VOV4.Jarai - Să Đưng K’Nớ, tơring glông Lạc Dương (Lâm Đồng) hơmâo giăm 95% mơnuih ƀon sang lĕ mơnuih djuai ania K’ho. Yua hơmâo pơtrut tui pran kơtang mơng abih bang, gum pran hrŏm man pơdong plơi pla phrâo, rin rơpa ƀu hơmâo dong tah, tơlơi hơdip mơnuih ƀon sang pơplih, bơwih ƀong đĭ laih. Thun laih rơgao, mah bưp ƀu ƀiă ôh tơlơi tơnap tap yua klin Covid-19, samơ̆ Đưng K’Nớ ăt hơmâo rơnoh đĭ kyar bơwih ƀong huă - mơnuih mơnam jao, amăng anun hơmâo tơlơi dưi ngă yôm lĕ dưi ngă giong 19/19 rơnoh pơkă man pơdong plơi pla phrâo.

Kơ să Đưng K’Nớ, tơring glông Lạc Dương (Lâm Đồng) amăng hrơi blung a amăng thun phrâo, gơmơi dŏ kơtuă mơn yua să dŏ pơ ataih, dŏ pơ glai čư̆ Bidup-Núi Bà pơplih hơdeč đơi tui anai. Hơdôm boh sang kyâo ƀu rup mơng hlâo adih, ră anai hơmâo pơkra jing sang phrâo laih, prong, hiam biă mă; hơdôm glông jơlan juăt dlut mơng hlâo ră anai hơmâo pơkra hăng bê tông hiam laih; hơmâo apui lơtrik, sang hră, sang ia jrao hăng anih anom yua amăng plơi pla hơmâo pơkra brơi lăp djơ̆...brơi ƀuh tơlơi hơdip mơnuih ƀon sang ƀơi anai pơplih phrâo, trơi pơđao laih.

Yơr tơngan črâo nao jơlan bê tông prong rơhaih mut nao truh pơ plơi pla, ơi Bon Niêng Ha Đê, ƀơi thôn K’Nớ 2, să Đưng K’Nớ hok mơ-ak brơi thâo, ăt yua hơmâo jơlan nao rai mơ-ak mơn jing gơnam tam hơmâo ba nao sĭ amuñ, huăi hơmâo arăng pơjuă nua gơnam dong tah. Kơnong amăng thun anai, kơphê pơmă glăi, hơmâo pô blơi hơđong mơn, jing rim boh sang mơ-ak soh, pơkra glăi sang dŏ, blơi gơnam tam pioh yua amăng sang anŏ.

“Mơng hrơi ngă jơlan hơdră man pơdong plơi pla phrâo, plơi pla hơmâo lu tơlơi pơplih laih, tơlơi bơwih ƀong huă amăng sang anŏ đĭ kyar, sang dŏ prong mơn, jơlan nao rai mơ-ak mơn. Abih bang yua hơmâo Ping gah, Kơnuk kơna lăng ba, yua hnun ƀô̆ adung mơta amăng plơi pla hơmâo lu tơlơi pơplih, yua hơmâo jơlan hơdră man pơdong plơi pla phrâo. Lu sang anŏ rin jing pơdrong laih, dưi blơi rơdêh, măi mok pioh ngă kơphê, pơdŭ pơgiăng kơphê. Neh met wa ƀơi anai thâo bơwih ƀong, wai lăng phun pla klă hloh, tơlơi hơdip ăt đĭ hloh mơn pơhmu hăng hlâo adih”.

Rơngiao kơ 980 ektar đang kơphê, să Đưng K’Nớ ăt pơphun pla añăm, bơnga tui boh thâo phrâo, pla boh troh hăng rông bui mơnŭ. Rơbêh 80% mrô sang anŏ hơmâo prăk lu yua gơñu gơgrong wai lăng glai rưng, rơbêh kơ 11.770 ektar. Lơ̆m ƀơi lu anih ƀu hơmâo prăk ôh yua klin Covid-19 ngă, ƀơi Đưng K’Nớ ăt đĭ kyar mơn, prăk pơhrui yap tui akŏ mơnuih mơng 41 đĭ 43 klăk/thun. Mrô sang anŏ rin ăt aset tui mơn, ră anai dŏ glăi 3,2% đôč.

