VOV4.Jarai - Ơi ia jrao Hồ Ngọc Gia – Khua Anom wai lăng tơlơi duam ruă tơring čar Gialai brơi thâo: Mơng akô̆ thun truh ră anai, đơ đam tơring čar čih pioh hmâo 164 čô mơnuih duam pơđung drah, hrŏ trun 63% bơhmu hăng thun hlâo. Mrô mơnuih hmâo tơlơi ruă biă ñu ƀơi hơdôm bôh tơring glông: Krông Pa, Phú Thiện, plơi prong Pleiku hăng plơi prong Ayun Pa. Khă mrô mơnuih duam pơđung drah hrŏ trun bơhmu hăng thun hlâo, samơ̆ ƀu djơ̆ hnun mơ̆ lui raih amăng bruă pơgang, pơgăn klin ruă. Anom wai lăng tơlơi duam ruah tơring čar đing nao ngă giong ƀut mơnuih ba nao pơ̆ sang ia jrao tơring čar, khul mơnuih gơgrong bruă ba nao gah tơring glông hăng mơnuih gơgrong bruă mơng sang ia jrao să, ngă tui bruă pơgang, pơgăn klin duam pơđung drah amăng plơi pla. Hrom hăng anun, iâu pơhrui dong tơlơi gum hrom mơng glông bruă kơđi čar ƀơi plơi pla amăng bruă pơgang, pơgăn; pơtrut kơtang lăi pơhing, pơsur mơnuih ƀôn sang gum hrom amăng bruă pơdjai lăng kuang, bôh keč./.

Siu H’ Prăk: Pô pơblang