Phun bơngưi glông mơ̆ng 4 truh kơ 10m, bơnga ayul kô̆, čăt ƀơi lu anih ƀơi kual Dap Kơdư hăng hơdôm boh kual pơkŏn ƀơi Yŭ Dơnung. Phun bơngưi juăt bơnga amăng blan 11 truh blan 2 thun dơi lĕ ñu mơboh. Phun bơngưi dưi pla kiăng pơhrup hiam rah, ƀrô hơmâo anŏ klă kơ drơi jăn, kơ tơlơi suaih pral dong.

Djuai ania Êđê juăt pĕ ƀong hla mơda, truh kơ bơnga, boh ñu mơtăm yơh či hơbai ƀong. Tui hăng mơnŏng ƀong huă mơ̆ng rim kual mơn ta pơkra añăm mơ̆ng bơnga bơngưi ñu phara mơn, djuai ania Êđê Bih ƀơi tơring glông Krông Ana hơbai hrup hăng mơnuih ƀôn sang kual Yŭ Dơnung, anun lĕ hơbai añăm bơngưi pơƀâo akan hơdang. Amai H’Nuah Êban, dŏ ƀơi Ƀuôn Trấp, tơring kual Ƀuôn Trấp, tơring glông Krông Ana, tơring čar Dak Lăk lăi, anai jing añăm juăt ƀong laih, adai rơ-ot thơ hơmâo ƀong añăm phĭ phit phit, hăng, mơmih ƀâo hiam mơ̆ng bơnga bơngưi dong jai jơman hloh.

“Ƀing gơmơi hơbai añăm bơngưi hăng trong phĭ, akan ayun. Plĕ lu pơhăng, rơsun glai, hla eč. Bơnga lĕ ta pleh hĭ atŏng hăng brưi ñu. Hơbai hrŏm trong phĭ lĕ ta plĕ aset đôč trong, samơ̆ ƀu dưi kơƀah pơhăng, hla eč, hăng rơsun glai. Rơngiao kơ hơbai añăm hăng akan ayun”.

Bơ amai H’Rut Niê, dŏ ƀơi ƀuôn Ky, phường Thành Nhất, plơi prong Buôn Ma Thuột, tơring čar Dak Lăk lăi pơthâo añăm bơngưi juăt hơmâo hơbai ƀong lơ̆m nao pĕ kơphê, yua dah ta ĕp amuñ, hơbai amuñ, jơman dong. Djuai phun anai amuñ čăt biă, ta sai pơjeh amăng đang, ƀơi lan sang hai ñu čăt mơn. Phun prong bơnga lu mơn. Ta dưi hơbai tui hluai ta či ƀong yơh, hơtuk tut ia măm, ƀudah hna hăng mơnŏng un, mơnŏng rơmô, ƀudah mơnŏng mơnŭ tŭ mơn, samơ̆ hơmâo lu mơnuih amuaih ƀong hloh lĕ hna hăng akan krô ƀudah akan hơtuk. Amai H’Rut Niê brơi thâo:

“Amăng hơdôm blan adai rơ-ot ƀu dưi kơƀah ôh añăm bơngưi. Kâo juăt pĕ bơnga ñu, rao rơgoh, kơđŏi hĭ atŏng, brưi bơnga ñu, tơdơi kơ anun hna hăng akan se, akan hơtuk, buh ngôt hra, hăng, rơsun glai. Añăm ƀong mơ̆ng djuai ania Êđê gơmơi jơman biă mă lah”.

Amai H’Rut Niê brơi thâo dong, kiăng hơbai añăm bơngưi jơman tui đưm hlâo lĕ ta hna akan se giong ƀơ̆i, giong anun hna bơnga bơngưi tơdơi, truh bơnga tơsă ta plĕ nao akan, buh ngôt hra, tui anun akan ñu rơčăm, hơ-ik, wơ̆t hăng mưn phit phit, mih mih mơ̆ng bơnga bơngưi dong. Rơsun glai jing ƀu dưi kơƀah ôh, ta khŏm hna brơi ñu ƀâo phyŭ hlâo či pioh nao añăm bơngưi.

Hơbai amuñ đôč samơ̆ ƀăt jơman phara, bơnga bơngưi jing añăm juăt ƀong laih hăng djuai ania Êđê. Añăm ƀong anai ngă ta hơdor glăi hrơi adai rơ-ŏt dŏ ƀơi pơpur, ƀong añăm bơngưi phĭ phĭ, mih mih. Ƀu hơmâo yôm hơget ôh samơ̆ lơ̆m hyu pơ ataih hlơi hlơi ăt hơdor soh yơh./.