Lơ 7/4, Gơnong bruă pơtô pơhrăm tơring čar Điện Biên hmâo pơphun pơdah tơlơi adôh suang ƀơi jơlan plơi prong mơ̆ng čơđai sang hră, ƀing hrăm gưl dlông. Anai lĕ bruă mă sit nik čơkă mơ-ak hơdor glăi 70 thun hrơi tlaih rơngai Điện Biên Phủ. Jơlan hơdră pơdah ha amăng plĕ ƀơi 4 anih anom: tơdrŏn lak 7/5, tơdrŏn lak plơi prong Điện Biên Phủ, lan jơnum ngă lơphet hăng lan pơdŏng gong kut tlaih rơngai Điện Biên Phủ.

Gơnong bruă pơtô pơhrăm tơring čar Điện Biên hmâo iâo pơhrui 11 bôh anom, hăng rơbêh kơ 2.200 čô čơđai sang hră, ƀing hrăm gưl dlông gum hrŏm pơdah rơbêh kơ 33 mơta tơlơi adôh suang, hăng hơdôm tơlơi suang xèo, suang tơlơi suang đưm djă jă gru gru phiăn juăt đưm djop djuai ania kah hăng Thái, Hmông, Lao... hrŏm hăng hơdôm tơlơi suang ƀuh pơsôh hloh, kơjăp drơi jăn. Hơdôm tơlơi adôh suang hmâo pơdah tui hơdră lăng nao rai mơ̆ng ataih, pơplih nao rai. Jơlan hơdră pioh pơgang hăng pơlar tơlơi adôh suang đưm hăng hơdôm tơlơi yun suang ƀơi jơlan plơi prong amăng ƀing čơđai sang hră, ƀing hrăm gưl dlông; djă pioh bôh thâo phiăn juăt neh wa djuai ania ƀiă tơring čar Điện Biên. Biă ñu lĕ lar hyu gru rup Điện Biên truh hăng gơyut gơyâo ƀơi djop anih, pơtrut pơđĭ kyar bruă tuai čuă ngui plơi pla./.