VOV4.Jarai-Lơ 29/11, tơring čar Gia Lai pơphun pok pơhai tlâ̆o ia jrao pơgang vaccine Covid 19 mơ̆ng anom bruă Pfizer-BioNTech kơ čơđai sang hră mơ̆ng 12 thun truh 17 thun. Tum teč biă ñu, tui hăng akŏ bruă mơ̆ng Khul khua mua git gai pơhlôm, pơgang klin Covid 19 Gia Lai, năng ai hơmâo 60 rơbâo 200 čơđai mơ̆ng 16 thun truh 18 thun amăng đơ đam tơring čar amra dưi tlâ̆o hlâo.

Bruă tlâ̆o ia jrao pơgang anai, dưi pơphun ƀơi sang ia jrao să, phường; djop anih tlâ̆o pơgang ba hyu tơl sang hră, kual plơi pla, ƀôn ƀut kual ataih. Him lăng, tơdơi kơ ngă giong tlâ̆o pơgang kơ hnơr thun anai, tơring čar Gia Lai ăt pok pơhai tlâ̆o pơgang brơi kơ rơbêh 113 rơbâo 200 čô čơđai mơ̆ng 12 thun truh 16 thun. Sui mơ̆ng arăt vaccine tal sa hăng tal dua lĕ mơ̆ng 3-4 wơ̆t hrơi tơjuh.

Khul khua mua git gai pơhlôm, pơgang klin Covid 19 tơring čar Gia Lai pơtrun hiăp kơ djop tơring glông, plơi pla pok pơhai bruă pơgang brơi kơ čơđai muai, kơtưn kiăng tlâ̆o djop vaccine kơ čơđai mơ̆ng 12 thun truh 18 thun amăng thun 2021.

Nay Jek: Pơblang