VOV4.Jarai - Sa amăng hơdôm bruă pơgang pơgăn Covid-19 ba glăi bôh tơhnal dưi hmâo hơdôm bôh ƀirô juăt bruă pơtă lĕ 5 mơta bruă pơgang hăng vaccine. Phrâo tom adih anai, Khua dêh čar ta hmâo ba tơbiă tơlơi črâo ba pơtrut tañ rơnoh bruă tlâ̆o vaccine pơgang Covid-19. Amăng rơwang hrơi tơjuh rơgao, Jơnum min apăn bruă Khua pơ ala mơnuih ƀôn sang dêh čar ta pơsit mă yua 12.100 klai prăk pơkrem mă yua amăng thun  2020 kiăng blơi vaccine pơgang pơgăn Covid-19. Ƀơi Dăp Kơdư, truh ră anai hơdôm bôh anih anom phun ñu ngă giong laih bruă tlâ̆o vaccine pơgang Covid-19 tal 1, kơnong kơ tơring čar Gialai hmâo ngă giong laih tal 2.

Tui hăng tơlơi lăi pơthâo glăi mơng Gơnong bruă ia jrao tơring čar Kontum, truh ră anai ngă giong laih bruă tlâ̆o vaccine tal sa pơgang pơgăn Covid-19, hrom hăng anun pok pơhai dong, ngă tui hơdôm bruă ječ pơgang pơhlôm hlâo klin ruă. Abih bang tơring čar Kontum hmâo giăm truh 11.000 čô mơnuih hmâo tlâ̆o vaccine ară tal sa pơgang Covid-19, hmâo rơbêh kơ 83% mrô mơnuih dưi đing nao hlâo tlâ̆o pơgang hlôm hlâo tal sa. Anai lĕ hơdôm mơnuih mă bruă amăng hơdôm anih anom ia jrao hăng mơnuih gum hrom pơgang pơgăn klin Covid-19. Lom tlâ̆o pơgang, gơnong bruă ia jrao tơring čar Kontum čih djă pioh hmâo 2 čô mơnuih ƀuh ba glăi kơtang tơdơi kơ tlâ̆o pơgang ƀơi Sang ia jrao prong tơring đar hăng Sang ia jrao prong kual Ngọc Hồi. Ră anai, tơlơi suaih pral mơng 2 cô mơnuih anai hơđong laih.

Ăt amăng tal sa phrâo rơgao mơn, tơring čar Daknông dưi hmâo Ding jum ia jrao pơpha rơbêh kơ 9000 liều vaccine pơgang Covid-19. Tơdơi kơ tŭ mă vaccine mơtăm, gơnong bruă ia jrao tơring čar hmâo črâo ba hơdôm bôh anom čih anăn hơdôm mơnuih dưi đing nao hlâo, pơphun pơhrăm, pơtô brơi tŭ mă hăng mă yua, rak pioh vaccine hăng pok pơhai tlâ̆o pơgang. Kiăng bruă tlâ̆o pơgang vaccine ba glăi bôh tơhnal, gơnong bruă ia jrao tơring čar Daknông pơphun tlâ̆o pơgang ƀơi 8 anih anom, anun lĕ: Sang ia jrao prong tơring čar hăng 7 bôh Anom ia jrao hơdôm bôh tơring glông dô̆ glăi. Hơdôm mơnuih dưi đing nao hlâo tal anai hmâo: mơnuih apăn bruă, mơnuih mă bruă gah ia jrao, hơdôm ding kơna Grŭp črâo ba, hơdôm khul mă bruă pơgang pơgăn klin ruă... tui hăng Tơlơi pơtrun pơsit 21 mơng Kơnuk kơna. Ơi Hà Văn Hùng, Kơ-iăng Khua Gơnong bruă ia jrao Daknông brơi thâo, đơ đam tơring čar hmâo rơbêh 10.200 čô mơnuih dưi tlâ̆o vaccine pơgang Covid-19 ară tal sa. Tơdơi kơ tlâ̆o pơgang hmâo rơbêh kơ 1.700 čô mơnuih hmâo anô̆ ba glăi pơkon kah hăng: pơ-iă drơi rơnang, kơtal, ruă ƀơi anih tlâ̆o vaccine, ƀlĕ pơtah hăng ƀu hmâo hlơi tơglăk hăng ia jrao ôh. Ră anai tơlơi suaih pral mơng hơdôm mơnuih dưi tlâ̆o pơgang leng kơ hơđong sôh.

