VOV4.Jarai-Mơguah lơ 8/7, laih ĕp lăng kman hơdôn ƀing F1 pơdjơ̆ nao kơ 2 čô mơnuih ƀă Covid 19 phrâo ƀuh tlam mơmŏt lơ 7/7, anom ĕp tơlơi duăm ruă CDC tơring čar Gia Lai ăt ĕp ƀuh dơ̆ng sa čô mơnuih  ƀă kman Sars-cov-2.

Rơđah biă mă, pô ruă phrâo ƀuh ƀă kman Covid 19 lĕ đah rơkơi thun tơkeng 2006, dŏ pơ plơi Kte, să Hbông, tơring glông Čư̆ Sê, Gia Lai. Pô anai adơi pô ƀă kman Covid 19 arăng ƀuh lơ 7/7. Tơdơi kơ ƀuh 3 čô mơnuih ƀă kman sars-cov-2 anai, tơring čar Gia Lai ngă tui hơdră pơgăn guang dar jăng jai nao pơ plơi Kte, mă ia khak 261 čô mơnuih amăng plơi pla anun.

Hrom hăng anun, Khua git gai, pơhlôm pơgang klin Covid 19 tơring čar, ngă hră git gai kông an tơring čar Gia Lai pơpha bruă tơhan amăng kual giăm hloh, krăp lăng hăng kamera ƀơi 4 bit anih ĕp lăng klin, jơlan mut nao rai amăng tơring čar.

Nay Jek: Pơblang