Amăng adai či tlam ƀơi ƀôn Kon Hring, să Čư̆ Mgar, tơring čar Dak Lak, yă Nŏ Đi, 68 thun dŏ ƀơi tơpur apui hlăk hơtŭk riă prăp lui asơi añăm tlam mơmŏt kơ abih bang amăng sang anŏ huă ƀong. Tlam anun yă Nŏ Đi hơtŭk añăm dret pơtơi ate hăng hla yao ngă tơpung, dret pơtơi set koh mơ̆ng glai. Yă Nŏ Đi brơi thâo, hăng djuai ania Sedang, djop mơta amăng phun pơtơi ƀu hơmâo anŏ lui hĭ ôh, tŭ yua kơ ană mơnuih soh. Dret pơtơi koh hak mă kơnong dret mơda kô̆ pioh čơkă ngă añăm ƀong jơman, hơtŭk riă hăng tơpung hla yao ƀâo bơngưi hloh, ƀâo mơnâo hiam amăng glai klô.

Dret pơtơi jơman hloh juăt koh amăng bơyan phang, Arăng hyu amăng glai koh ba dret pơtơi set, pơtơi ta pla pơtơi lao tŭ mơ̆n klă soh ƀong. Arăng pơtơi prong man ƀrô aka ƀu hroh, aka ƀu tơbiă bơmung ôh. Koh phun pơtơi, hak kơđuh gah rơngiao tơl ƀuh dret kô̆ amăng lăm, ruah mă črăn mơda hloh trơ̆i ba glăi, čơkă reh pơjing añăm dret, hlâo kơ hơtŭk, arăng mă yua gai uă mreo čơkul ƀudah tơgul hĭ suai ñu kiăng rơgoh dret pơtơi ƀong huă huăi đôm tơgơi.

Yă Nŏ Đi lăi lĕ, kiăng hơmâo añăm tơpung ate dret pơtơi koh mơ̆ng glai jơman hloh, khom hơmâo tơpung ngă mơ̆ng kơđuh kyâo arăng kyâo sồi, kiăng añăm ate ñu čơkô̆ hloh dưm akuăilu ƀiă hăng hla yao ƀudah kơđuh kyâo sồi ƀiă hơjai hăng ia ngă tơpung khŭ:

“Giong ta mă prăp lui djop dret pơtơi set, ba čơkă reh añĕ, mă akuăi hăng kơđuh kyâo sồi prăp laih hlâo tul giong lŭk hăng dret pơtơi laih anun reh hĭ añĕ, tul hrŏm lik ƀhŭk. Giong tul săn abih dưm amăng gŏ, tuh nao ia gôm abih dret pơtơi, giong anun hrŏng điư ƀhu thu ia ƀơi pơ-iă yang hrơi pơčrang. Đưm adih arăng mă črŏ dưm amăng đing brông ƀhu pơ rơngiao adai pơđiă.

Giong ƀhu tui anun, añăm dret pơtơi, arăng mă djet thu ia laih anun lŭk hăng tơpung akuăi lŭk hrŏm. Ia djet mă mơ̆ng dret pơtơi lĕ pioh tuh glăi amăng gŏ hơtŭk riă, laih hơtŭk amăng gŏ ia hlor pơdŏk laih, dưm nâo yơh dret pơtơi. Tơdah hơmâo areng, hơdang, akan mă mơ̆ng ia čroh hnoh ƀudah añăm mơnong dưm hrŏm. Iong anun dưm nao rơsun, pơhăng, hla eč, hla khom, añăm ƀâo kiăng ƀâo bơngưi, hơtŭk ră kuơr nao rai bơkơnar kiăng añăm ate huăi cơkô̆ hĭ kiăng mơ-ia ƀơƀiă laih anun kiăng huăi khiă. Tơl tơpung ate tơsă anăm dret ăt tơsă ih laih, yong gŏ sô̆ ba ƀong yơh”.