“Gơnong bruă ia jrao hmâo gum hrom laih hăng hơdôm gơnong bruă, jơnum min, anom bruă pok pơhai tơpă. Ƀing gơmơi prăp lui djop anih anom gơnam mă yua, mơnuih mă bruă ƀơi hơdôm anih anom tlâ̆o pơgang tui tơlơi pơkă. Amăng bruă tlâ̆o pơgang, ƀing gơmơi pơphun na nao ƀơi hơdôm sang ia jrao să, bơ̆ tal tlâ̆o vaccine pơgang Covid-19 ƀing gơmơi đing nao tlâ̆o ƀơi hơdôm sang ia jrao mơng tơring čar hăng tơring glông. Yua kơ vaccine pơgang Covid-19 phrâo hăng ƀing gơmơi khom ba tơbiă tơhnal pơkă pơhlôm hloh, anun lom tlâ̆o pơgang ƀơi hơdôm bôh sang ia jrao tơdah kah hăng hmâo tơlơi truh bơdjơ̆ nao anô̆ ba glăi mơng vaccine thơ gơnong bruă ia jrao hmâo glông jơlan djop pơsir pơhlôm kơ mơnuih tlâ̆o pơgang”.

Hơdôm bôh tơring čar kual Dăp Kơdư phun ñu ngă giong bruă tlâ̆o vaccine pơgang Covid-19 tal 1         

Bruă tlâ̆o vaccine pơgang Covid-19 tal anai, tơring čar Daklak dưi pơpha hyu 17.050 liều pioh tlâ̆o pơgang kơ 3 djuai mơnuih anun lĕ hơdôm mơnuih mă bruă ƀơi hơdôm bôh sang ia jrao, mơnuih gum hrom bruă pơgang pơgăn klin hăng khul ling tơhan. Hrơi mông tlâ̆o pơgang mơng lơ 24/4 truh lơ 5/5/2021. Kiăng hmâo djơ̆ tơhnal rơbêh kơ 95% mrô mơnuih đing nao hlâo tlâ̆o pơgang, Daklak mă yua glông bruă tlâ̆o pơgang pơhư prong hmâo hlâo ƀơi tơring čar hăng pơalin nao hrom dua hơdră tlâ̆o pơgang hlôm hlâo ƀơi Sang ia jrao prong kual Dăp Kơdư hăng Sang ia jrao prong plơi prong Buôn Ma Thuột. Amăng tơlơi kiăng hloh, Gơnong bruă ia jrao amra iâu pơhrui hơdôm anih anom tlâ̆o pơgang klin hăng hơdôm anih anom pơkon djop tơlơi gal tlâ̆o pơgang gum hrom.

Kiăng pơhlôm klă, ba glăi bôh tŭ yua bruă tlâ̆o vaccine pơgang pơgăn Covid-19, Gơnong bruă ia jrao tơring čar Daklak hmâo pơphun pơhrăm rơđah laih kơ ƀing khua mua, mơnuih apăn bruă, mơnuih mă bruă tlâ̆o pơgang; tơlơi pơhing kơ vaccine pơgang Covid-19; pơtô brơi mă yua, ruah mă hlâo kơ tlâ̆o pơgang; pơtô brơi pơsir pơjrao tañ lom hmâo tơlơi ba glăi mơng vaccine pơgang... Bơ̆ tơlơi lăng tui hăng pơsir tơlơi truh tơdơi kơ tlâ̆o vaccine. Ơi ia jrao Chuyên khoa 2 Trịnh Hồng Nhựt, Khua Anom hơkrŭ tơlơi suaih pral klă hăng kơdŏng ruă măt Sang ia jrao prong kual Dăp Kơdư pơtă:

