VOV4.Jarai - Amăng hơdôm thun rơgao, hrom hăng tuh pơ plai anih anom mă yua, pơđĭ kyar bơwih ƀong huă, pơđĭ tui tơlơi hơdĭp mơda mơnuih ƀôn sang, jơlan hơdră plơi pla phrâo ƀơi tơring čar Daknông dô̆ đing nao yôm bruă pơphun bơwih ƀong huă hluai tui pơđĭ kyar hơdră anom mă bruă hrom. Anai ăt lĕ tơhnal pơkă khom ngă hăng rim să hlâo kơ dưi tŭ yap să djơ̆ hăng plơi pla phrâo.

Amăng hơdôm tơhnal pơkă plơi pla phrâo, tơhnal pơkă mrô 13 kơ pơphun bruă bơwih ƀong hmâo bruă mă yôm phăn, pơtrut pơđĭ kyar bơwih ƀong ƀơi kual plơi pla. Kiăng dưi ngă tui djơ̆ tơhnal pơkă mrô 13, hơdôm bôh anom mă bruă hrom hmâo gơgrong hlâo ngă tui bruă mă, jai hrơi jai pơsit bruă mă amăng pơdŏng plơi pla phrâo ƀơi tơring čar.

Tui hăng tơlơi pơkă, să dưi tŭ yap djơ̆ hăng plơi pla phrâo khom hmâo ƀiă biă mă ñu mơng 1 hơdră pơphun bơwih ƀong huă hmâo hơdră grŭp gum hrom Anom mă bruă hrom. Hăng 7 bôh să ră anai glăk dưi hmâo tơring čar pel ĕp tŭ yap djơ̆ hăng plơi pla phrâo lĕ hmâo abih bang 11 bôh anom mă bruă hrom glăk ngă tui ba glăi bôh tơhnal djru pơtrut pơđĭ kyar bơwih ƀong huă, sĭ mơdrô, pơđĭ tui tơlơi hơdĭp mơda mơng mơnuih ƀôn sang.

Să Čư̆ Knia, tơring glông Čư̆ Jut, tơring čar Daknông hmâo Anom mă bruă hrom sĭ mơdrô gơnam mă yua gah đang hmua kơ mơnuih ngă đang hmua hăng Anom mă bruă hrom gah đang hmua Tiến Thành. Tui hăng ơi Bùi Xuân Nghĩa, Khua Anom mă bruă hrom Tiến Thành, anom glăk pla pơkra tiu hăng kơ phê tui tơhnal pơkă Organic hăng glăk lông pơkra lăng tơpung kơ phê. Anom mă bruă hrom dô̆ pơlir hơbit hăng sa bôh Anom mă bruă hrom pơkon pơdjuai, blơi djuai pơjeh pơdai ST 24 kơ mơnuih ƀôn sang. Lom pơdjuai pơjeh, Anom mă bruă pơphun pơhrăm brơi, pơtô glăi hơdră phrâo kơ mơnuih ngă đang hmua kiăng pơđĭ tui bruă ngă đang hmua, ba glăi gơnam klă hiam.

Anom mă bruă hrom gah đang hmua – Sĭ mơdrô – Ngă tui hơdră hơdjă Hoàng Nguyên

Să Thuận Hà, tơring glông Dak Song, tơring čar Daknông hmâo Anom mă bruă hrom gah đang hmua – Sĭ mơdrô – Ngă tui hơdră hơdjă Hoàng Nguyên hăng Anom mă bruă hrom gah đang hmua Thuận Phát. Yă Trần Thị Thu, Khua Anom mă bruă hrom Hoàng Nguyên brơi thâo, hơdôm hrơi rơgao, anom hmâo pơsit jơlan gah hăng tum pơƀut mơnuih ngă đang hmua pla tiu tui hơdră hơdjă, hăng lŏn prong rơbêh kơ 100 ektar. Gơnang kơ anun, hơdôm mơnuih amăng anom mă bruă hrom hmâo prăk pơhrui glăi lu, khă nua tiu ƀơi anih sĭ mơdrô hrŏ trun lu. Thun 2020, Anom mă bruă hrom sĭ 400 tơn tiu hơdjă kơ dêh čar tač rơngiao hmâo nua lu hloh dua wot bơhmu hăng ƀơi anih anom sĭ mơdrô, anun mơnuih ngă đang hmua mơ-ak pran jua. Bruă pla pơkra tiu hơdjă ƀơi anai jai hrơi jai hmâo hơdră prong, akô̆ tlôn hăng hơđong hloh.

