VOV4.Jarai - Gơnong bruă ia jrao tơring čar Daknông brơi thâo, 13 čô mơnuih F1 ƀơi Daknông đi hrom amăng rơdêh por QH1403, hăng mơnuih bơdjơ̆ nao Covid-19 tal 3 mơng Daklak, mơng tơdron rơdêh por Nội Bài trun ƀơi tơdron rơdêh por Buôn Ma Thuột, dưi hmâo ƀirô apăn bruă ba nao čơlah đuăi ƀơi anih pơƀut hơbit hăng hmâo bôh tơhnal pơčrang lăng ƀu ƀuh kơman klin Covid-19 tal sa. Amăng anun, hmâo sa čô mơnuih F1 hlâo kơ anun hmâo nao laih pơ̆ ƀôn prong Hồ Chí Minh ăt dưi hmâo ƀirô ia jrao ƀôn prong čơlah đuăi mơn, pioh lăng tui. Lom hmư̆ hing kơ pô bơdjơ̆ nao Covid-19 tal 3 mơng Daklak lĕ ơi V.Đ.D mơng tơdron rơdêh por Nội Bài glăi pơ̆ tơdron rơdêh por Buôn Ma Thuột, hơdôm bôh ƀirô apăn bruă ƀơi Daknông hmâo hyu huĕt ĕp tañ ƀing mơnuih đĭ hrom rơdêh por hmâo 14 čô mơnuih hăng tañ ba nao abih bang mrô F1 anai pơ̆ anih čơlah đuăi hơbit. Ră anai khul apăn bruă Daknông glăk hyu huĕt ĕp, čih anăn hơdôm mơnuih F2, F3 kiăng dô̆ čơlah djop 21 hrơi tui tơlơi pơkă./.

Siu H’ Prăk: Pô pơblang