VOV4.Jarai-Mah tơlơi hơdip mơda sang anŏ tơnap tap hai samơ̆ khul mơnuih tha rơma djru pran jua mơ̆ng ƀing tha rơma pơdơi abih thun bruă laih dŏ ƀơi tơring kual Ea Sup, tơring glông Ea Sup, tơring čar Dak Lak hơmâo lu bruă mă hiam klă amăng bruă pơhlôm, pơgang klin Covid 19. Mơ̆ng bruă ngă anun ƀing gơñu, tơlơi khăp gum pơgôp dưi pơbŭ tui, tơlơi thâo hluh, khut khăt pran jua amăng bruă pơhlôm pơgang klin kơ ană plơi pla jai tŭ yua.

Yă Đào Thị Màu dŏ pơ tơring kual Ea Sup, tơring glông Ea Sup, tơring čar Dak Lak lăi pơthâo, hmư̆ tơlơi pơhing arăng pôr, thâo mơnuih ƀôn sang dŏ amăng kual hơmâo klin tơnap tap biă mă kơƀah lu mơta; ling tơhan ngă bruă pơ anăp pơgang klin ăt gleh glar lu mơ̆n. Ñu djru gơnam hăng pơgôp pran jua ñu pô hyu jak iâu lu sang anŏ thâo hơmâo ƀiă, sang anŏ ƀing ngă sĭ mơdrô anet amăng kual pơčruh prăk kăk, gơnam tam, braih pơdai, boh troh, brơi kơ ƀing mơnuih pơyơr pran jua, nao djru, ba brơi kơ hơdôm sang anŏ tơnap tap amăng anih pơčlah hĭ, ƀing mơnuih dŏ ngă bruă hrơi mlam pơgang klin ƀơi anih dŏ pơgăn jơlan.

Pơ ala kơ ƀing tha rơma tơring kual Ea Sup jao sang khăp pap kơ mơnuih djuai ƀiă

 tơring glông Ea Sup

Yă Màu ăt hyu jak iâu na nao, pơtô lăi ană bă ñu, sang anŏ ieo gah ngă klă tơlơi pơtrun 5 K jing 5 hơdră pơhlôm, pơgang klin mơ̆ng Ding jum ia jrao pơtô:

“Pơmin nao kơ tơlơi tơnap tap lŏn ia ta hlăk klin ngă ƀing dŏ mă bruă pơgang klin pơ anăp adih: Ƀing ơi ia jrao, nai ia jrao, ƀing kông an, ling tơhan blah ngă. Kâo hơmâo pran jua kiăng brơi sa hruh gêt ia, sa kơthung mi tôm ƀudah kơthung ia mih thơ kiăng pơsur pran jua gơñu mă bruă. Ta ƀu hơmâo pơmin nao kơ tơlơi pơkŏn ôh, kiăng ngă lu bruă mơ̆n, pioh djru kơ ană  amôn-ƀing nao mă bruă pơ anăp adih tơnap tap đah mơ̆ng hơđong ƀiă pran jua hloh”.

Ơi Phan Ba buh ao bơnga uai brơi gơnam kơ anih pơgăn jơlan pơgang klin Covid 19 ƀơi Ea Sup

Ơi Phan Ba, mơnuih ngă bruă glăi pơdơi lơtret laih rơbêh 5 thun hăng anai. Ơi Ba lăi: Mơnuih ping gah nao hlâo, ană plơi kiăo tui klôn. Ƀu djơ̆ amăng tal hơmâo klin Covid 19 anai ôh,  hlâo kơ anun laih ƀing mơnuih tha rơma ngă bruă djru pran jua ƀơi tơring kual Ea Sup jak iâu pơčruh man pơdong 2 boh sang khăp pap kơ sang anŏ ƀun rin ƀơi să ataih tơnap tap hloh laih anun sa boh sang anŏ mơnuih djuai ƀiă dŏ pơ tơring kual. Hơdôm hrơi rơgao, ơi Ba ƀu hŭi kơ adai hơjan hlim, adai pơ-iă kơtang ôh, ba nao braih, mơnong ƀong huă, ia mơñum brơi kơ mơnuih dŏ pơ anih pơčlah, anih dŏ pơgăn jơlan pơgang klin:

“Ƀơi anăp kơ tơlơi pơhing klin kheng tơnap tap tui anun, thâo hluh sa boh pia : Sa cơđeh lơ̆m mông rơpa bơkơnar hăng sa anung amăng mông trơi, yua kơ anun ƀing adơi ayong gơmơi pơphun akŏ pơjing sa khul pơyơr pran jua. Jak iâu mă ƀing gŏp amăng plơi pla laih anun rơkâo tơlơi djru mơ̆ng gah rơngiao pioh djru kơ hơdôm sang anŏ tơnap tap amăng tơring glông.

Laih anun djop anih pơgăn jơlan pơgang klin mơ̆ng guai dêh čar truh pơ djop anih amăng lăm guai dêh čar, anih pơgang ba ƀing dŏ pơčlah. Mơ̆ng anun gơmơi ƀuh pơđao pran jua yua hơmâo djru ba ƀiă kơ mơnuih ƀun rin, ƀing tơnap tap hloh amăng mông kling kheng ngă tui anai”.

Ƀing pơ ala kơ mơnuih tha rơma tơring kual Ea Sup ƀơk mơnong ƀong huă pơ

anih dŏ pơčlah tơring glông Ea Sup

Tơring kual Ea Sup hơmâo hơdră ngă hiam amăng bruă pơčlah mơnuih dŏ hăng ƀing hyu mă bruă apah pơ ƀôn prong HCM, laih anun hơdôm tơring čar pơ kual dơnung glăi pơ plơi pla. Anun lĕ 4 amăng 5 boh sang anŏ pơjing sa grup, gơñu dăp brơi anih dŏ amăng sa boh sang, brơi ƀing ană amôn glăi mơ̆ng kual hơmâo klin nao dŏ pơčlah pơ anun. Yua ngă klă bruă anai, hơdôm ƀing F0 dưi ƀuh tañ hăng huăi ƀă kơ anih pơkŏn amăng plơi pla.

Ƀing tha rơma dŏ ƀơi tơring kual Ea Sup hơmâo djru hrom lu biă mă bruă pơhlôm pơgang klin amăng tơring glông. Ơi Nguyễn Thanh Bình, Khua Jơnum min mơnuih ƀôn sang tơring kual Ea Sup lăi:

“Ayong Phan Ba- pơ ala kơ mơnuih tha rơma amăng tơring glông, hrơi blan rơgao hyu na nao  bưp ƀing khua mua ping gah, gong gai kơnuk kơna amăng tơring glông, ăt hơmâo lu bruă mă, tơlơi khăp pap djru ba. Phrâo anai djru hăng gong gai kơnuk kơna pơčruh prăk pơdong sang gum pơgôp ƀơi plơi.

Boh nik ñu phrâo anai hloh, ayong Phan Ba hơmâo tơlơi djru, khăp pap, jak iâu lu mơnuih gum hrom, sang anŏ sĭ mơdrô amăng tơring glông, djru gơnam, prăk kăk kiăng plai ƀiă tơnap brơi ba nao pơ kual hơmâo klin, mơnuih ƀôn sang kơƀah tơnap ră anai”.

Nay Jek: Pơblang