Dơ̆ng mơ̆ng anet A Thu hor biă mă hmư̆ gông brô̆, ting ning, kơni djuai ania pô. Ñu juăt mut hrŏm phung adoh suang amăng plơi, hrăm tui tơlơi thâo pĕ gông, raih ting ning hăng gông brô̆ pơkŏn mơ̆ng djuai ania pô. Sa amăng hơdôm bruă ñu ngă lĕ hyu ĕp, djă pioh, pơkra ming glăi gông brô̆ hăng pơtâo, jing djuai ania gông ƀudah čing pơtâo mơ̆ng đưm đă amăng kual Dap Kơdư. Ñu pioh lu thun hyu ĕp, kơsem min, atông boh pơtâo hmư̆ jua mơñi hiam laih anun dăp glăi anet prong akŏ klôn kiăng jing sa ring čing, gông pioh atông djop jua er mơñi tui tơlơi adoh. Ƀu pơdơi dơ̆ anun ôh, A Thu dŏ pơčeh phrâo, lir hơbit hring glăi djop khul tơlô̆ pơtâo kiăng jing sa ring atông, hơmâo djop jua er tơlơi adoh, atông đĭ pơhưč pran jua lu mơnuih hor kơ tơlơi adoh nao pơhmư̆. Ñu brơi thâo:

“Kâo hyu hrăm lu anih, kâo ƀuh bruă pơkra ming laih anun pĕ ngui ting ning gông brô̆, atông čing ring hơgor suang arap mơak biă mă. Ƀuh arăng pơkra ming gông brô̆ rơgơi biă mă, mơ̆ng anun kâo kiăng hrăm, kơsem min pơkra tui hăng atông čing, ngă čing hring pơtâo, pơkra đing pơng, Tơrưng.....Amăng boh akŏ kâo dŏ pơmin lĕ, gơñu thâo pơkra, ta ăt thâo mơ̆n pơkra, kâo gir run pơkra hăng pơtô ba mơnuih ƀôn sang hrăm ăt thâo mơ̆n”.

Tơlơi thâo hluh dơlăm kơ rơnoh yom bruă djă pioh gru grua hiam đưm, mơnuih kơhnăk A Thu pioh lu mông hăng tơlơi kiăng mơ̆ng ñu pơtô glăi kơ ƀing ană amôn čơđai muai. Ñu ƀu kơnong pơtô brơi hơdră pĕ, ngui, pĕ gông atông brô̆ đôč ôh, dŏ ră ruai glăi phun tơdŭ, anŏ hơmâo, gru hiam mơ̆ng djop mơta gông brô̆, kiăo tui er tơlơi adoh, yŭ jua mơñi mơ̆ng gông brô̆ đưm. Yua kơ anun, lu hlăk ai tơdăm dra amăng plơi hrăm hăng djă pioh gru grua hiam, pơlar tui tơlơi adoh đưm djuai ania Sedang. Mơnuih kơhnăk A Thu hok mơak brơi thâo:

"Ƀing čơđai hrăm pĕ gông gơñu ƀuh mơak biă mă lơ̆m kâo pơtô brơi, laih anun nao pơplông pơ tơring glông, tơring čar, ƀing gơñu mơak biă mă, dưi pơdah thâo tơlơi hor mơak, pĕ gông reh ting ning djuai ania pô, atông čing suang arap laih anun bưp gơyut gơyâo hrăm nao rai tơdruă. Lơ̆m nao pơplông thâo, kâo brơi gơñu nao pơplông hrŏm ƀing gơñu lêng kơ mơak soh”.

Ƀơi plơi Đak Rôya, ñu akŏ pơjing grup atông čing, suang arap hơmâo 30 čô ding kơna, juăt hyu pơdah amăng tơring glông hăng tơring čar. Hrŏm hăng anun, mơnuih kơhnăk A Thu dŏ pơkra ming hăng pơdah brơi arăng sem, ĕp lăng ñu  pơkra gông hăng ale djrao kah hăng gông ting ning đưm, đing pơng:

“Dơ̆ng mơ̆ng dŏ muai kâo kiăo tui ƀing mơnuih kơhnăk atông čing, hmư̆ gơñu atông kâo mơak biă mă. Mơ̆ng anun gir hrăm tui hơdră arăng atông čing. Truh ră anai, kâo pơtô glăi kơ ană amôn, cơđai sang hră dŏ hrăm ƀơi hơdôm boh sang hră amăng tơring glông, amăng să laih anun amăng plơi pla. Tơ tă anai, kâo pơtô brơi lu sang hră, sang hră kơnuk kơna čem rông hrăm gưl II, djop plơi pla amăng să, truh pơ tơring glông pơkŏn dơ̆ng. Kâo ƀuh mơak biă mă lơ̆m hmư̆ jua čing arăng atông đĭ, yua kâo pơtô ba, čing hơgor lĕ gơnam gru grua hiam ngă mơak pran jua djuai ania anun ta khom djă pioh”.

Hăng tơlơi thâo laih anun pran jua hur har khăp kơ tơlơi adoh suang, pĕ gông brô̆, A Thu arăng juăt jak iâu ñu hyu pơdah amăng mông ngui ngor pơplông gah gru grua hiam amăng tơring čar hăng gah rơngiao tơring čar. Lu tơlơi pơdah thâo pĕ gông brô̆ mơ̆ng ñu ngă kơ mơnuih hmư̆ hăng sem mơak soh, thâo hluh tong ten gru grua hiam djuai ania Sedang. Ñu yơh anŏ pơ-ư ang kơ plơi Đak Rôya, tơring glông Đak Tô, Kon Tum, sa tơlơi ƀuh mơnuih hor kơ gru grua đưm djuai ania, dŏ djă pioh ăt mut tơma hrŏm hăng gru grua phrâo rơnuk anai. Yua tơlơi thâo rơgơi mơ̆ng ñu, A Thu gir run mă bruă ƀu thâo gleh ôh, Kơnuk kơna apah bơni kơ ñu anăn Nghệ nhân ưu tú, mơnuih kơhnâo kơhnăk gru đưm rơgơi.

"Dơ̆ng mơ̆ng kâo pơtô glăi kơ ană plơi pla atông čing, ră anai kơnuk kơna ngă hră pơsit kâo jing mơnuih kơhnăk gru đưm thun 2019. Mơ̆ng anun truh ră anai kâo pơtô ba lu plơi pla. Sit mơ̆n lu hră arăng jak iâu, hră apah bơni yua hơmâo pơgôp pran jua pơtô ba atông čing”.

Amăng 5 thun laih rơgao, mơnuih kơhnăk A Thu hơmâo pơtô ba lu mơnuih thâo atông čing, abih bang hơmâo mơ̆n 25 boh anih, pơtô brơi 300 čô mơnuih hrăm, wơ̆t ƀing čơđai sang hră ƀơi hơdôm tơring glông Đak Tô, Sa Thầy, Đak Glei, Tu Mrông. Laih dơ̆ng pơtô ba 8 čô mơnuih kơhnăk gru grua đưm thâo tul, tia jua čing. Ñu pơmin, ngă hiư̆m pă djru ba, pơtô glăi djop tơlơi ñu thâo, tơlơi tom găn rơgao brơi kơ lu mơnuih thâo djă pioh, gum hrŏm bruă mă thâo gum pơgôp hăng pơđĭ kyar.

“Kâo ƀuh mơnuih mơnam ta rơnuk anai pơđĭ kyar tui laih. Sit mơ̆n kơñ pơgi ni anăp, kâo amra gir lu hloh kiăng djă pioh gru grua hiam đưm djuai ania, tơlơi phiăn juăt hiam djuai ania ta pô. Hơgĕt tơlơi kâo thâo kâo amra pơtô ba, pơčrâo brơi kơ mơnuih ƀôn sang, hlơi kiăng hrăm pĕ gông atông brô̆ djuai ania ta pô".

Mơnuih kơhnăk gru grua hiam đưm djuai ania Sedang A Thu jing sa čô mơnuih lăp pơpŭ, ba gru bơngač kơ tơlơi pơmin pran jua thâo khăp djă pioh gru grua hiam đưm djuai ania pô kiăng pơlar tui. Hơdôm tơlơi djru, pran jua pơgôp hrŏm mơ̆ng ñu ƀu kơnong djru djuai ania Sedang đôč ôh, djă pioh rơnoh yom gru gruam hiam đưm, dŏ pơmut hrŏm anŏ hiam klă gru grua hiam djop djuai ania amăng Việt Nam ta hnun mơ̆n.