“Lom tlâ̆o jrao pơgang thơ khom đing nao hơdôm gru nam: hăng mơnuih ƀôn sang khom thâo anô̆ pơdah gah rơngiao mơng jrao ba glăi amra truh. Anun lĕ tơdơi kơ tlâ̆o pơgang hmâo hơdôm tơlơi pơdah ƀơi klĭ ƀudah ruă hlung hmao ƀlĕ pơtah, tơnap suă jua ƀudah anô̆ brơi ƀuh pơkon hơpă thơ khom nao pơ̆ anih anom ia jrao pel ĕp mơtăm. Bơ̆ hăng mơnuih mă bruă ia jrao lom tlâ̆o vaccine khom đing nao prăp lui abih bang gơnam mă yua ăt kah hăng ia jrao gun kiăng pơgang pơsir hơdôm tơlơi ba glăi mơng tal tlâ̆o pơgang anai”.

Kơnong kơ tơring čar Gialai, anih anom hmâo anih klin Covid-19 blung a ƀơi Dăp Kơdư, anun hmâo ngă giong laih bruă tlâ̆o vaccine tal 2 amăng ha mơkrah akô̆ blan 5. Tal anai, tơring čar Gialai pơpha brơi 16.650 liều vaccine. Hăng mơnuih tlâ̆o pơgang amăng tal anai lĕ khul mă bruă pơgang pơgăn klin hmâo hơdôm mơnuih mă bruă amăng hơdôm anih anom ia jrao; ding kơna Grŭp črâo ba pơgang – pơgăn klin gưl tơring glông, să; mơnuih mă bruă ƀơi hơdôm kual dô̆ čơlah, mă bruă hyu hơduăh ĕp mơnuih bơdjơ̆ nao pô ƀă kơman, pel ĕp klin ruă, grŭp Covid-19 plơi pla, khul ling tơhan pơgang guai lŏn ia, Kông ang, bruă rơdêh por, mơnuih hyu mă tơlơi pơhing phrâo, gong phun jua pơhiăp pơdah rŭp. Rơngiao kơ anun, 1.883 čô mơnuih hmâo tlâ̆o pơgang ară tal sa amăng tal sa ăt dưi tlâ̆o mơn ară tal 2 lom djop 4 rơwang hrơi tơjuh hăng lu hloh.

Anăp nao tơlơi iâu pơthưr mơng Khua dêh čar kơ bruă tañ ba vaccine pơgang Covid-19 truh djop mơnuih ƀôn sang ăt kah hăng čang rơmang dưi gum tơngan hrom abih bang mơnuih mơnam, gơnong bruă sang prăk hmâo gum pơgô̆p klă rơnoh hơdôm rơtuh klai prăk. 4 bôh sang prăk sĭ mơdrô lĕ Vietcombank, Vietinbank, BIDV hăng Agribank rim sang prăk djru 25 klai prăk pioh blơi vaccine. Biă ñu, phrâo anai Khua git gai wai lăng pơ ala mơnuih ƀôn sang dêh čar ơi Vương Đình Huệ hmâo kĭ mă yua laih Tơlơi pơtrun pơsit mơng Jơnum min apăn bruă Khua pơ ala mơnuih ƀôn sang kơ bruă mă yua prăk pơkrem pioh hăng prăk dô̆ glăi mơng ngăn drăp Kơnuk kơna thun 2020. Kiăo tui anun, Jơnum min apăn bruă Khua pơ ala mơnuih ƀôn sang dêh čar ta pơsit mă yua 12.100 klai prăk pơkrem yua amăng thun 2020 pioh blơi vaccine pơgang Covid-19. Jơnum min apăn bruă Khua pơ ala mơnuih ƀôn sang dêh čar ta jao kơ Kơnuk kơna črâo ba hơdôm Ding jum, ƀirô kơnuk kơna hăng tơring čar, ƀôn prong pok pơhai ngă tui tañ, hmao tlôn bruă blơi prăp vaccine pơgang, pơgăn klin Covid-19, pơhlôm ba glăi bôh tơhnal kơ mơnuih ƀôn sang hăng abih bang mơnuih mơnam./.

Siu H’ Prăk: Pô pơblang