VOV4.Jarai-Nai tha prin-nai prin tha ơi Nguyễn Thanh Long-Khua ding jum ia jrao phrâo bưp hăng pơčrông sai hăng lu khua mua sang ia jrao prong, anih pơjrao mơnuih duăm ruă yua mơnuih ƀôn sang ngă pô ƀơi ƀôn prong Hồ Chí Minh kiăng djru hrom pơgang klin Covid 19.

Khua ding jum ơi Nguyễn Thanh Long mă bruă ƀơi ƀôn prong Hồ Chí Minh

Khua ding jum rơkâo ƀing khua mua djop sang ia jrao, anih pơjrao tơlơi duăm ruă yua mơnuih ƀôn sang ngă pô, gum tơngan hrom, glăm ba bruă pơhlôm, pơgang klin kheng, biă mă ñu pơjrao, wai lăng mơnuih djơ̆ kman Covid 19 amăng ƀôn prong kiăng tañ  pơrơgao hĭ tơlơi tơnap tap anai.

Khua ding jum pơdah pran jua čang rơmang djop sang ia jrao, anih pơjrao yua mơnuih ƀôn sang ngă pô čih anăn hăng Gơnong bruă ia jrao ƀôn prong Hồ Chí Minh lăi pơthâo mrô sưng đih pơjrao mơnuih duăm ruă tơđar hăng hơdôm sưng đih pơjrao pioh kơ mơnuih djơ̆ kman Covid 19.

Hơdôm sưng đih pơjrao čih pơthâo anun mơ̆ng sang ia jrao mơnuih ƀôn sang ngă pô, ƀôn prong thâo laih anun pơpha mrô mơnuih djơ̆ klin Covid 19 hăng ngă hrom pơjrao mơnuih duăm ruă.

Nay Jek: Pơblang