Ngă yang ƀhet tơngia lĕ sa amăng hơdôm tơlơi ngă yang yôm phăn mơng mơnuih djuai ania ƀiă kual Dap kơdư. Anai lĕ tơlơi kơđŏm glăi rơwang yak nao amăng tơlơi hơdip kiăng mơng anun yang rơbang, sang anŏ hăng ană plơi pla amra tŭ yap jing sa ding kơna phrâo, sa čô mơnuih phrâo amăng plơi pla. Nai prin tha Bùi Ngọc Quang, kơ-iăng Khua sang djă pioh gru grua djuai ania Việt Nam brơi thâo:

“Djop djuai ania ƀơi kual Dap kơdư lêng kơ ngă yang ƀhet tơngia brơi čơđai. Tơdơi kơ tơkeng rai, arăng pơmĭ aka truh ha thun ƀing čơđai aka ƀu thâo pơhiăp, lăng kơnong kar hăng ană nge đôč mơ̆ tơdah kiăng jing sa čô mơnuih amăng plơi pla, pô čơđai anai kiăng pơphun ngă yang tui gru grua ană plơi pla. Hăng mơnuih kual Dap kơdư, sa čô mơnuih, sa boh sang anŏ hăng ană plơi pla lĕ pơlir kjăp phik, ƀu dưi pơčlah. Yua anun ngă yang ƀhet tơngia mah brơi sa čô ană nge amăng sang anŏ samơ̆ ăt brơi wŏt abih abang ană plơi pla dong. Yua anun hrơi ngă yang giong ƀing čơđai jing sa čô mơnuih amăng plơi pla”.

Kiăng pơphun tơlơi ngă yang ƀhet tơngia, mơng hrơi ană nge tơkeng rai, sang anŏ amra prap lui gơnam pơyơr đĭ yang rơbang, ơi yă anun lĕ mơnŭ, un, boh troh…Sang anŏ hơmâo hmăi ƀiă čuh kơbao, rơmô. Rơngiao kơ bruă prap lui gơnam pơyơr đĭ yang rơbang anun lĕ mơnŭ, un, boh troh…hơmâo wŏt sa gong drai anet ăt hơmâo pơdong amăng sang. Gong drai amăng hrơi ngă yang ƀhet tơngia lĕ sa gong drai juăt yua mơng mơnuih djuai ania ƀiă pơkra hăng kram, člah hĭ tơdŭ hăng pik rup rap ƀơi gong drai. Ơi Đinh Ply, pô ngă akŏ grup djuai ania Bahnar amăng plơi gru grua, tuai čuă ngui djop djuai ania Việt Nam brơi thâo:

“Gong drai pơdong ngă pra yang amăng sang anun ñu anet đôč. Gong drai pơdong ƀơi pra yang kiăng tañ lăng ƀuh. Jak iâu yang rơbang, ơi yă glăi lăng hrŏm hăng sang anŏ”.

Lơm pơyơr đĭ djop laih, pô sang amra jak iâu pơjâo. Tui hluai djuai ania mơ̆ pô phai yang anai lĕ pơjâo ƀudah amĭ ama čơđai anai mơtăm. Mông ngă yang ƀhet tơngia pơphun amăng yang hrơi tlam, samơ̆ mơng mơguah sing bring, ƀing kơnung djuai hơmâo jak iâu nao pơ sang huă asơi yang hrơi dong. Tơdơi kơ huă asơi giong amra pơphun ngă yang ƀhet tơngia. Arăng amra bluh tơngia gah hơnuă hlâo laih anun tơngia gah ieo. Pô pơjâo amra yua sa ƀĕ đing djrao glông 30 cm. Tơdơi anun dưm giăm tơngia čơđai laih anun bluh rơnang amăng tơngia čơđai hăng iâu lăi rơkâo tơlơi hiam klă hloh brơi kơ čơđai anai.

Pô Pơjâo lĕ mơnuih bluh tơngia blung a, laih dong amĭ ama, kơnung djuai ania hăng ană plơi pla, abih bang lêng kơ rơkâo brơi tơlơi hiam klă kơ čơđai anai. Tơdah đah kơmơi, rơkâo tañ dra hiam bơnai, thâo riă hơte tơnă hơbai, hăng đah rơkơi thâo lua pơnah, tơngan kjăp khươl đao wai pơgang plơi pla. Nai prin tha Bùi Ngọc Quang, kơ-iăng Khua sang gru grua djuai ania Việt Nam brơi thâo dong:

“Mơnuih djuai ania kual Dap kơdư ruah djơ̆ hrơi kiăng pơphun ngă yang ƀhet tơngia brơi čơđai. Pô pơjâo amra rơkâo đĭ yang rơbang hrơi anai sang anŏ, plơi pla amra pơphun ngă yang ƀhet tơngia brơi čơđai. Pô pơjâo lĕ mơnuih bluh tơngia hăng iâu lăi brơi ñu blung a kiăng tui anun amĭ ama hăng ƀing mơnuih nao ngă yang hrŏm. Rĭm čô mơnuih hơmâo sa tơlơi pơpŭ hăng lăng čơđai anai jing sa čô mơnuih amăng plơi pla hăng pơhiăp bit hăng čơđai hơdôm tơlơi hiam klă hloh, lăi pơthâo tơlơi găn rơgao amăng tơlơi hơdip, bruă mă, bơwih ƀong huă, pơtô glăi gru grua…brơi ƀing čơđai”.

Tơdơi kơ hơdôm tơlơi pơpŭ hiam klă brơi čơđai, pô pơjâo amra tuek ia tơpai pik ƀơi mơbah, pik ƀơi thơi čơđai. Anai ăt lĕ mông pơđut hĭ ngă yang hăng abih bang mơnuih hơdai nao mông mơñum ƀong, ngui adôh suang. Ƀing hlơi nao ngă yang dưi pơyơr gơnam tam, hơmâo hơget brơi anun, tui hluai pran jua pô kiăng pơpŭ brơi sang anŏ.

Tui tơlơi pơmĭn mơng djop djuai ania ƀơi kual Dap kơdư, tơlơi thâo thăi mơng ană mơnuih dŏ ƀơi tơngia. Rĭm čô ană mơnuih lơm tơkeng rai lêng kơ ngă yang ƀhet tơngan kiăng jao glăi tơlơi thâo thăi. Giăm ha wŏt hrơi tơjuh tơdơi kơ hrơi ngă yang ƀhet tơngia, pô amĭ amra ba čơđai hyu ngui pơ sang kơnung djuai kiăng mă gơnam arăng pơyơr. Gơnam pơyơr brơi ƀing čơđai lĕ hla čong, kŏng ƀudah hrĕ mrai…ăt ƀu kơtrâ̆o nua gơnam samơ̆ tơlơi yôm kiăng pơ ala brơi, hăng tơlơi čang rơmang čơđai anai amra suaih pral, tơdơi anai hơmâo tơlơi hơdip trơi pơđao, yâo mơ-ak./.