VOV4.Jarai-Lơ̆m pok pơhai bruă tlâ̆o ia jrao pơgang 100 liêu vaccine pơgang Covid 19 kơ khua mua, ƀing ơi ia jrao ƀơi sang ia jrao ling tơhan pơdong jăng jai pioh pơjrao tơlơi ruă Covid 19 hăng Sang ia jrao prong Gia Lai, hơmâo 10/100 čô mơnuih giong tlâ̆o jrao pơgang ia jrao pơglăi sat.

Dŏ tơguan krăo lăng tơdơi kơ tlâ̆o jrao pơgang Covid 19

Tui hăng anun, hnong ia jrao pơglăi lĕ ngă hwing akŏ, hao ƀlĕ pơtah mơ̆ng mơkrah mông truh 6 mông tơdơi kơ anun. Anai lĕ hơdôm tơlơi pơglăi phiăn hơmâo laih anun thâo hlâo laih mơ̆n lơ̆m tlâ̆o ia jrao pơgang.

Kơnong sa čô nai ia jrao đah kơmơi mă ƀuai, ñu tom ruă pơtuk hơngơ̆t ƀlĕ bor sit bơblih ayuh hyiăng mơ̆ng anet, laih tlâ̆o ia jrao anai, ia jrao pơglăi kơtang hloh hnong 2 tơdơi kơ tlâ̆o 5 mơnit. Ñu mưn ia jrao pơglăi lĕ ƀlĕ pơtah, duăm hlor, hwing akŏ.

27 hrơi laih rơgao, tơring čar Gia Lai ƀu hơmâo mơnuih ƀă kman Covid 19 phrâo ôh, lu mơnuih ƀă pơjrao hlao laih. Tơdơi kơ tlâ̆o 100 liêu vaccine pơgang Covid 19 ƀơi plơi prong Pleiku, anom bruă ia jrao Gia Lai ăt pok pơhai tlâ̆o dơ̆ng 1.800 liêu dŏ glăi kơ ƀing nai ia jrao pơ djop tơring glông, anih tom hơmâo klin.

Nay Jek: Pơblang