1-Việt Nam pơphun truh kih tal pơplông bơrơguăt drơi jăn kual Đông Nam Á tal 31 (SEA Games 31)

Hăng anăn pơphun “Yua sa kual Đông Nam Á kơtang ƀiă dong”, Việt Nam pơphun truh kih pơplông bơrơguăt drơi jăn kual Đông Nam Á tal 31 (SEA Games 31) dong mơng lơ 12-23/5/2022. Găn rơgao 14 hrơi pơplông ƀơi Hà Nội hăng 11 boh tơring čar, ƀôn prong jum dar, grup pơplông Việt Nam dưi mă 205 miđai ia mah, 125 miđai ia kông hăng 116 miđai ia prăk. Tui jŭ yap, 17 tơlơi pơplông amăng jơlan hơdră pơplông Olympic hơmâo pơgôp brơi grup pơplông Việt Nam 119 miđai ia mah amăng SEA Games 31 anai, dưm dưm 58% mrô mơđai mơng grup pơplông. Sit biă ñu, grup đăo boh lông đah rơkơi U23 hăng đah kơmơi Việt Nam dưi wai pơgang miđai ia mah hlâo gơñu mă amăng thun 2019. Amăng SEA Games 31 anai, hơmâo lu tơlơi hok mơ-ak, ƀlĕ ia mơta samơ̆ pơdah pran pơplông kơtang hloh, thâo čơkă tuai hăng hơmâo lu mơnuih nao lăng pơsur pran jua pơplông mah hơmâo grup pơplông Việt Nam hă ƀŭ, tơlơi anai pơdah sa Việt Nam găn rơgao klin kheng, glăk hơkrŭ glăi hăng pơđĭ kyar.

Hrŏm hăng anun, Việt Nam ăt hơmâo tơlơi dưi amăng bruă pơhưč tuai čuă ngui hăng lăi pơthâo rup rap, gru grua, lŏn ia, mơnuih ƀon sang Việt Nam truh gơyut gơyâo amăng kual hăng jar kmar.

2 – Khul đah bôh lông đah kơmơi Việt Nam hmâo mă laih bôh than prong mut pơplông rơnuč World Cup đah kơmơi 2023 tal blung a amăng gru grua

Grŭp đă bôh lông đah kơmơi Việt Nam hmâo mă laih bôh than prong mut pơplông rơwang rơnuč World Cup đah kơmơi tal blung a amăng gru grua tơdơi kơ ƀong grŭp đă bôh lông đah kơmơi Đài Bắc Trung Hoa 2-1 amăng tal đă pơplông pơsit. Bôh than mơng Grŭp đă bôh lông đah kơmơi Việt Nam jai lăng đing nao hloh lom hơdôm mơnuih đă bôh lông hmâo bơdjơ̆ nao lu yua kơ klin Covid-19.

32 grŭp mut amăng rơwang pơplông hrom rơnuč World Cup 2023 (hmâo 29 grŭp mut tơpă hăng 3 grŭp mơng rơwang play-off ) dưi pơpha jing 4 ƀut pơjeh, rim ƀut 8 grŭp. Bôh tơhnal lĕ mă gai hmâo ba laih Grŭp đă bôh lông đah kơmơi Việt Nam mut amăng ƀảng E hăng Grŭp đă bôh lông đah kơmơi dêh čar Mi (pô glăk djă pri dlông hloh) hăng Grŭp đă bôh lông Hà Lan (glăk dŏng tal 2 pri). Anăn iâu dô̆ glăi lĕ grŭp dưi amăng ƀảng A lok play-off, amra lĕ Bồ Đào Nha – Thái Lan ƀudah Cameroon. Nai čơđai Mai Đức Chung ăt găn rơgao mơn thun 2022 truh kih prong hăng miđai ia mah tal pơplông SEA Games 31. Anai lĕ tal 3 tô̆ tui tlôn, ƀing đah kơmơi mơng grŭp đă bôh lông Việt Nam hmâo mă pri dlông hloh amăng tal pơplông SAE Games. Bôh than anai ăt djru mơn grŭp đă bôh lông đah kơmơi Việt Nam hmâo mă miđai ia mah tal pơplông SEA Games hăng abih bang 7 miđai ia mah, blai lui ataih dŏng tal 2 lĕ Thái Lan (5 miđai ia mah).

