VOV4.Jarai - Mơmot lơ 25/7, Grŭp črâo ba pơgang, pơgăn klin Covid-19 tơring čar Gialai lăi pơhing, Kơnuk kơna hăng Ding jum ia jrao amra đing nao pơpha brơi kơ tơring čar Gialai hmâo rơbêh 1 klăk 600 rơbâo vaccine pơgang Covid-19 mơng ră anai truh kơ rơnuč thun. Tui anun, amăng thun anai mơtăm, tơring čar amra tlâ̆o pơgang klin Covid-19 kơ 92% mrô mơnuih ƀôn sang rơbêh kơ 18 thun.

Plơi prong Pleiku mă yua Tơlơi črâo ba mrô 15 mơng Khua dêh čar mơng 8 mông lơ 26/7  

Rơđah biă ñu, amăng blan 7, Gialai tlâ̆o giăm truh kơ 150 rơbâo liều vaccine brơi kơ hơdôm mơnuih đing nao hlâo. Mơng blah 8 truh blan 12, tơring čar amra tŭ mă hăng tlâ̆o brơi rơbêh 1 klăk 600 rơbâo čô mơnuih ƀôn sang rơbêh kơ 18 thun, dưm dưm hăng 92% mrô mơnuih ƀôn sang amăng hnưr thun anai. Ăt amăng mơmot lơ 25/7 mơn, Grŭp črâo ba pơgang pơgăn klin Covid-19 Gialai lăi pơhing, tơring čar hmâo dong sa čô mơnuih ƀă kơman klin, anun lĕ bơnai pô apăn bruă Jơnum min djop djuai ania mơnuih mơnam phường Tây Sơn (Pleiku) ƀă kơman Covid-19, đĭ tui mrô mơnuih ƀă kơman amăng sa hrơi truh kơ 4 čô mơnuih, mrô mơnuih ƀă kơman đơ đam tơring čar amăng tal klin phrâo truh kơ 26 čô mơnuih./.

Siu H’ Prăk: Pô pơblang