Ƀơi lu anih anom amăng tơring čar Daknông hơdôm bôh anom mă bruă hrom hmâo hăng glăk ngă tui bruă pơphun pla, pơkra, pơđĭ tui prăk pơhrui glăi mơng mơnuih ƀôn sang. Să Dak Sôr, tơring glông Krông Nô hmâo Anom mă bruă hrom gah đang hmua – Sĭ mơdrô – Ngă tui hơdră pơkra tiu hơdjă Dak Sôr hăng 30 čô mơnuih hăng anom mă bruă hrom gah đang hmua mơtah Thành Phát abih bang 12 čô mơnuih. Hơdôm bôh anom mă bruă hrom hmâo pơtô glăi laih bôh thâo phrâo kơ mơnuih ngă đang hmua kiăng đĭ tui gơnam ngă rai, sĭ mơdrô, hrom hăng anun pơlir hơbit hăng hơdôm anom bơwih ƀong pioh sĭ gơnam tam ngă rai.

Hăng Anom mă bruă hrom gah sĭ mơdrô hăng bơwih hră pơ-ar Bình Minh pơ̆ să Ea Pô, tơring glông Čư̆ Jut hmâo pơlir laih hăng mơnuih ngă đang hmua pla kơ phê hăng tiu tui tơhnal pơkă 4C, VietGAP. Anom ăt pơlir mơn hăng hơdôm sang bruă pioh blơi gơnam mơng neh wa ngă đang hmua...

Tui hăng anun, hăng lu hơdră gum djru, Anom mă bruă hrom gah đang hmua – Sĭ mơdrô – bơwih hră pơ-ar – Brơi čan prăk Đại Đồng Tiến hăng Anom mă bruă hrom Tân Thịnh, să Quảng Khê, tơring glông Dak Glong hmâo ngă pơhư̆č laih 47 cô ding kơna gum hrom pơlir hơbit pơkra kơ phê tui tơhnal pơkă UTZ. Lom pơlir hơbit, Anom mă bruă pel ĕp, lăng tui glông jơlan ngă rai gơnam mơng mơnuih ƀôn sang hăng sĭ mơdrô kơmok pruai, ngăn rơnoh, hơdră bôh thâo... kiăng hmâo gơnam klă hiam tui tơhnal pơkă UTZ.

Ơi Bùi Hoa Thám, Kơ-iăng Khua Khul pơlir hơbit Anom mă bruă hrom tơring čar Daknông, hơdôm hrơi rơgao, gong gai hơdôm gưl ngă gal brơi na nao kiăng Anom mă bruă hrom ngă rai, sĭ mơdrô gơnam tam. Hơdôm anih anom hmâo lu anom mă bruă hrom jai hrơi jai mă bruă ba glăi bôh tơhnal klă. Biă ñu, hơdôm bôh anom mă bruă hrom hmâo ngă tui klă laih bruă mă mơng pô amăng pơdŏng plơi pla phrâo ƀơi anai, djru mơnuih ngă đang hmua pơphun ngă đang hmua klă hloh. Amăng anun, hơdôm bôh anom mă bruă hrom hmâo bruă mă klă djru mơnuih ƀôn sang pơplih phun pla, hlô rông hăng mă yua bôh thâo phrâo amăng bruă ngă đang hmua kiăng pơđĭ tui bôh than ngă rai gơnam klă hiam.

Hơdôm bôh anom mă bruă hrom jai hrơi jai đing nao pơlir hơbit ngă rai hăng sĭ gơnam tam, pơkra rai gơnam tui nua yôm ñu. Mơng anun, bruă đang hmua jai hrơi jai hmâo nua yôm kơ bruă bơwih ƀong, djru pơđĭ tui prăk pơhrui glăi kơ mơnuih ngă đang hmua./.

Siu H’ Prăk: Pô pơblang