Tui hăng tha plơi Rơ Ông Ha Bang, dŏ ƀơi plơi K’Nớ 1, dưi ngă tui anai lĕ yua hơmâo ƀing khua mua, mơnuih ƀon sang gir ngă, amăng anun hơmâo tơlơi lăng ba mơng Ping gah hăng Kơnuk kơna kơ djŏp bruă jing djru mơnuih ƀon sang pơplih tơlơi pơmin ngă hmua, hơdip mơda, hrưn đĭ hơmâo tơlơi hơdip trơi pơđao yâo mơ-ak. Tha plơi Rơ Ông Ha Bang lăi:

“Hlâo adih lu sang anŏ rin biă, thun anai plai ƀiă laih, tơlơi hơdip mơng neh met wa đĭ tui amăng ƀrư̆ mơn. Anih anom, jơlan nao rai, sang ia jrao, apui yua ăt hơmâo kơnuk kơna ta pơkra brơi djŏp mơn, plơi pla ră anai pơdrong tui laih. Neh met wa ƀơi anai hok mơ-ak, gum djru, gir ngă bruă man pơdong plơi pla phrâo, biă ñu lĕ yua hơmâo jơlan nao rai hiam, gơnam mơng hmua huăi hơmâo arăng pơjuă nua dong tah, neh met wa hok mơ-ak biă”.

Mơng sa boh să rin ataih hloh mơng tơring glông Lạc Dương, hơmâo lu mơnuih djuai ania K’ho. Tơdơi kơ 8 thun ngă tui jơlan hơdră man pơdong plơi pla phrâo, truh rơnuč thun 2021, Đưng K’Nớ hrưn đĭ dưi ngă abih bang 19/19 rơnoh pơkă. Ơi Thân Văn Hữu, Khua git gai Ping gah, Khua Jơnum min mơnuih ƀon sang să Đưng K’Nớ brơi thâo, kiăng pơhlôm bơwih ƀong huă - mơnuih mơnam mơng să đĭ kyar hơđong, mơnuih ƀon sang bơwih ƀong hơđong, anăp nao man pơdong plơi pla phrâo đĭ kyar hloh, să glăk pơƀut ngă lu bruă đah mơng djru mơnuih ƀon sang pơđĭ tui prăk pơhrui ƀơi đơ đam lŏn gơñu juăt ngă. Hrŏm hăng anun, bruă pơđĭ kyar bruă pơkra gơnam tui gru đưm pơlir hăng tuai hyu ngui amăng plơi pla ăt hơmâo pơmin nao mơn.

“Gơmơi glăk brơi mơnuih ƀon sang čih anăn đah mơng djru mơnuih ƀon sang pla boh troh hăng pla glăi phun kơphê, kiăng hơđong prăk pơhrui. Gơmơi glăk ngă hrŏm hăng Sang hră gưl prong Đà Lạt brơi thâo hơdră ngă hmua, djru măi mok kĭ thuâ̆t, pơtô glăi bruă ngă hmua, rông gơnam. Gơmơi ăt ngă hrŏm hăng Đang glai dêh čar brơi pơđĭ kyar bruă tuai hyu ngui amăng plơi pla, kiăng ană plơi dưi sĭ gơnam pơkra mă pô kah hăng eng ao mơñam, tơpai čeh, pơđĭ kyar tuai hyu ngui, pơđĭ tui prăk pơhrui kơ mơnuih ƀon sang amăng hrơi blan pơ anăp”.

Hăng hơdôm tơlơi dưi ngă anai wơ̆t hăng hơdôm tơlơi anăp nao tui hăng tơlơi ơi Thân Văn Hữu, khua git gai Ping gah, Khua Jơnum min mơnuih ƀon sang să Đưng K’Nớ phrâo lăi, đăo gơnang tơlơi hơdip mơnuih djuai ania K’ho ƀơi anai amra pơđĭ kyar dong mơng bơyan bơnga thun anai./.

Quang Sáng: Čih - Siu H’Mai: Pơblang