VOV4.Jarai - Mơguah lơ 11/7, tơring čar Daknông čih hmâo dong mơnuih ƀă kơman Covid-19 tal 2, anun lĕ mơnuih mă bruă mơng ƀôn prong Hồ Chí Minh. Pô ruă 28474 lĕ amai T.T.M.H 22 thun, dô̆ ƀơi să Dak Sôr, tơring glông Krông Nô, tơring čar Daknông, mơnuih mă bruă ƀơi Sang bruă wai lăng tuai čuă ngui ƀơi ƀôn prong Hồ Chí Minh. Tơdơi hmâo bôh tơhnal pơčrang lăng ƀă kơman klin mơtăm dưi ba nao dô̆ čơlah hăng pơjrao ƀơi kual dô̆ čơlah pơjrao mơnuih ƀă kơman Covid-19 mơng tơring glông Krông Nô. Ră anai mưn ƀuh rơgah gañ, huin akô̆, tơnap suă jua, ƀu pơ-iă drơi jăn. Yak blung a hmâo čih pioh 12 čô mơnuih giăm hăng F1; 4 čô F2; ră anai ăt glăk pơhư prong mơn bruă hyu hơduah ĕp mơnuih bơdjơ̆ nao. Ră anai Gơnong bruă ia jrao tơring čar Daknông hmâo pơphun pruih jrao pơdjai kơman ƀơi hơdôm anih pô ruă hmâo nao, guang dar sang mrô 75, plơi Quảng Đà, să Dak Sôr, tơring glông Krông Nô, tơring čar Daknông bơdjơ̆ nao pô ruă./.

Siu H’ Prăk: Pô pơblang