Añăm pong jing añăm ta hyu pĕ ñu amuñ mơn, juăt čăt ƀơi čroh hnoh, ƀơi anih lŏn drjưh. Neh met wa djuai ania Bahnar pĕ añăm pong rim hrơi rim blan hơmâo soh yơh. Añăm pong juăt pĕ mơguah, lơ̆m ia ngôm dŏ đom ƀơi hla, ƀong ñu mơsăm mơsăm, rơ-ơ̆. Jơman hloh lơ̆m ta pĕ kơdŭ mơda ñu. Añăm pong lơ̆m pĕ ta rao djel, brơi ƀu hơdjă ia. Yă Y Giang dŏ pơ Plei Tơngia, phương Đăk Cấm, tơring čar Quảng Ngãi pơtô brơi ate añăm pong: “Añăm pong ta pĕ mơguah mơtăm, lơ̆m ƀơi hla dŏ ia ngôm, hnun kah mơ̆ng hơmâo anŏ mơsăm jơman, hla dŏ mơtah ƀong jơman hloh mơn. Tơpung ta tul ƀudah nao uă hăng măi tŭ mơn, tơguan brơi ia blôk, giong anun kuor tơpung plĕ nao rơnang amăng gô̆, kuor nao kuor rai kah ia ñu huăi khŭ, hnun kah tơpung mơ̆ng jơman”.

Tơpung ate lĕ ta juăt mă tơpung braih ƀudah tơpung kơtor. Lơ̆m ate, ta drong gŏ amăng apui, tơguan ia blôk lĕ ta plĕ tơpung, plĕ tơpung  rah kuor rah hŭi tơpung ñu dŏ đom kuit ƀu jơman ôh. Tơdơi kơ anun kah mơ̆ng plĕ nao añăm pong, buh ngôt hra dong kiăng ƀăt. Tui hluai kơ sang anŏ mơn, đa ate tom akan ayun, abao, mơnŏng hơmâo mơn, samơ̆ añăm tơpung ate añăm pong đôč yơh arăng juăt ƀong, ƀu kiăng mơnong akan hơget ôh.

Tơlơi yom hloh lĕ añăm pong ate nu hơmâo anŏ ƀăt ƀơ ƀiă, ƀong amuñ mơn. Yă Y Lat, Plei Tơngia, phương Đăk Cấm, tơring čar Quảng Ngãi brơi thâo: “Anăm pong ate jing añăm juăt ƀong laih mơ̆ng djuai ania Bahnar mơ̆ng đưm laih. Añă, ƀong anai kơnong kiăng añăm pong, aset tơpung, hnun ta hơmâo laih añăm ƀong jơman. Tơdah rơyă tom mơnŏng akan jing jơman hloh. Ta ate khŏm rơnang, ƀu dưi hăt ôh, kuor nao kuor rai na nao kah mơ̆ng jơman”.

Amăng tơlơi hơdip mơnuih ƀôn sang, añăm pong ate juăt hơmâo amăng mông huă asơi añăm tơdơi kơ glăi mơ̆ng hmua, ƀudah amăng hrơi plơi pla ngui ngor. Añăm ate hơmâo dưm tong krah sang, abih bang dŏ hñum jum dar, ƀong rah, ră ruai rah. Añăm pong ate tơpung ƀu djơ̆ ƀong kiăng kơ hơmâo pran, kiăng kơ trơi hlung đôč ôh, ăt ngă kjăp tui tơlơi khăp ƀu-eng sang anŏ, gơyut gơyâo, kơnung djuai.

Rơnuk anai, mah tơlơi hơdip neh met wa Bahnar pơplih tui laih, lu añăm ƀong phrâo, samơ̆ añăm pong ate ăt hơmâo ƀong na nao mơn kah hăng gru grua tơlơi phiăn ƀu thâo wơr./.