Tơlơi pơtrun mrô 80-NQ/TW mơng Ding jum kơđi čar tal XIII kơ pơđĭ kyar gru grua Việt Nam hơmâo ba tơbiă hlâo kơ Jơnum Ping gah tal XIV pơdah tơlơi gir run prong mơng Ping gah amăng bruă pok phư hăng pơsir hĭ tơlơi gun kơ tơhnal pơkă, ngăn rơnoh, tŏ tui pran kơtang mơng gru grua, ngă pơtrut phrâo, pơtrut pơđĭ kyar tañ, hơđong kjăp lŏn ia ta amăng rơnuk phrâo.

Tơlơi pơtrun lăi pơtong tơlơi gơgrong mơng gru grua anai lĕ dram gơnam ngă atur kiăng pơjing gru grua hiam klă, yôm phara amăng rơnuk phrâo. Tơlơi pơtrun pơsit tong gru grua hơmâo gah bơngăt jua hăng gơnam tam, anai lĕ sa amăng hơdôm dram gơnam gru grua yôm phăn kiăng tŭ mă klă kiăng pơđĭ kyar hơđong kjăp. Amăng tơlơi pơtrun anai, bruă wai pơgang hăng tŏ tui gru grua ƀu djơ̆ kơnong lĕ bruă jao djă pioh gru grua đôč ôh mơ̆ ăt pơtum pơƀut amăng sa jơlan gah pơđĭ kyar djop mơta, hơđong kjăp pơlir hăng pơtô pơjuăt, mơnuih mơnam, bơwih ƀong huă, sit biă ñu lĕ amăng rơnuk mut hrŏm rŏng lŏn tơnah hăng pơplih mrô.

Hơdôm djuai ania Bru-Vân Kiều, Chứt dŏ hơdip ƀơi tơring čar Quảng Bình hlâo adih, ră anai lĕ tơring čar Quảng Trị. Anih hơmâo gru grua pơlir hăng glai rưng rôk tui kơčong čư̆ Trường Sơn, hơmâo ia krông čroh hnoh hăng tơlơi ngui ngor, ngă yang rơbang amăng plơi pla. Bruă djă pioh gru grua ƀu dưi pơčlah hăng bruă djă pioh anih dŏ hơdip gru grua amăng plơi pla, wai pơgang glai rưng, čroh ia hăng tơlơi bơwih ƀong gru grua. Tơlơi pơtrun mrô 80-NQ/TW mơng Ding jum kơđi čar pơsit tong bruă djă pioh gru grua amăng tơlơi rô nao rai mơ-ak klă hăng lŏn mơnai glai čư̆ laih dong pơđĭ kyar hơđong kjăp.

Mơnuih kơhnâo Đinh Văn Chờ, djuai ania Chứt dŏ amăng plơi Hoá Lương, să Kim Điền, tơring čar Quảng Trị brơi thâo, bruă ngă tui na nao mơng tơlơi pơtrun lĕ lăng ană mơnuih phun, amăng anun ană plơi pla lĕ mơnuih pơčeh phrâo hăng djă pioh gru grua. Ơi Đinh Văn Chờ brơi thâo:

“Gru grua lĕ atur kơ tơlơi pơmĭn, pran jua pơtrut pơđĭ kyar mơng mơnuih mơnam. Hơmâo Ping gah hăng Kơnuk kơna đing nao, mơnuih djuai ania Chứt gơmơi hur har biă mă, hơmâo tơlơi yôm kiăng tŏ tui, djă pioh gru grua yôm mơng mơnuih djuai ania Chứt. Mơng ƀon lan truh pơ gơnong glông ngă hiưm pă kiăng đing nao hơdôm gru grua mơng djuai ania yua kơ hŭi rơngiă hĭ, kiăng hơmâo tơhnal pơkă lăp djơ̆, dưi tŏ tui, pơtô glăi brơi rơnuk tơdơi hăng pơđĭ kyar gru grua”.

