VOV4.Jarai - Mơguah lơ 19/11, tơlơi pơhing mơng Anom git gai pơgang klin tơring glông Đăk Đoa, tơring čar Gia Lai, mơng test hmar, tơring glông čih pioh hơmâo 125 čô mơnuih ƀă kman SARS-CoV-2. Amăng anun, 58 čô mơnuih pơčrang hăng Real time PCR pơsit ƀă kman laih. Ră anai, hơmâo 5/8 boh plơi ƀơi să Hà Bầu hơmâo mơnuih djơ̆ klin Covid-19. Ƀơi anai, hơmâo lu anih bơdjơ̆ nao mơnuih ƀă klin, jăng jai anai arăng pơgăn hĭ đah mơng ĕp ƀuh pô dŏ jê̆ giăm, kah hăng ƀơi Sang hră gưl sa Hà Bầu, sang jơnum plơi pla să Hà Bầu, hơdôm boh sang sĭ mơdrô kơphê, sang yuă ƀuk ƀơi jơlan čơ lah 4 pơtruh nao rai Hà Bầu hăng să Nam Yang (tơring glông Đăk Đoa).

Anom bruă git gai pơgang klin Covid-19 tơring čar Gia Lai hơmâo brơi grup ngă bruă nao pơ tơring glông Đăk Đoa djru pok pơhai hơdră pơgang klin. Tơring glông Đăk Đoa kiăng mơnuih ƀon sang ngă tui khŏp tơlơi pơtrun 5K; ƀu dưi pơƀut lu mơnuih; lăi pơhmư̆ tañ kơ ƀing apăn bruă čar lơ̆m bơdjơ̆ nao pô ruă, hơdôm anih hơmâo mơnuih ruă nao, ƀudah lơ̆m pơtuk hơdrap, duam, ƀu anăm suă pran.

Siu H’Mai: Pơblang