Hăng djuai ania Sedang lĕ, añăm dret pơtơi ƀu kơnong mơnong ƀong, añăm hơtŭk riă amăng sang anŏ đôč ôh. Yua hơdră pơjing lu črăn, mơ̆ng bruă hyu koh pơtơi set amăng glai ba glăi, truh kơ bruă kiăng hơmâo hrơi mông ƀiă, čơkiă dret, kor mă suai, truh kơ reh añăm, tul amăng rơsung, ƀhu ƀơi pơđiă, dưm amăng đing brông laih anun djet mă ia, lŭk hăngtơpung hla yâo ƀudah kơđu phunkyâo sồi, anun ƀong jơman biă mă, hơtŭk kơ sang anŏ hăng riă hrŏm pơjing mơnong ƀong huă amăng plơi pla mông ngui ngor ngă yang plơi.

Ơi A Hvâng thun anai 71 thun dŏ ƀơi ƀôn Kon Hring brơi thâo pơpŭ biă mă anŏ hơgĕt lŏn glai yang brơi kơ ană mơnuih ta, djuai ania Sedang thâo pơkra ming djơ̆ lăp añăm dret pơtơi, mă kơnong djop ƀong, ƀu koh lui raih čraih lui tă tăn ôh, kiăng pơkom pioh phun pơtơi amăng glai čăt đĭ lar tui lu či koh ƀong hrơi tơdơi dơ̆ng. Kơnong amăng mông ngă yang plơi, hrơi mơak prong djuai ania Sedang juăt hyu ĕp koh phun pơtơi set ma dret ba glăi hơtŭk ƀong jơman.

“Rim wơ̆t plơi pla pơphun ngă yang ngui ngor, huă asơi hle, añăm ate hăng dret pơtơi ƀu kơƀah ôh, yua añăm ƀong jơman, boh nik ñu hơtŭk riă hăng hơdang, areng, arong ia, akan hyu yâo mă amăng čroh hnoh, djop pô mơtam hor ƀong. Mơnuih ƀôn sang ƀong añăm anai mơñum rah tơpai jơman biă mă, yua añăm dret añăm pơkra ming mă amăng plơi pla mơnâo ƀâo bơngưi phuang. Sang anŏ gơmơi juăt ƀong añăm anai, mơnuih ƀôn sang ieo gah sit ƀâo mơnâo ñu nao pơ sang rơkâ sô̆ ba glăi ƀong hrŏm”.

Ăt juăt ate añăm dret pơtơi djơh hăng anai, yă H’Čel, 68 thun dŏ ƀơi ƀôn Kon Hring, să Čư̆ Mgar, tơring čar Dak Lak, brơi thâo, rim čô sit ate añăm dret pơtơi amra dưm lu mơta hla ƀâo bơngưi kiăng jơman hloh, ñu lăi:

“Sit bơyan hơpuă yuă pơdai, dŏ sang phrâo, pơdŏ rơkơi bơnai ƀing gơmơi juăt hơtŭk añăm tơpung ate añăm dret phun pơtơi set. Anai lĕ añăm ƀong jơman hyu tul tơpung braih akuăi lŭk hrŏm hla yao, kơđuh kyâo samơ̆ ƀâo bơngưi, ƀong jơman biă mă dưm pơhang hra, añăm ƀâo hla khom, eč Jarai đưm jơman biă mă”.

Añăm dret mơ̆ng phun pơtơi set amăng glai, djuai ania Sedang juăt hơtŭk riă ate tơpung ñu jơman pơhưč lu mơnuih hor ƀong biă mă, yua ñu mơmih, ƀăt jơman djơ̆ hăng pran jua tơlơi hơdip rim hrơi, dŏ amăng plơi pla glai klô, pơtrut ai hơtai mă bruă mơak hlak. Amăng tơlơi hơdip phrâo ră anai, añăm ƀong djơh hăng anai ăt ƀu lui ôh, ia jơman, mơnâo ƀâo bơngưi ñu ăt dŏ hrŏm amăng mông huă ƀong amăng sang anŏ, hrơi ngă yang ngui ngor amăng plơi kah hăng tơlơi hơdip rơnang, luă gŭ, khăp pap tơdruă mơ̆ng mơnuih ƀôn sang djuai ania Sedang tong krah lŏn mơnai glai klô čư̆ siăng kual Dap Kơdư hing ang.