3-Anai lĕ tal đă boh lông mơng grup đah rơkơi Việt Nam gir run mă cup AFF 2022 hlâo kơ nai Park Hang Seo pơdơi.

Ƀơi AFF Cup 2022, grup đă boh lông Việt Nam dăp amăng grup B hrŏm hăng hơdôm boh dêh čar Malaysia, Singapore, Myanmar hăng Lao. Đă nao rai amăng grup AFF Cup 2022 pơphun đăo 5 wŏt, amăng anun rĭm grup amra đă 2 wŏt pơ dêh čar hăng 2 wŏt pơ tač rơngiao, kiăng kơ ruah 2 grup mut đă amăng lăm dong. Grup Việt Nam amra đă 2 wŏt pơ dêh čar anun lĕ bưp Lao hăng Singapore, lơ̆m anun 2 wŏt đă pơ tač rơngiao bưp Malaysia hăng Myanmar. Anai lĕ tal pơplông Việt Nam gir mă Cup hlâo kơ nai Park Hang Seo pơdơi.

5 thun kiăo tui tơlơi pơtô mơng nai Park Hang Seo, grup Việt Nam lêng dong tal 1 amăng kual Đông Nam Á, laih dong lĕ dêh čar kual Đông Nam Á dong amăng mrô 100 boh dêh čar kơtang mơng FIFA. Nai Park Hang Seo hrŏm hăng grup đă boh lông Việt Nam hơmâo lu tơlơi dưi yôm phăn hăng lăng yôm amăng tal pơplông kual Asia 5 thun laih rơgao, anai lĕ grup U23 dong tal dua amăng tal pơplông U23 kual Asia 2018, dong tal 4 amăng ASIAD 2018, 2 tal mă miđai ia mah amăng SEA Games 30 hăng 31’ grup Việt Nam dưi mă Cup AFF thun 2018, hăng mut amăng grup 4 boh dêh čar amăng ASIAN Cup 2019 hăng biă mă ñu dưi mut đă tal rơnuč kiăng mut đă FIFI World Cup - kual Asia.

4 – U23 Việt Nam hmâo mă laih mơn miđai ia mah SEA Games 31 hăng mut pơplông amăng rơwang 4 grŭp pri U23 ASIA 2022

Amăng tal pơplông SEA Games 31, U23 Việt Nam hmâo mă laih miđai ia mah yôm phăn amăng tal pơplông đă bôh lông gah đah rơkơi. Anai lĕ tal 2 tô̆ tui tlôn, nai hăng čơđai Park Hang Seo hmâo mă bôh than dlông hloh amăng tal pơplông anai. Kiăng pơgang truh kih pri miđai ia mah ƀơi tal pơplông đă bôh lông đah rơkơi, U23 Việt Nam hmâo pơplông đă ƀong dêh čar Indonesia 3-0, hăng Philippines dưm kơnar 0-0, ƀong Myanmar 1-0, ƀong Timor Leste 2-0 ƀơi rơwang pơplông dăp tui hnal. Tơdơi kơ anun, nai hăng čơđai Park Hang Seo ƀong dêh čar Malaysia hăng Thái Lan sa mrô 1-0 amăng tal pơplông giăm rơwang rơnuč hăng rơwang rơnuč. Anai lĕ tal SEA Games tŭč rơnuč, Park Hang Seo pơtô brơi kơ U23 Việt Nam pơplông.

