VOV4.Jarai-Truh ră anai, tơring čar Dak Lak hơmâo čih pioh rơbêh 10 rơbâo čô mơnuih ƀă Covid 19, mrô anai lu hloh anŏ him lăng hlâo mơ̆ng tơring čar Dak Lak. Samơ̆ hơmâo tơlơi prăp lui lu jơlan hơdră, klin covid 19 ăt dŏ amăng tơlơi wai lăng mơ̆ng tơring čar mơ̆n. Mrô mơnuih ƀă klin dưi pơjrao laih huăi ƀă rơgao hnong lơi laih anun ăt djop anih hlăk pơjrao djơ̆ hơdră. Tơlơi čih mơ̆ng Nam Trang, pô čih tơlơi pơhing phrâo Gong phun jua pơhiăp Việt Nam dŏ ƀơi kual Dap Kơdư lăi nao kơ tơlơi anun.

Plơi prong Ƀuôn Ma Thuôt lĕ plơi pla ba jơlan hlâo tơring čar Dak Lak mrô mơnuih ƀă klin Covid 19 hăng rơbêh 2.900 čô mơnuih ƀă yap truh rơnuč rơwang hrơi tơjuh rơgao. Anai lĕ, plơi pla dŏ amăng anih hŭi kơtang hloh amăng 2 blan rơgao, hơmâo na nao rĭm hrơi mơ̆ng 30-50 čô mơnuih ƀă, 70% mrô mơnuih ƀă lĕ amăng kual plơi pla mơ̆ ƀu thâo tong ten mơ̆ng pơpă ƀă.

Rơbêh 70% mrô mơnuih ƀôn sang djop 18 thun pơngŏ ƀơi Dak Lak tlâ̆o

djop 2 arăt vaccine pơgang Covid 19

Yua kơ hơmâo mrô mơnuih tlâ̆o ia jrao vaccine pơgang lu hloh, anun yơh klin covid 19 ƀơi plơi prong anai dưi yap hnong mrô 2, dưi brơi lu sang sĭ mơdrô bơwih bơwang mă bruă glăi kah hăng tơđar samơ̆ aka pok lu ôh bruă sĭ mơdrô anih anom ngui ngor ƀong mơñum lu mơnuih mơnam. Ơi Phạm Tiến Hưng, Kơ-iăng Khua Jơnum min mơnuih ƀôn sang plơi prong Ƀuôn Ma Thuôt brơi thâo, tơl mrô mơnuih ƀă klin amăng kual plơi pla dưi pơgăn laih sit nik kah, plơi prong mơ̆ng pok tui ƀơ ƀrư̆:

“Bruă pok phru rô nao rai lĕ, gơmơi ngă tui ƀơ ƀrư̆ tui jơlan gah hăng bruă brơi tlâ̆o vaccine djop 2 arăt kơ mơnuih ƀôn sang ƀơ̆i. Tơl bruă wai lăng klin kheng hăng bruă bong glăi tơlơi ječ ameč, mrô mơnuih ƀă amăng kual plơi pla plai ƀiă kah ƀing gơmơi amra ngă tui djơ̆ hơdră laih anun ngă tui ƀơ ƀrư̆ mơ̆n sa amăng ƀrư̆.”

Kơđiăng hăng klin covid 19, anun yơh mah jing anih pơ anăn kual mơtah kiăng lăi rơnuk rơnua ƀiă ding dăng pơkă hăng anih pơkŏn amăng tơring čar, tơring glông Krông Ƀŭk ăt prăp lui lu jơlan gah, akŏ pơjing khul ơi ia jrao hyu pơjrao pơ djop anih, ba đing oxy hăng anŏ gêh găl kơ bruă pơjrao F0 pơ sang anŏ mơtam. Ơi Trần Thuận, Khua anom bruă ia jrao tơring glông brơi thâo, hơdră lăi anun, pơhlôm pơgang amăng mông ječ ameč. Ră anai, tơring glông Krông Ƀŭk ăt prăp lui 300 boh sưng đih pơjrao dua tal, tal 1 hăng tal 2, lu hloh giăm 4 wơ̆t mrô mơnuih djơ̆ klin covid 19 kiăng pơjrao:

“Kual anai ngă lu tal, tơdah pok pơhư tal 1 ta kơnong krăo lăng hăng pơjrao mơnuih ruă amăng tal 1, anih dŏ pơčlah amăng sang ia jrao pioh pơjrao ƀing F0 klă hloh, yua kơ pơ sang anŏ lĕ 35% mrô mơnuih ƀă klin jing mơnuih djuai ƀiă, dŏ amăng sang glông, sang dŏ hrom lu mơnuih anun ƀu hơmâo anih dưi dŏ pơčlah ôh, khom sem lăng rĭm plơi, sang anŏ gêh găl kah mơng pok pơhư prong tal 1 laih anun krăo lăng tong ten hloh”.

