Amăng rơnuč rơwang hrơi tơjuh, ƀơi sang hră čơđai anet Hoa Hồng, să Ia Dreh, tơring čar Gia Lai, lăng hyu jum dar pơdă lu eng ao hiam hrŏm hăng jua čing hơgor dik dak mơ-ak. Anai lĕ hrơi ĕp lăng bruă mơñam abăn ao, rêu rô gru grua hăng ngui atông čing hơgor mơng djuai ania Jarai. Ƀơi anai, ƀu djơ̆ kơnong ƀing kơhnâo kơhnăk đôč ôh mơ̆ ăt hơmâo wŏt ƀing nao, ƀing čơđai anet lêng kơ buh eng ao djuai ania pô hăng lu blah ao hiam phara, hơmâo hơngah phara tui hor, hnưr thun. Nai Nay H’Tố Trinh, nai pơtô ƀơi sang hră čơđai anet Hoa Hồng črâo brơi ƀing čơđai kiăo tui lăng hăng ƀing kơhnâo kơhnâo apăn tơngan črâo ngă tui lơm mơñam mrai:

“Sang hră čơđai anet ƀing gơmơi hơmâo pơphun ĕp lăng gru grua djuai ania brơi ƀing čơđai hăng lu bruă mă anun lĕ atông čing, mơñam rêu rô, abăn ao…Ƀing gơmơi jak iâu ƀing neh wa rai lăi pơthâo eng ao hăng pơtô brơi ƀing čơđai bruă mơñam eng ao. Jing ƀing nai pơtô, tơlơi čang rơmang prong hloh mơng ƀing gơmơi lĕ ƀing čơđai dưi ĕp lăng tañ hloh, hluh rơđah tơlơi yôm mơng bruă mơñam abăn ao, anai lĕ gru grua pioh glăi mơng ơi yă, mơng anun amra pơpŭ, djă pioh hăng tŏ tui mơng rơnuk ană tơčô”.

Ƀing rơgơi kơhnâo gah mơñam mrai, mơñam rêu rô hăng ƀing atông čing hơgor mơng plơi Nông Siu, plơi Bha Nga, plơi Blak (să Ia Dreh, tơring čar Gia Lai) hơmâo djru brơi ƀing čơđai hơmâo sa jơlan hơdră ĕp lăng mơ-ak hăng thâo rơđah tơlơi yôm mơng gru grua djuai ania. Yă Nay H’Kông-Pô ngă akŏ grup mơñam mrai plơi Nông Siu pơ-ư ang yua abăn ao mơng grup hơmâo arăng buh amăng hơdôm hrơi ngui gru grua amăng tơring čar, mrô prăk sĭ gơnam pơhrui glăi rơbêh 50 klăk prăk, ñu pô hơmâo Jơnum min djop djuai ania mơnuih mơnam tơring čar Gia Lai jao hră pơpŭ. Samơ̆ tơlơi yôm hloh lĕ dưi lăi pơthâo gru grua yôm phara mơng djuai ania Jarai, sit biă ñu lĕ pơtô glăi bruă mơñam mrai brơi rơnuk tơdơi dong.

“Ƀing gơmơi mut hrŏm lăi pơthâo bruă mơñam mrai ƀơi tlâo boh sang hră čơđai anet amăng ƀon lan. Ƀơi anai, ƀing gơmơi ƀu djơ̆ kơnong pơdă prưng, lăi pơthâo abăn ao đôč ôh mơ̆ ăt pơtô brơi ƀing čơđai hơdôm bruă mơñam mrai. Lơm ƀuh ƀơi anăp, dưi ruah tek djơ̆ abăn ao, ƀing čơđai hor biă mă, mơng anun dưi pơsur pran hor hăng bruă mơñam mrai. Ƀing gơmơi čang rơmang truh prong, ƀing čơđai amra dưi mơñam mă eng ao kar hăng ƀing neh wa pơtô brơi. Tơlơi hur har mơ-ak mơng ƀing čơđai ăt ngă ƀing gơmơi hok kơdok mơn, yua ƀing čơđai amra jing mơnuih tŏ tui hăng djă pioh bruă mơñam mrai gru grua anai”.

Bruă ĕp lăng gru grua djuai ania ƀơi să Ia Dreh, tơring čar Gia Lai lêng hơmâo gong gai ƀon lan hăng hơdôm grup dong yua. Yă Nguyễn Thị Ly Na-Kơ-iăng Khua khul pơlir hơbit đah kơmơi să Ia Dreh brơi thâo, mơng thun hlâo, lơm aka ƀu pơmut hrŏm, Jơnum min mơnuih ƀôn sang tơring glông Krông Pa (hơđăp) hơmâo pơsit akŏ pơjing grup mơñam mrai plơi Nông Siu, hăng 17 čô ding kơna, kiăng djă pioh hăng tŏ tui gru grua djuai ania Jarai ƀơi ƀon lan. Bruă mă mơng grup ƀu djơ̆ kơnong ba glăi prăk pơhrui  brơi adơi amai đôč ôh mơ̆ ăt tŏ tui gru grua djuai ania brơi ƀing hlăk ai čơđai.

“Gah sang hră čơđai anet Hoa Hồng jak iâu ƀing kơhnâo kơhnăk, grup mơñam mrai glăi pơ sang hră kiăng lăi pơthâo, pơtô brơi ƀing čơđai thâo hơdôm blah abăn ao mơng djuai ania Jarai. Khul ăt gum hrŏm ƀing adơi amai ƀơi ƀon lan, anun lĕ ngă hiưm pă kiăng djă pioh hơdôm gru grua yôm phara mơng djuai ania pô; čang rơmang abăn ao hơmâo abih bang mơnuih thâo hluai tui hơdôm bruă pơbưp gru grua-adôh suang”.

Hơdôm mông ĕp lăng yôm phăn ƀơi Sang hră čơđai anet Hoa Hồng, să Ia Dreh, tơring čar Gia Lai hơmâo ngă sang hră čơđai anet jing anih ngui gru grua dik dak, anih gru grua yôm phara mơng djuai ania ƀu djơ̆ dŏ kơnong amăng sang djă pioh đôč ôh mơ̆ ăt pơƀuh brơi, lar hyu hluai tui hrĕ mrai, rĭm jua čing hơdor hmư̆ bang tơ-ua./.