Phun pơtơi lĕ phun juăt pla amăng đang hmua hăng tui hluai tơlơi thâo pơčeh mơng rĭm boh kual phun pơtơi dưi hơbai jing hơdôm añăm ƀong jơman phara mơn. Añăm pơluk mơnong mơnŭ hăng phun pơtơi glai hơmâo mơng đưm đă ră hlâo hăng mơnuih djuai ania Êđê. Anai ăt lĕ añăm ƀing pơlir hăng tơlơi hơdip hrŏm hăng glai rưng. Tui tơlơi găn rơgao mơng ơi găn pioh glăi, mơng phun, hơbơi, boh ƀudah bơnga, mơnuih djuai ania Êđê dưi hơbai jing hơdôm añăm ƀing jơman phara. Mơnuih djuai ania Êđê hơmâo hơdôm añăm ƀong mơng boh rơmông pơluk hăng hơbai hrŏm hăng trong. Añăm anai hơbai ăt amuñ mơn. Sit biă ñu añăm pơluk hrŏm hăng phun pơtơi glai hrŏm mơnong mơnŭ juăt pơkra tong ten ƀiă, ƀing mơnuih tơnă hơbai kiăng thâo kah mơng dưi ngok hră, pơhăng plang gap ƀrô, sit biă ñu ngă hiưm pă kiăng phun pơtơi dŏ hiam hăng ƀong juăt ƀăt jơman mơn. Kiăng hơmâo añăm pơluk jơman, djuai ania Êđê juăt koh mă phun pơtơi glai giăm čroh ia, phun ñu tơdơi anun lok hĭ.

 Amai H’Lyna Niê, dŏ ƀơi ƀuôn Sah B, să Ea Tul, tơring glông Čư̆ Mgar, tơring čar Dak Lak brơi thâo, mơng đưm đă ră hlâo mơnuih djuai ania Êđê brơi thâo phun pơtơi hơmâo lu ia amra ngă hiam amăng drơi jăn, hơmâo lu añăm ƀong mơng phun pơtơi anun lĕ hơte tơpung, hơbai hăng añăm trong, ƀong mơtah hlao…Bơ añăm pơtơi pơluk hăng mơnong mơnŭ arăng lăng lĕ añăm ƀong jơman mơng plơi pla.

“Añăm pơluk phun pơtơi hơmâo djop ngok hră pơhăng kah jơman. Mơnong mơnŭ arăng om tơsă, bơ kơčăng mă mơnong lui hĭ tơlang hăng čoh brơi pơsăn. Tơdơi anun djet hĭ abih ia amăng phun pơtơi. Laih anun tul pơhăng, dưm ngok hra, rơsun, hla kăt. Añăm anai ƀong jơman biă mă.”

Añăm ƀong anai juăt ƀong hrŏm hăng asơi pơ-iă, ƀudah ƀong hơjăn. Ia mơmih mơng phun pơtơi mut hrŏm pơhăng ƀong hơher jơman. Añăm mơnong mơnŭ pơluk hrŏm phun pơtơi mơng djuai ania Êđê phara hăng añăm mơnong mơnŭ pơluk hrŏm phun pơtơi ƀơi hơdôm kual yua hơmâo ia ƀâo mơgưi mơng hla kăt, rơsun hăng ƀong ik wŏt boh rơngu ngă kơ tuai hor biă mă. Mah tơlơi hơdip pơplih yơh, ră anai hơmâo lu gơnam pơluk hrŏm amăng añăm ƀong mơng djuai ania Êđê. Samơ̆, añăm mơnong mơnŭ pơluk hrŏm phun pơtơi ăt juăt ƀong, jing añăm ƀong arăng hor biă mă amăng rĭm boh sang anŏ djuai ania Êđê.

Amai H’Lyna Niê, dŏ ƀơi ƀuôn Sah B, să Ea Tul, tơring glông Čư̆ Mgar, tơring čar Dak Lak brơi thâo dong, ră anai lu sang anŏ dŏ pla phun pơtơi glai amăng đang hmua kiăng kơ hơmâo añăm ƀong brơi sang anŏ. Anai lĕ añăm ƀong juăt yua amăng hơdôm hrơi ngui mơ-ak amăng sang anŏ hăng plơi pla yua gơnam ƀong juăt hơmâo mơtăm, amuñ hơbai hăng ƀing jơman.

“Añăm ƀong anai ƀu kơƀah ôh amăng plơi pla. Rĭm boh sang anŏ tơdah hơmâo tơlơi ngui ngor mơ-ak ƀudah čơkă tuai, adơi ayong mơng ataih rai čuă, mơnuih djuai ania Êđê juăt čuh mơnŭ kiăng čơkă tuai, pơdah pran kiăng khăp hăng adơi ayong. Lơm anun, tơkai mơnŭ ƀudah kơčăng amra ngă añăm phara, ƀu lui ôh. Lơm pơkra añăm arăng lui hĭ tơlang yua anun ƀing tha rơma hăng čơđai lêng kơ dưi ƀong soh”.

Añăm mơnong mơnŭ pơluk hăng phun pơtơi glai mơng djuai ania Êđê amuñ pơkra, anai lĕ añăm ƀong mơng ană plơi pla ngă kơ hlơi hlơi thơ lơ̆m ƀong djơ̆ ha wŏt amra hơdor na nao mơtăm yơh./.