VOV4.Jarai - Mơng bôh nik pơplih ngă tơnap mơng klin ruă ba truh rơgao hơnong mơnuih ba nao pơjrao ƀơi ƀôn prong Hồ Chí Minh, tom brơi (13/8), ƀơi mông Jơnum pơhrăm lăng nao rai mơng ataih kơ wai lăng, pơjrao hăng bơwih brơi mơnuih ƀă Sars-CoV-2, mơnuih ruă Covid-19 tui tơlơi pơpha wai lăng, pơjrao, Ding jum ia jrao brơi thâo amra pơhư prong bruă pơjrao F0 ƀơi sang hăng amra pơphô hlâo pha “hruh jrao hơđong tơlơi hơdip”, pơtô brơi hơdră lăng tui tơlơi suaih pral kơ mơnuih ruă. Ding jum hmâo pơtô brơi laih pơpha gưl pơjrao tui hơdră pơkă črăn rơñan 3 tal. Amăng anun tal sa pơjrao kơ F0 ƀu hmâo pơdah gah rơngiao ƀudah pơdah rơnang ƀơi sang ia jrao mă yua lom kiăng hăng pơjrao ƀơi sang. Tal pơjrao tal 2 lĕ hơdôm anih anom ia jrao mơng tơring glông hăng pơdlông, djru mơnuih ruă hmâo pơdah gah rơngiao găp ƀrô hăng khom djop oxy, jrao pơgăng kơđông hăng kơdŏng bơbrah. Tal 3 lĕ tal pơjrao hơkrŭ glăi tơlơi suaih pral klă. Khua Ding jum ia jrao ơi Nguyễn Thanh Long pơtă hơdôm bôh tơring čar, ƀôn prong ngă tui djơ̆ jơlan gah “4 mơta juăt ngă”, prăp lui brơi bruă pơjrao gah sưng đih, oxy, măi suă jua, yap wot sua jua oxy djuai dlông hloh kơ tal pơjrao tal 3 hăng măi mok pơgang hlôm hlâo./.

Siu H’ Prăk: Pô pơblang