VOV4.Jarai -  Lom lơ 30/8, Gơnong bruă ia jrao tơring čar Gialai pơphun mă ia khak pơčrang lăng hăng tlâ̆o vaccine ară tal 2 pơgang Covid-19 kơ mơnuih mơgăt rơdêh ƀơi plơi prong Pleiku. Bruă pơphun mă ia khak, ia adung hăng tlâ̆o vaccine pơgang Covid-19 pơphun amăng hơdôm mông plơi prong Pleiku, tơring čar Gialai glăk mă yua dô̆ čơlah mơnuih mơnam tui Tơlơi črâo ba mrô 16 mơng Khua dêh čar. Yua anun djop glông bruă pơgang, pơgăn klin ƀơi anih pơčrang lăng hăng tlâ̆o vaccine dưi pok pơhai tơpă. Ƀing mơgăt rơdêh leng kơ ngă tui tơpă bruă lăi pơthâo gah ia jrao, pơkă lăng pơ-iă drơi jăn, pơdjai kơman hăng dô̆ čơlah tui djơ̆ tơlơi pơtô ba mơng gơnong bruă ia jrao. Tơdơi kơ pơčrang lăng hăng pơhlôm klă, ƀing mơgăt rơdêh amra dưi tlâ̆o brơi dong ară tal 2 vaccine pơgang Covid-19. Pơkă hlâo mơng lơ 30/8 truh abih lơ 31/8, Anom wai lăng tơlơi duam ruă tơring čar Gialai gum hrom hăng Anom ia jrao plơi prong Pleiku pơphun mă ia adung pơčrang lăng hăng tlâ̆o vaccine pơgang Covid-19 ară tal 2 brơi rơbêh kơ 700 čô mơnuih mơgăt rơdêh glăk mă bruă ƀơi plơi prong Pleiku./.

Siu H’ Prăk: Pô pơblang