Ƀơi rơwang pơplông hrom rơnuč pri U23 ASIA 2022 pơphun ƀơi Uzbekistan mơng lơ 1-19/6/2022, U23 Việt Nam dŏng hrom hăng hnal pơplông Hàn Quốc, Thái Lan hăng Malaysia. Gah yŭ tơlơi pơtô ba mơng mơnuih Hàn Quốc Gong Oh-kyun, U23 Việt Nam hmâo yak rơgao laih hnal dăp, hlâo kơ pơdơi yak hăng lui ruh hăng mrô 2-0 lom pơplông hăng grŭp đă bôh lông Saudi Arabia ăt jing grŭp hmâo mă pri pơplông anai lom đă pơplông hăng U23 Uzbekistan hăng mrô 2-0 amăng tal pơplông rơwang rơnuč.

  5-Vũ Phương Thanh mă pri prong hloh amăng 3 tơlơi pơplông mut hrŏm jar kmar

Lơ 29/8, web sit nik SwissUltr 2022 čih tơlơi pơpŭ kơ pô pơplông mơng Việt Nam hăng tơlơi Angle: “ Anai lĕ mơnuih mă pri prong hloh jar kmar: Pơpŭ brơi kơ Thanh Vũ”. SwissUltra lĕ tal pơplông 3 tơlơi bơrơguăt pơmut hrŏm tơnap hloh jar kmar. Ƀing nao pơplông amra lua ia 38 km, 1.800 km juă rơdêh dang wang hăng đuăi 422 km. Abih tih amra pơplông glông giăm 10 wŏt pơhmu hăng full triathlon.

Tơdơi kơ 14 hrơi pơplông, Vũ Phương Thanh pơgiong hĭ amăng tal pơplông SwissUltra 2022 hăng abih tih 328 mông 27 mơnit 55 dây kiăng kơ đĭ mă pri prong hloh. Vũ Phương Thanh (tơring thun 1990), ñu arăng lĕ “đah kơmơi đuăi jum dar rŏng lŏn tơnah”, ƀudah “Bơng amăng tơdrŏn har”. Thun 2016, ñu lĕ mơnuih kual Asia blung a đuăi găn nao 4 boh tơdrŏn har pơ-iă kơtang hloh jar kmar hăng glông 1.000 km, hơmâo Atacama (Chile), Gobi (Khač) Sahara (Êjip) hăng Antarctica (gah kual Dơnung).

6 – Jơnum pơplông bơkơjăp drơi jăn đơ đam dêh čar thun 2022 truh kih klă hiam

 Jơnum bơkơjăp jăn đơ đam dêh čar thun 2022 pơphun mơng lơ 9-21/12 ƀơi Quảng Ninh hrom hăng 10 bôh tơring čar, ƀôn prong jum dar. Jơnum tum pơƀut rơbêh kơ 17.000 čô mơnuih gum hrom, amăng anun hmâo rơbêh kơ 10.000 čô mơnuih pơplông pơ ala brơi 63 bôh tơring čar, ƀôn prong hăng khul ling tơhan, pơplông 43 mơta tơlơi pơplông 942 bôh yôm, hăng jing tal jơnum hmâo mrô prong hloh amăng gru grua. Hơdôm mơnuih pơplông 933 per miđai. Pơđut jơnum, Grŭp Hà Nội hmâo mă pri mrô sa gah grŭp hăng 475 bôh miđai, amăng anun hmâo 175 bôh miđai; Grŭp ƀôn prong Hồ Chí Minh dăp tal 2 hăng 128 bôh miđai; dŏng tal 3 lĕ Grŭp gah Khul ling tơhan hăng 90 bôh miđai ia mah. Amăng tal pơplông, hmâo abih bang 53 pri gah dêh čar hăng 96 pri amăng tal jơnum dưi hmâo mă.

