VOV4.Jarai - Ăt tui hăng djuai ania pơkŏn ƀơi kual Dap Kơdư mơn, djuai ania Êđê lêng pĕ hla añăm amăng glai pơkra jing añăm ƀong jơman phara. Amăng anun ta khŏm yap nao añăm tơpung ate hla yao ƀong mih, pơphưi mơng mơnong hơtuk lik, wơ̆t hăng anŏ ƀâo hiam mơng hla yao. Anai lĕ gơnam ƀong huă hơmâo mơng đưm laih, yôm biă mă hăng djuai ania Êđê.

Phara kơ anih dŏ mơn, mơnuih djuai ania Êđê iâu añăm tơpung hla yâo phara mơn, mơnuih Êđê ƀơi kual Adham iâu lĕ añăm tơpung yao, ƀudah añăm ate, bơ djuai ania Êđê ƀơi kual Bih iâu lĕ añăm bai. Mah iâu phara samơ̆ gơñu hơbai dơkơnar mơn. Yă Ƀăt (anăn ñu H’Lan Niê) dŏ ƀơi ƀuôn Kla, să Dray Sap, tơring glông Krông Ana, tơring čar Dak Lăk brơi thâo, añăm anai hơmâo mơng đưm đă ră hlâo laih, añăm pơtăm, gơnam pioh ngă añăm lêng hơmâo amăng sang, amăng đang, biă ñu ƀu dưi kơƀah hla yao ôh, hla yao arăng pĕ hla glăk tha, mơtah ngur.

“Mơng đưm hlâo djuai ania Êđê juăt rơyă laih añăm anai, abih bang añăm pơtăm hơmâo amăng sang kah hăng trong phĭ, rơbung lêng pioh hơbai hrŏm, hơmâo mơnong rơmô lĕ pioh nao mơnong rơmô, hơmâo akan pioh nao akan, bơ ƀu hơmâo lĕ ate añăm hla đôč yơh. Tơdah kiăng ƀong añăm tơpung lĕ ta prăp lui añăm băl, añăm ƀlê ƀudah hla plum (hla ƀlang), trong phĭ, hăng, tơdah hơmâo rơbung tŭ mơn djơ̆ soh, abih bang hơmâo rơyă hrŏm hăng tơpung. Hla yao lĕ ƀu dưi kơƀah ôh, tơdah ƀu hơmâo lĕ ta mă hla kơtor, ƀudah hla añăm pơtŭ tŭ mơn ăt hrŭp hăng hla yao mơn, ƀâo hiam tui hăng hla yao mơn, anun lĕ hơdră hơtuk rơyă tơnă hơbai mơng ơi yă ta mơng đưm laih”.

Phun hla yao

Yă H’Lan Niê lăi, kiăng añăm tơpung hla yao ƀăt jơman, pô rơyă hơbai khŏm thâo pơkra mơn. Lơ̆m ate añăm lĕ hơmâo lu mơnuih gum ngă, đa tul tơpung, đa pleh añăm, đa tul hăng hra...Ngă rah, ră ruai rah.

“Blung a ƀing ta trăm braih, trăm giong lĕ ta tul tơpung, mă hla yao tul hrŏm hlao, tơdơi kơ anun rơyă. Lơ̆m ate añăm, tơdah añăm tơpung ate hrŏm rơbung lĕ ta hơbai rơbung ƀơ̆i hlâo, tơdah amuaih ƀong rơbung mơsăm lĕ ta plĕ nao rơbung mơsăm, tơdah kiăng ƀong rơbung săt lĕ ta plĕ nao rơbung săt, ta hơbai kiăng rơbung ñu plai ƀiă mơsăm, tơdơi kơ anun ta hling hĭ ia ñu, tuh nao ia phrâo dong, tơdah hơmâo plôi, get thơ ta pioh nao hrŏm tŭ mơn, hiam soh, hơmâo mơnong akan ta hơtuk nao hrŏm djơ̆ mơn. Tuh nao ia tơpung, ta kuor nao kuor rai kiăng ñu mut hrŏm, plĕ nao ƀiă hăng dong, tui anun jơman hloh”.

Añăm tơpung ate

Añăm ate hla yao juăt hơmâo arăng rơyă mơ-ai yơh, amăng hrơi jơnum ngui ngor kah hăng hrơi ngui ngor mơ-ak, hrơi pơbưp sang anŏ ƀudah amăng plơi pla hơmâo mơnuih djai rơngiă....Rơngiao kơ anun, anai ăt jing mơnong ƀong huă hơmâo lu sang anŏ pơkra pŭ kơ ƀing tuai yôm. Yă H’Lan Niê brơi thâo, pơkra añăm anai huăi rơngiă prăk lu đơi ôh samơ̆ ăt ƀăt jơman, hiam kơ drơi jăn mơn:

“Ră anai nao mơyut atâo pơ plơi pơkŏn kâo lăng ăt hơmâo mơn añăm tơpung hla yao, kâo pơmin añăm anai huăi rơngiă lu prăk ôh samơ̆ ƀong ñu ăt jơman, añăm anai ta pĕ mơng glai, ră anai lĕ arăng juăt ba glăi pla pơ sang”.

Lơ̆m ƀong lăng, añăm tơpung hla yao ƀâo phu, ƀăt jơman biă mă. Añăm tơpung hla yao juăt ƀong hrŏm asơi jơman biă. Djuai ania Êđê amuaih ƀong yua dah ñu hơmâo anŏ ƀâo hiam mơng hla yao, mih mih, phưi phưi mơng mơnong akan rơyă amăng añăm tơpung, wơ̆t hăng anŏ jơman mơng asơi rơmuăn. Añăm tơpung hla yâo hơmâo pơkra amuñ đôč samơ̆ ba glăi anŏ ƀăt jơman tui hăng añăm ta juăt ƀong rim hrơi mơn. Hlơi pô ñu nao ngui laih pơ plơi pla djuai ania Êđê amra ƀu wơr rơbit ôh anŏ ƀâo hiam, ƀăt jơman phara mơng glai rưng lơ̆m ƀong añăm tơpung hla yao.

Zawut- Y-Ƀel: Čih - Siu H’Mai: Pơblang