Mơng đưm hlâo, hơdip jê̆ giăm hăng glai rưng anun jing gơnam ƀong hăng wơ̆t hăng phĭ hơmâo djuai ania Êđê mơhao ƀong biă. Añăm ƀlê jing añăm hla rok djuai ania Êđê juăt ƀong, jing añăm jơman, wơ̆t hăng djuai jrao yôm biă mă.

Amăng bơyan phang, añăm ƀlê juăt čă jing ha ƀut ha ƀut ter guai amăng glai, pơ hmua. Amăng bơyan hơjăn, añăm ƀlê ƀu jơman đơi dong tah. Kiăng pơkra añăm pĕ mơng glai, djuai ania Êđê juăt pĕ hla mơda, kơđŏi mă tơdŭ đôč, giong anun rao hơdjă, hơbai tui hluai či ƀong. Añăm ƀlê phĭ phit phit, ƀâo hiam biă. Amai H’Lip Kƀuôr, dŏ ƀơi Buôn Yao, să Ea Tul, tơring glông Čư̆ M’gar, tơring čar Dak Lăk brơi thâo, añăm ƀlê jing añăm ƀong jê̆ giăm, juăt ƀong laih hăng mơnuih djuai ania Êđê.

“Tơdơi kơ pĕ kâo ƀhu amăng apui, giong mơng anun pleh hla, tơdŭ ñu dưm nao amăng jam. Tơdơi kơ anun ta tul hăng hra ƀô̆ ngot, rơsun glai tul hrŏm hăng añăm ƀlê hlao. Amăng bơyan anai, añăm ƀlê juăt hơmâo neh met wa djă ba ƀong pơ hmua lu biă”.

Mơnuih djuai ania Êđê juăt hơbai añăm ƀlê phara mơn, ƀong mơtah ƀudah hna ia rơmă, hơtuk...Ƀing hlăk ai rơnuk anai juăt pơkra jing añăm ƀong phara dong kah hăng bơrơbua ƀong mơtah hăng ngôt hra, ƀudah hơtuk tut ia măm, sao hăng akan hơtuk, akan krô...Bơ ƀing tha juăt pơkra añăm tơnap ƀiă dong kah hăng ate tơpung, ƀudah pioh nao hla ƀâo hiam mơng djuai ania Êđê dong či hơbai añăm ƀlê. Yă H’Dluê Êban dŏ ƀơi Ƀuôn Hra B, să Ea Tul, tơring glông Čư̆ M’gar, tơring čar Dak Lăk brơi thâo:

“Lơ̆m hơbai añăm anai, ta hơtuk ia bluk ƀơ̆i, giong anun tuh nao ia hơbâo phun pơtơi ƀudah hơbâo rơtă. Tơdơi kơ anun ta buh nao ngôt hra. Truh ia bluk lĕ ta pioh nao añăm ƀlê, pioh nao hơbơi ngu, rơsun glai. Mơng đưm laih, djuai ania Êđê thâo ƀong añăm anai, hơmâo ƀiă đôč mơnuih thâo hơbai tui anai. Lu arăng ƀong mơtah ƀudah hna hăng rơmă...”

Bơ hăng amai H’Zen Ayun, ƀơi ƀuôn Pơr, să Ea Tul, tơring glông Čư̆ M’gar, tơring čar Dak Lăk, ñu ƀu hơbai añăm ia ôh, ñu hma hăng hơdom sao, buh nao ngôt hra kiăng ƀăt jơman hloh. Ñu lăi hơdôm mơta añăm hơmâo pơkra mơng añăm ƀlê anai ƀu kơnong jing añăm ƀong jơman amăng sang anŏ đôč ôh, anai ăt jing sa amăng hơdôm mơta añăm ƀong jơman pioh pŭ kơ tuai rơnguai.

“Kâo hna añăm ƀlê hăng boh trong mơsăm glai, hơdom sao, buh nao hra ngôt, hăng ta pioh aset hă lu tui hluai kơ ta či ƀong. Añăm ƀlê juăt ƀong jơman hloh amăng bơyan phang, bơyan hơjan ăt hơmâo mơn, samơ̆ ñu phĭ ƀal, ƀu hơmâo hiam dong tah. Añăm anai ñu phĭ phit phit, phĭ jơman, ƀâo hiam. Anai jing añăm ƀong jơman mơng djuai ania Êđê”.

Ră anai jai hrơi hơmâo lu mơnuih amuaih ƀong hăng hyu ĕp añăm ƀlê či ƀong, yua dah anai lĕ añăm hla rok jơman, ƀong hơmâo pran. Mah ta pơkra ñu hiư̆m pă tŭ mơn, añăm ƀlê ăt hơmâo anŏ phĭ phĭ yang pơjing ñu mơn. Djuai ania Êđê pơmin, hlơi amuaih ƀong añăm hla rok, boh phĭ amăng glai lĕ mơnuih kơjăp pran, triang kơtang. Hlơi pô ñu ƀong djơ̆ laih añăm phĭ phĭ anai amra hơdor na nao mơtăm yơh.