VOV4.Jarai - Tlam lơ 3/12, Grup mă bruă mơng Ding jum ia jrao, anom bruă Khua git gai pơ ala mơnuih ƀon sang hăng Khul wai lăng djuai ania mơng Ƀirô khua git gai pơ ala mơnuih ƀon sang dêh čar hơmâo mông ngă bruă ƀơi Dak Lăk kơ bruă pơgang klin Covid-19 hăng hyu sem lăng, pơtŏng lăng tơlơi dưi man pơdong Sang ia jrao prong Dêh čar ƀơi kual Dap Kơdư. Pơhiăp ƀơi mông ngă bruă, Khua ding jum ia jrao pơsit, Dak Lăk gir biă mă yơh amăng bruă pơgang klin Covid-19, tơring čar hơđong pran jua, pơsir bruă klă, djơ̆ laih.

Khua ding jum ia jrao pơhiăp ƀơi mông ngă bruă.

Mơng anun, djru plai ƀiă mơnuih djai yua klin Covid-19 ngă, kơnong kơ 1/5 pơhmu hăng mrô jŭ yap hrŏm amăng dêh čar, tơring čar tañ dưi ba tơring čar hơđong tui hơđăp. Kơ bruă man pơdong Sang ia jrao prong dêh čar kual Dap Kơdư, Khua ding jum ia jrao brơi thâo, hơjăn kual Dap Kơdư đôč yơh, abih bang kual pơkŏn lêng kơ hơmâo sang ia jrao yôm mơng Ding jum. Kual Dap Kơdư lĕ kual lŏn aka ƀu klă đơi ôh gah bruă ia jrao, bruă man pơdong sang ia jrao prong dêh čar lĕ kiăng biă mă.

Siu H’Mai: Pơlang