VOV4.Jarai-Tui hăng tơlơi pơhŭi mơ̆ng Ding jum ia jrao, ră anai čơđai muai gah yŭ kơ 18 thun aka ƀu tlâ̆o jrao vaccine pơgang covid 19 ôh, yua kơ anun, tơdah ƀu hơmâo bruă ječ ameč, amĭ ama, mơnuih prong anăm brơi đơi ôh čơđai nao pơ jơlan glông. Pơdjơ̆ nao bruă rô nao rai mơ̆ng ƀing čơđai, lơ̆m lu ƀôn prong, tơring čar pok bah amăng brơi rô nao rai mơnuih lu, tơdah kiăng nao pơ jơlan glông biă mă lĕ, čơđai gah yŭ 18 thun, khom ngă tui tong ten 5 mơta tơlơi pơtrun pơgang klin juăt lăi 5K.

Kơ hơdră tlâ̆o vaccine pơgang Covid 19 brơi čơđai muai, Ding jum ia jrao pok pơhai pơtô brơi hơdră tlâ̆o pơgang kơ čơđai mơ̆ng 5 thun truh 17 thun. Hlâo kơ anun, ƀơi mông jơnum kơnuk kơna lok rĭm blan, Kơ-iăng Khua ding jum ia jrao ơi Đỗ Xuân Tuyên brơi thâo, git gai anom bruă ia jrao pơgang dêh čar hăng Khul Vaccine dêh čar pơmin lăng, sem tong ten rĭm djuai vaccine pioh tlâ̆o brơi kơ čơđai gah yŭ 18 thun. Bruă ngă anai hlăk rơkâo tơlơi kiăng mơ̆ng ƀing mơnuih rơgơi kơhnâo hăng ƀing kơhnăk  bruă pioh tơña hăng sem lăng tong ten lăi glăi tañ pơ anăp anai.

Nay Jek: Pơblang