 Tơdơi kơ truh kih mơng SEA Games 31, Jơnum pơplông bơkơjăp drơi jăn đơ đam dêh čar jing tal pioh pơsit abih bang bruă bơkơjăp drơi jăn amăng đơ đam dêh čar. Jơnum ăt lĕ mông hyu hơduah ĕp mơnuih rơgơi phrâo kơ bruă bơkơjăp drơi jăn Việt Nam prăp lui gum hrom hơdôm pri pơplông jar kơmar pơ̆ anăp anai, ƀơi anăp lĕ tal SEA Games 32 dưi pơphun ƀơi dêh čar Kur amăng blan 5/2023.

7-Tal đă boh lông jar kmar 2022 (World Cup 2022) pơphun ƀơi sa boh dêh čar đăo Islam kual Trung Đông hăng Lionel Messi hrŏm hăng Argentina mă cup

Tal pơplông đă boh lông jar kmar 2022 (World Cup 2022) pơphun ƀơi Qatar dong mơng lơ 20/11 truh lơ 18/12/2022 hăng lu tơlơi yôm pơđŏm glăi: Tal blung a World Cup pơphun ƀơi sa boh dêh čar đăo Islam kual Trung Đông, tal blung a mơng đưm hlâo, tal pơplông đă boh lông jar kmar pơphun amăng bơyan puih plih hĭ bơyan phang; tal blung a Morocco - sa amăng hơdôm boh dêh čar kual Ơi jŭ mut amăng amăng 4 grup kơtang. Tal pơplông rơnuč lăng mơ-ak hloh mơng đưm hlâo kơplah wah Prang- Argentina, anai lĕ pơdah tơlơi yôm phăn hloh. Tơdơi kơ lu thun dŏ tơguăn, tuč rơnuč đĭ mă Cup World Cup 2022. Messi hơmâo ha thun 2022 truh kih hloh mơng ñu gap grup đăo boh lông dêh čar hăng 18 wŏt đă mut. Kơnong World Cup 2022, Messi hơmâo 7 wŏt đă mut. Messi hơmâo mă pri prong hloh mơ̆ sa čô mơnuih đă boh lông dưi mă.

8-Olympic bơyan puih thun 2022 dưi pơphun tui hơdră “boh blôm” đôč

Olympic bơyan puih lĕ bruă ngă ăt prong mơ̆n ƀơi rŏng lŏn tơnah blung a pơphun amăng thun 2022. Dêh čar Khač lĕ dêh čar pô pơphun tal pơplông prong thun anai. Tơlơi pơplông pơphun amăng lơ 4/2/2022 ƀơi tơdron čưng boh lông hruh čĭm, plơi prong Bắc Kinh. Anai lĕ, Olympic bơyan puih blung a dưi pơphun ƀơi dêh čar Khač. Biă mă ñu, Bắc Kinh jing ƀôn prong blung a amăng gru čih pioh Olympic bơyan puih thun 2022, dưi hơmâo dêh čar anai pơphun tui hơdră anăn boh dŭng blôm, budah bơrơboh kah hăng pơplông Olympic Tokyo thun 2020 kiăng pơhlôm tơlơi rơnuk rơnua kơ ƀing nao pơplông hăng pơplông gêh găl. Ƀơi Olympic anai, grup dêh čar Na Uy jing grup dưi hĭ mrô 1 hơmâo 16 miđai ia mah. Dong tal dua lĕ grup dêh čar Đức hơmâo 12 miđai ia mah. Sa tơlơi hling hlang prong  mơ̆ng Olympic bơyan puih anai grup dêh čar Khač hơmâo găn rơgao hĭ grup mơ̆ng dêh čar Mi, anun yap dêh čar mrô 3 hơmâo mă pri 9 miđai ia mah, 4 miđai ia prăk hăng 2 miđai ia kông.

