơ hmâo bôh tơhnal test tañ mơtăm yă N.T.A, Sang ia jrao tơring glông Krông Ana hmâo huĕt ĕp mơnuih bơdjơ̆ nao hăng mă ia adung pơčrang lăng hơdôm mơnuih bơdjơ̆ nao hăng čih hmâo dong 14 čô mơnuih hmâo bôh tơhnal pơčrang lăng ƀă kơman Sars-CoV-2. Yang hrơi dŏng lơ 12/10, 15 čơđeh ia adung test tañ Realtime RT-PCR ƀuh ƀă kơman Sars-CoV-2. Gơnong bruă ia jrao tơring glông Krông Ana hmâo pơphun test tañ brơi năng ai ñu 1.000 čô mơnuih ƀôn sang ƀôn Dur 1, să Dur Kmăl, gong gai ăt hmâo guang dar mơn mơnuih ƀôn sang ƀơi grŭp mrô 3, ƀôn Dur 1, să Dur Kmăl hăng pơdŏng 4 anih dô̆ gak kiăng wai lăng mơnuih ƀôn sang hăng rơdêh mut tơbiă kual klin ngă./.

Siu H’ Prăk: Pô pơblang