Hăng anăn “Mai anh đào Đà Lạt-Pơtum pơƀut anŏ hiam bơyan bơnga”, hrơi ngui kiăng pơpŭ anŏ hiam mơng bơnga pơ ala brơi plơi prong Đà Lạt, laih dong lăi pơthâo rup rap ană mơnuih Đà Lạt hơdip jê̆ giăm, mơ-ak klă, thâo čơkă tuai. Hrơi ngui pơphun mơng lơ 16/1 truh akŏ blan 2/2026 amăng lăm hăng jum dar, amăng anun tơlơi kơđŏm glăi lĕ hơdôm anih pơčeh tơlơi ngui rôk tui jơlan Trần Hưng Đạo, bruă phin rup, kač rup, ngui rôk jơlan hăng lăi pơthâo gơnam đang hmua, gơnam OCOP, če, kơphê yôm phara mơng ƀon lan.

Anih ngui ngor ăt pok prong truh pơ anih čuă ngui dêh čar Dơnao Tuyền Lâm, kual pla če Cầu Đất, Thung Lũng Tình Yêu, pơlir hăng hơdôm bruă čuă ngui pơ đang hmua, ngui adôh suang hăng atông čing hơgor, pơgôp pơtrut bruă tuai čuă ngui hăng lăi pơthâo rup rap kual lu djuai bơnga.