9. Pơplông pơrơguăt drơi jăn kual ASIA ( ASIAD) tal 19 pơhrơ̆i hĭ yua klin Covid 19

Pơplông pơrơguăt drơi jăn kual ASIA (ASIAD) tal 19 jing sa amăng hơdôm tơlơi pơplông pơrơguăt drơi jăn prong hloh kual ASIA. Bruă ngă anai, pơphun ƀơi ƀôn prong Hàng Châu, dêh čar Khač  mơ̆ng lơ 10-25/9 thun anai. Khă hnun, lơ 6/5, Khul khua mua pơphun Olympic ASIA (OCA) hơmâo pơsit brơi lui hĭ ASIAD 2022 yua kơ klin Covid 19 kraih đơi ƀơi dêh čar Khač hăng pơplông tal anai či pơphun glăi dơ̆ng ƀơi Hàng Châu, dêh čar Khač amăng thun tơdơi. Hrơi blan pơphun pơplông him lăng mơ̆ng lơ 23/9 truh lơ 8/10/2023.

ASIAD thun 2023 lĕ tal pơplông pơrơguăt drơi jăn kual ASIA tal 19 mơ̆ng gru phun čih pioh. Anai lĕ tal pơplông pơrơguăt drơi jăn prong hloh dong tal dua, kơnong anet hloh kơ tal pơplông Olympic bơyan pơdơi prong đôč. Anai lĕ, tal klâo dêh čar Khač pơphun pơplông ASIAD, tơdơi kơ gơñu pơphun pơplông djơh hăng anai amăng thun 1990 hăng 2010.

10-Roger Federer pôr pơthâo pơdơi bruă yơh, Rafael Nadal glăm bruă kơ khul dưi hloh anăn Grand Slam tal 22

Pơmin dah ƀu anăm tah, yua bưp lu tơlơi tơnap tap đơi lu thun ƀiă laih, Rafael Nadal ăt dŏ djă hnong đôč tơlơi kơtang amăng thun 2022 hăng hơmâo tŭ mă tơlơi bơni yôm anăn Grand Slam ƀơi dêh čar Australia hăng Prang. Boh tơhnal anai, djru kơ ñu hơmâo 22 mơta anăn apah bơni Grand Slam amăng bruă ñu ngă. Anai lĕ, mrô apah bơni lu hloh mơ̆ng pô pah tennis rŏng lŏn tơnah. Lơ̆m anun, kơplah wah blan 9 thun anai, pô pah tennis hmư̆ hing  Roger Federer pôr pơthâo pơdơi yơh bruă pơplông lơ̆m ñu 41 thun. Pô pah tennis hơmâo pơplông rơbêh 1.500 wơ̆t amăng 24 thun. Federer pơđut rơbêh 20 thun pơplông hăng hơmâo 103 mơta tơlơi apah bơni, 310 rơwang hrơi tơjuh pô dưi mrô 1 na nao rŏng lŏn tơnah, amăng anun na nao amăng 237 wơ̆t hrơi tơjuh ñu soh dưi hĭ.

Pô pah tennis  rơgơi thun tơkeng 1981 pô ba akŏ ƀiă hơmâo 20 Grand Slam. Ñu hơmâo mă pri prong hloh 8 wơ̆t pơplông Wimblemdon, 6 pri apah bơni tal pơplông Australian Open, djă bong pô dưi na nao 5 wơ̆t mơta pơplông ƀơi dêh čar Mi pok pơhư prong hăng tŭ mă pri anăn Roland Garros thun 2009. Federer ăt hơmâo mă 6 pri hing ang ATP World Tour Finals, miđai ia prăk pah hơjăn đah rơkơi Olympic thun 2012 hăng miđai ia mah krop dua čô đah rơkơi pah tennis Olympic thun 2008.

Tal pơplông sit nik tal rơnuč Roger Federer nao pơplông krop dua čô hrom hăng Rafael Nadal tal pơplông tơlơi ia rơgơi kơtang hăng Jack Sock hăng Frances Tiafoe ƀơi anih pơplông mă pri Laver Cup thun 2022 pơphun amăng rơnuč blan 9 thun anai.