VOV4.Jarai - Djuai ania Bơnông ƀơi Daklak, Daknông hmâo phiăn juăt hơdip giăm hăng dlai tlô, pơkĕ hrom hăng dlai tlô čư̆ siăng. Hơdôm gơnam yua pioh tơnă hơbai hơdôm gơnam ƀong rim hrơi ăt mă mơng dlai hăng đang hmua soh. Amăng anun, añăm hrong lĕ sa amăng hơdôm gơnam ƀong pha ra mơng djuai ania Bơnông.

Rim tal hyu dlai ƀudah nao ngă đang hmua, djuai ania Bơnông mă yua gơnam hmâo amăng dlai, amăng hmua pioh hơtuk hơbai hơdôm gơnam ƀong. Hơdôm gơnam anun hăng hơdôm gơnam mă yua abih bang mă mơng dlai tlô. Ayong Y Xim Du, ƀơi Ƀuôn Yuk La 1, să Đăk Liêng, tơring glông Lak, tơring čar Daklak brơi thâo:

“Gơnam ƀong mơng djuai ania Bơnông hmâo pơ-hăng phĭ ƀudah ngă añăm mơxăm mơ̆ biă ñu lĕ gơnam ƀong hơ-om ƀudah hơbai. Mơ̆ gơnam hơbai biă ñu hơbai amăng hơdôm đing djrao, pơ-ô, ƀu yua gŏ mŏ pioh hơbai ôh. Añăm hrong lĕ sa amăng hơdôm gơnam ƀong pha ra mơng djuai ania Bơnông”.

Hla biep

Gơnam ngă añăm jơman pha ra hloh mơng añăm hrong lĕ đing pơ-ô hrong mut hơdôm gơnam pioh hrong hlâo kơ dưm hăng dlông apui hơ-om truh kơ ñu tơsă lik. Añăm hla rok hăng hơdôm añăm mơnong hlô leng kơ dưi hơbai amăng đing pơ-ô anun djuai ania Bơnông iâu lĕ Prung. Ayong Y Xim brơi thâo dong:

“Blung a lĕ ta amra prăp lui añăm mơnong hlô ƀudah akan čơhmu krô ƀudah añăm mơnong un, rơmô phang hăng pra apui leng kơ dưi sôh, ñu amra jơman hloh, bơ̆ añăm hla rok lĕ amra pĕ hla biep hăng tơdŭ huai. Kâo koh phun huai hăng lôk mă asar ñu amăng lăm pioh hơbai, ñu hmâo ia phĭ hăng tơdah ta ƀong ñu mih jơman biă. Hla biep lĕ ñu mih, hmâo ƀăt mơng hra hăng ngok laih anun pơhăng dong”.

Añăm hla rok, mơnong hlô, gơnam pơƀâo dưi hrong amăng đing pơ-ô

Tơdơi kơ pĕ añăm hăng rao rơgoh, dưm mut amăng đing pơ-ô, kiă añăm mơnong anơ anet, tơdŭ huai wok anơ anet dưm amăng đing, yua hla pơtơi kăt hĭ ñu hăng dưm hăng dlông apui, mơnuih hơbai amra dô̆ lăng apui hăng dar đing añăm kiăng huăi apui ƀong. Năng ai ñu 30 mơnit tơdơi añăm tơsă amra yua gai kram anet ñeč mut amăng đing. Tuč rơnuč ñu blah đing pơ-ô hăng ƀong. Ayong Y Xim Du lăi pơthâo, lom ƀong añăm anai, mơnuih ƀong amra ƀuh jơman ƀâo hiam pha ra biă.

 “Gơnam ƀong anai nao hrom hăng tơlơi hơdip ƀing Bơnông, ñu lăi nao tơlơi hơdip đưm mơng ƀing gơñu. Gơnam hơbai leng kơ mă mơng dlai tlô anun ñu lăi nao tơlơi hơdip hơnong hmâo mơng ƀing gơñu. Gơnam pioh hơbai leng kơ mă mơng dlai anun ñu lăi nao tơlơi hơdip đưm pran jua nao hrom hăng čư̆ siăng hăng dlai tlô.”

Ayong Y Xim Ndu hăng tuai dêh čar India ƀong añăm hrong amăng đing

Yua anun yơh tơlơi pha ra mơng añăm hrong yơh rim mơnuih Bơnông khă hyu ataih pơ̆ hơpă leng kơ hơdor glăi anô̆ jơman mơng añăm hrong mơng djuai ania pô. Khă ƀu kiăng pơkra tơnap ôh samơ̆ ñu djă jă mơng anô̆ jơman mơng dlai tlô. Añăm hrong pơdah hơdôm gru pha ra tơbiă rai mơng bruă mă, ngă đang hmua, tơlơi hơdip rim hrơi hăng tơlơi dô̆ dŏng ƀong huă hrom hăng dlai tlô mơng djuai ania Bơnông./.

H’ Zawut: Čih – Siu H’ Prăk: Pơblang