VOV4.Jarai - Mơguah lơ 22/7, Anom bruă wai pơgang tơlơi duam ruă tơring čar (CDC) Gia Lai pôr pơthâo, tơring čar hơmâo dong 4 čô mơnuih ƀă klin Covid-19, pơđĭ tui mrô mơnuih ƀă klin amăng tơring čar lĕ 21 čô mơnuih. Amăng anun, hơmâo 3 čô lĕ F1 mơng hơdôm čô ƀă kman ƀơi Kon Tum hăng tơring glông Krông Pa, 1 čô lĕ mơnuih glăi mơng Bình Dương, glăk pơčlah pơ tơring glông Phú Thiện. Hơdôm anih bơdjơ̆ nao mơnuih ƀă klin phrâo anai lu biă ñu ƀơi tơring kual Kbang hăng plơi prong Pleiku.

Gia Lai hruă hloh bruă kăng glông, anih nao rai, anih pơčlah ƀơi hơdôm anih pơgăn klin.

Ră anai, Jơnum min mơnuih ƀon sang tơring glông Kbang, Jơnum min mơnuih ƀon sang plơi prong Pleiku hơmâo hră pơdơi abih bruă sĭ mơdrô ƀu kiăng đơi kah hăng karaoke, massage, bơkơjăp drơi jăn pơƀut lu mơnuih, ngui game, pơplông ngui ngor. Hơdôm anih sĭ mơdrô ƀong huă, sĭ kơphê kiăng kiăo tui tơlơi pơtrun pơgang klin; bơtơhmal mơnuih ƀu truă bơnal gôm ƀô̆ lơ̆m tơbiă hyu gah rơngiao.

Siu H’Mai: Pơblang