Pơjâo Y Phi Mjâo, dŏ amăng ƀuôn A1, să Ea Sup, tơring čar Dak Lak brơi thâo, tui phiăn juăt mơng đưm hlâo, tơdơi kơ bơyan pơhrui giong, abih bang mơnuih amăng plơi pla mut hrŏm pơphun ngă yang. Tơlơi ngă yang anai pơdah pran pơpŭ yua yuă hơpuă hơmâo hmăi tơdơi kơ ha thun mă bruă, rơkâo thun phrâo rơnuk rơnua, pơdai jor kơtor mơboh, ană plơi pla suaih pral, gum pơgôp.

Amăng tơlơi pơmĭn mơng djuai ania Jarai, ƀing yang rơbang lăng yôm biă mă hăng ñu pơgang brơi ană plơi pla, sit biă ñu lĕ yang ia, ia glai. Mah lu tơlơi phiăn sô hơđăp hơmâo pơplih tui ƀơƀrư̆, tơlơi ngă yang ăt dŏ djă pioh, kar hăng tơlơi tơkuh nao rai kơplah wah ană mơnuih hăng lŏn mơnai glai čư̆, pơdah pran thâo pơpŭ hăng đăo gơnang yang rơbang amra pơgang brơi ană plơi pla rơnuk rơnua, pơdai jor kơtor mơboh. Pơjâo Y Phi Mjâo lăi:

“Ngă yang plơi kiăng rơkâo brơi ană plơi pla rơnuk rơnua, suaih pral. Tơdơi kơ ngă yang plơi, ƀing gơmơi ngă yang ia, tơlơi kơwưh đĭ yang rơbang kiăng hlô rông anun lĕ un, kơbao tuh hrôh, huăi ƀă klin kman, tơlơi ngă yang anai ƀing gơmơi ngă tui mơnuih ƀôn sang Lào. Ƀing gơmơi ngă yang plơi kiăng abih bang mơnuih lêng hơdip hur har pran jua mơ-ak”.

Hlâo kơ hrơi ngă yang, tha plơi amra pơphun jơnum plơi pla kiăng jao bruă brơi rĭm čô mơnuih. Ƀing hlăk ai amra nao pơ glai koh rơ-o, kram, ale kiăng pơdah gong drai. Gong drai arăng lăng anih tơkuh nao rai hăng yang rơbang, ngă ană plơi pla jê̆ giăm ƀiă dong hăng yang rơbang. Lơm anun, ƀing đah kơmơi dŏ pơ sang tul tơpung, kang lui tơpai hăng prap lui gơnam ƀong. Ayong Nô Ksor, dŏ amăng ƀuôn A1, să Ea Sup, tơring čar Dak Lak brơi thâo:

“Akŏ thun ƀing gơmơi juăt pơphun ngă yang ia, yang čư̆, ngă yang kơwưh đĭ tơlơi rơkâo. Amăng lơ 29 tết, anai lĕ amăng hrơi prap čơkă thun phrâo ƀing gơmơi amra pơphun. Hrơi anai abih bang mơnuih pơtum pơƀut glăi ha anih, ƀơi anai hơmâo ƀuôn A1, A2 juăt pơphun hrŏm, rĭm thun lêng kơ tui anun soh”.

Tơdơi kơ mông ngă yang plơi, neh met wa amăng plơi pla tŏ tui jak iâu pơjâo pơkŏn pơphun ngă yang ia. Tơlơi ngă yang hơmâo pơphun ƀơi pin ia, anai lĕ anih pơlir hăng tơlơi hơdip mơda mơng ană plơi pla. Amăng mông pơphun ngă yang arăng amra akă hrĕ mrai ƀơi tơngan tha plơi, sa bruă ngă kiăng rơkâo tơlơi rơnuk rơnua, wai pơgang hăng pơlir ană plơi pla.

Tui ơi Y Duk Ksor, mơnuih ƀôn sang ƀuôn B1, să Ea Sup, tơring čar Dak Lak, lăng tơlơi ngă yang anai ƀu kơƀah ôh amăng tơlơi hơdip, tơlơi ngă yang rơbang mơng djuai ania Jarai, pơdah pran pơlir mut hrŏm hăng lŏn mơnai glai čư̆, laih dong pơtă pơtă ană tơčô thâo pơpŭ kơ pin ia, lŏn mơnai hăng glai čư̆.

“Ngă yang plơi rơkâo brơi angĭn rơnang hơjan mơ-ak, pơdai jor kơtor mơboh, pơdai bă atông thoa, djop huă djop ƀong, sang anŏ lêng kơ suaih prak, tơpă ha thun, arăng juăt ngă yang hăng kơbâo. Bơ ngă yang ia juăt ngă yang hăng un, kiăng djop sang anŏ lêng kơ trơi pơđao, ană tơčô lu, sang anŏ yâo mơ-ak, ƀu hơmâo hlơi rơmon akŏn rin. Kiăng prap lui tơlơi ngă yang, hơmâo hơget ba nao gơnam anun, đa ba nao braih, đa mơnŭ, đa čeh tơpai, abih bang mơnuih amăng plơi pla mut hrŏm ngă yang thun phrâo, bơyan tơjŭ pla phrâo”.

Ngă yang akŏ thun phrâo mơng djuai ania Jarai ƀu djơ̆ kơnong lĕ tơlơi ngă yang đôč ôh mơ̆ ăt lĕ hrơi abih bang mơnuih pơbưp nao rai, pơlir pran khăp pap ană plơi pla. Hơdôm phiăn juăt đưm hlâo hơmâo djă pioh hăng pơplih brơi lăp djơ̆, ngă rơnuk tơdơi anai hluh rơđah ƀiă dong gru grua djuai ania pô, laih dong pơlir ană plơi pla amăng tơlơi hơdip phrâo ră anai./.