VOV4.Jarai - Tui hăng Grŭp črâo ba pơgang, pơgăn klin Covid-19 tơring čar Gialai, čơtlăm tom brơi lơ 7/7, Gialai čih djă pioh hmâo dong 2 čô mơnuih pơčrăng lăng tal sa ƀă kơman Sars-CoV-2 dô̆ hrom ƀơi plơi Kte, să H’Bông, tơring glông Čư̆ Sê, tơring čar Gialai.

2 čô mơnuih phrâo ƀă kơman klin anai leng kơ đah rơkơi, K.N tơkeng thun 2003 hăng K.Q tơkeng thun 2001, leng kơ dô̆ ƀơi plơi Kte, să H’Bông, tơring glông Čư̆ Sê, tơring čar Gialai đĭ rơdêh thut mơng mrô 163 Huỳnh Tấn Phát, phường Tân Thượng Đông, quận 7, ƀôn prong Hồ Chí Minh glăi pơ̆ să H’ Bông, tơring glông Čư̆ Sê amăng lơ 4/7. Ră anai, dua gơñu hmâo ba nao dô̆ čơlah laih hăng pơjrao ƀơi kual dô̆ čơlah hơbit tơring čar Gialai. Khul apăn bruă ăt tañ ngă tui mơn bruă guang dar kual klin ngă hăng hyu ĕp mơnuih bơdjơ̆ nao F1, F2. Hăng 2 čô mơnuih phrâo ƀă kơman anai, yap mơng lơ 26/4 truh ră anai, Gialai hmâo laih 6 čô mơnuih ƀă kơman Sars-CoV-2./.

Siu H’ Prăk: Pô pơblang