Dak Lak hlăk pok pơhai lông ngă lăng pơjrao ƀing F0 ƀơi sang anŏ

Mah rĭm hrơi hơmâo na nao 100 čô mơnuih ƀă covid 19 laih anun mrô mơnuih ƀă pơ alin tui hơmâo giăm 11 rơbâo čô mơnuih, samơ̆ yua lu mơnuih ƀă hăng pơjrao hlao laih hăng tơbiă mơ̆ng sang ia jrao lu laih mơ̆n, anun kơnong 2000 čô đôč dŏ pơjrao amăng sang ia jrao hăng 50 čô pơjrao amăng sang anŏ. Hrom hăng anun, giăm 70% mrô mơnuih ƀơi Dak Lak hơmâo tlâ̆o djop 2 arăt laih ia jrao vaccine, kơnong 1 boh tơring glông đôč yap hnong mrô 3, 9 boh tơring glông, plơi prong hnong mrô 2 hăng 5 boh tơring glông, plơi prong hnong mrô 1.

Tui hăng Nay Phi La, Khua Gơnong bruă ia jrao tơring čar Dak Lak, ră anai tơring čar ăt djop mơ̆n anih pơjrao hăng mrô mơnuih mă bruă pơhlôm, pơgang, pơjrao mơnuih djơ̆ klin. Tơring čar ăt pơblih laih hơdră mă bruă pơgang klin tui hluai tơlơi gêh găl phrâo, pơkra hơdră tui hluai rĭm hrơi, sa hrơi hơmâo mơ̆ng 100-300 čô mơnuih ƀă, ƀudah prăp lui tơdah hơmâo mơ̆ng 300 truh 500 lu hloh dơ̆ng mơ̆ng 500-1000 hai ăt djop mơ̆n. Bruă pơkă guai, kăng anih, brơi dŏ pơčlah pơjrao mơnuih ruă tui hluai anŏ gêh găl phara ba kual, plơi pla:

“Sa hrơi mơ̆ng 100-300 čô mơnuih ruă lĕ amra pok pơhai abih bang anih dŏ pơčlah tui hăng akŏ bruă 5 tal mơ̆ng Jơnum min mơnuih ƀôn sang tơring čar pơkă. Hrom hăng ngă tui Tơlơi pơtrun jơnum mrô 128 gah anom bruă ia jrao, pok pơhai kah sang ia jrao jing dua, kiăng pơgang hăng pơjrao djơ̆ hnong kơ mơnuih duăm ruă, tŭ jum mơnuih pơjrao dua tal.

Dak Lak kơtưn ba măi suă jua hăng pơtô hrăm mơnuih pơjrao brơi kơ ƀing F0 ƀơi tal 3

Pơtrut bruă pơjrao ƀing F0 ƀơi sang anŏ, anom bruă ia jrao hơmâo akŏ pơjing 184 khul ơi ia jrao hyu pơjrao tơl sang hăng hơmâo 4 boh anih pơjrao yua mơnuih ƀôn sang ngă pô, djru hrom pơjrao kơ mơnuih ƀă klin laih anun hlăk rơkâo đĭ hăng Jơnum min mơnuih ƀôn sang tơring čar brơi abih bang djop sang ia jrao yua mơnuih ƀôn sang ngă pô djru hrom pơjrao mơnuih djơ̆ klin, ngă hrom sang ia jrao kơnuk kơna pơjrao kơ ƀing F0 hlơi duăm djong ƀudah ƀu duăm ôh samơ̆ hơmâo kman amăng drơi jăn laih anun ăt prăp lui pok bruă pơjrao tal 3 ba măi suă pran hăng pơtô hrăm kơ ƀing nai ia jrao thâo pơjrao hơdră phrâo djop kơ 100 boh sưng đih pơjrao hăng ICU ƀơi tal 3"”

Vũ nam Trang pô čih-Nay Jek: Pơblang