VOV4.Jarai-Mơguah tom brơi, lơ 9/3, tơring čar Gia Lai pơphun brơi tlâ̆o ia jrao vaccine pơgang blung a kơ 1900 liêu pơgang Covid 19 dưi hơmâo Ding jum ia jrao pơpha glăi. Tui hăng anun, ƀing khua mua gah ia jrao ƀơi sang ia jrao prong, hlăk ngă bruă pơhlôm pơgang hăng pơjrao tơlơi ruă yua kman Covid 19 tơring čar brơi tlâ̆o pơgang hlâo.

Ơi ia jrao Nguyễn Thanh Hưng pô tlâ̆o vaccine Covid 19 blung a ƀơi Gia Lai

Tui hăng mrô čih pioh, hơmâo 12 čô khua mua, mơnuih ngă bruă gah ia jrao ƀơi sang ia jrao prong Gia Lai arăng tlâ̆o brơi jrao pơgang hlâo, gơñu lêng kơ mơak soh ƀu hŭi hơgĕt ôh, laih tlâ̆o pơgang huăi hơmâo tơlơi hơgĕt lơi pơglăi jăng jai anai. Amăng 2 hrơi lơ 9 hăng lơ 10/3, hrom hăng 61 čô mơnuih ngă bruă ia jrao ƀơi sang ia jrao tơhan pơdong jăng jai pioh pơjrao Covid 19 lĕ, hơmâo 39 čô mơnuih mă bruă mơ̆ng sang ia jrao prong Gia Lai ăt amra tlâ̆o pơgang abih. 1800 liêu vaccine Covid 19 dŏ glăi amra pơpha glăi djop tơring glông brơi tlâ̆o pơgang kơ ƀing hlăk dŏ mă bruă amăng anih pơhlôm pơgang klin.

Nay Jek: Pơblang