VOV4.Jarai-Ăt amăng tal jơnum mơ̆ng khua mua kơnuk kơna pơhlôm, pơgang klin Covid 19, Khua ding jum ia jrao, ơi Nguyễn Thanh Long brơi thâo, đơ đam dêh čar hơmâo tlâ̆o pơgang vaccine kơ 20 rơbâo 695 čô, amăng anun kơnong ƀiă mơnuih đôč ia jrao pơglăi laih anun ră anai hơđong laih.

Boh nik ñu aka ƀu ƀuh ôh, laih tlâ̆o jrao pơgang vaccine hơmâo mơnuih kơđông drah amăng arăt. Samơ̆, kiăng  pơhlôm hơđong hloh lĕ, Ding jum ia jrao git gai djop gơnong bruă ia jrao tơring čar kơtưn pơtô brơi ƀing nai ia jrao hơdră tlâ̆o ia jrao pơhlôm djơ̆ rơnuk rơnua kah tlâ̆o sit nik.

Rơngiao kơ ia jrao vaccine blơi pơmut, Ding jum ia jrao ăt pơtrut kơsem min, pơkra ming ia jrao vaccine dêh čar ta pô. Vaccine anăn Nanocovax yua Kông ti NANOGEN pơkra lông tlâ̆o lăng črăn 2 ƀơi mơnuih mơ̆ng lơ 26/2/2021. Vaccine yua Việt Nam pơkra him lăng mă yua sit nik truh thun 2022 kiăng hơmâo ia jrao pơgang pioh lui dĭ da gla kơñ, pơhlôm hơđong kơ bruă ia jrao, bong glăi hăng klin kheng prong pơ anăp.

Nay Jek: Pơblang