Lăng glăi ƀơi Dak Lak, amăng akŏ bruă wai pơgang hăng tŏ tui gru grua gah bơngăt dêh čar amăng tơring čar rơwang thun 2023-2025 hơmâo ba tơbiă bruă jao, hơdră bruă tong ten kiăng wai pơgang, jao glăi hăng tŏ tui hơdôm rơnoh yôm phara mơng tlâo gru grua gah bơngăt dêh čar: anun lĕ akhan mơng djuai ania Êđê, tơlơi pơtưh mơng djuai ania Êđê hăng tơlơi ngă yang lih kơ amĭ ama ơi yă mơng djuai ania M’nông. Sit biă ñu, pok hơdôm anih pơtô hrăm kơ gru grua gah bơngăt dêh čar; pơjing hơdôm jơlan hơdră, akŏ bruă ngă tui bruă djă pioh, tŏ tui gru grua pơlir hăng bruă jao pơđĭ kyar bơwih ƀong huă-mơnuih mơnam amăng ƀon lan; pơjing hăng pơphun hơdôm bruă ngă lông lăng kơ tŏ tui gru grua amăng tơlơi hơdip ană plơi pla, tơlơi ngui ngor, hơdôm bruă tuai čuă ngui gru grua…Boh than ba glăi mơng hơdôm hơdră bruă lăp djơ̆ anai djru brơi mơnuih ƀôn sang tŭ mă tơlơi dưi hăng tŏ tui gru grua yôm phara ƀơi ƀon lan. Yă Hring Mlô, djuai ania Êđê, dŏ amăng ƀuôn M’Găm, să M’Drak, tơring čar Dak Lak brơi thâo, yua hơmâo Ping gah hăng kơnuk kơna, neh met wa ƀu djơ̆ kơnong dưi pơklaih mơng ƀun rin đôč ôh mơ̆ ăt hơmâo djop tơlơi gal djă pioh, tŏ tui gru grua djuai ania:

“Sang gơmơi giăm jơlan prong, hơmâo sang glông. Kâo pơmĭn amra sĭ asơi huă añăm ƀong, gơnam ƀong djuai ania Êđê alih dong kŏng tơpai čeh pơlir hăng bruă ngui atông čing hơgor kiăng djă pioh gru grua djuai ania pô. Sang gơmơi ăt hơmâo hmua pơdai, lŏn prong jum dar sang, kâo ăt pla lu phun kyâo boh troh dong”.

Hơdôm tơlơi pơmĭn phrâo amăng hră pơsit Jơnum Ping gah tal XIV lĕ djă pioh gru grua amăng jơlan gah pơđĭ kyar kơtang, djop mơta gru grua hăng ană mơnuih Việt Nam. Pơđĭ kyar gru grua hăng ană mơnuih Việt Nam tui pran jua mơng Jơnum tal XIV mơng Ping gah amra jing jơlan gah ha amăng plĕ, pơlir rô nao rai kơplah wah djă pioh gru grua hăng hrưn đĭ pơplih phrâo.

Hră pơsit Jơnum tal XIV mơng Ping gah ăt pơsit 12 jơlan gah pơprong; 6 bruă jao akŏ phun hăng 3 tơlơi pơtrut yôm. Jơlan hơdră bruă mă hơmâo pơsit tong hơdôm bruă jao dưi ngă mơtăm. Amăng anun, jơlan gah gru grua hăng ană mơnuih lĕ atur mơng pran jua mơnuih mơnam, pran kơtang amăng lăm, ngăn rơnoh hăng pơtrut pơđĭ kyar lŏn ia ta. Ơi Mai Xuân Thành, kơ-iăng khua gơnong bruă gru grua, bơrơguăt drơi jăn hăng tuai čuă ngui tơring čar Quảng Trị brơi thâo, sit nik ƀơi hơdôm boh ƀon lan kual čư̆ siăng, djă pioh gru grua djuai ania ƀiă amra hơđong kjăp lơ̆m pơlir hăng tơlơi hơdip bơwih ƀong hơđong brơi mơnuih ƀôn sang.

“Hơmâo hơdôm tơlơi pơtrun kơ hơdră djru ƀing kơhnâo kơhnăk amăng bruă djă pioh, pơtô glăi kah hăng tŏ tui hơdôm rơnoh yôm gru grua amăng ƀon lan. Kiăng djru hrưn đĭ tơlơi hơdip mơda brơi ƀing kơhnâo kơhnăk kiăng tŏ tui pran hor, hrŏm hăng kơnuk kơna djă piôh hơdôm tơlơi yôm gru grua. Ngă tui klă hơdôm tơlơi pơkă amăng tơlơi phiăn gru grua, pơhlôm brơi hơdôm boh ƀon lan djă pioh, tŏ tui hơdôm tơlơi yôm amăng gru grua gah bơngăt tui tơlơi pơkă amăng tơlơi phiăn gru grua”./.