VOV4.Jarai - Hơmâo amăng hơdôm bruă anăp nao hrơi huă pơsat Pơtao Hùng (10/3 tui blan ta), Sang gru grua đưm Dêh čar hơmâo pơphun tour “Pơwơ̆t glăi rơnuk Hồng Bàng”, hơmâo hơdôm bruă pel ĕp rơnuk akŏ pơdong lŏn ia mơng hơdôm rơnuk pơtao Hùng hrŏm hăng hơduah ĕp sem lăng tơlơi phiăn ngă yang rơbang, ngui ngor mơng mơnuih Việt ta đưm. Amăng hrơi blung a ba pơƀuh, tour “Pơwơ̆t glăi rơnuk Hồng Bàng” hơmâo lu mơnuih ƀon sang pơđing hmư̆, krăp lăng.

Tal blung a nao ngui hrŏm tour “Pơwơ̆t glăi rơnuk Hồng Bàng”, ayong Phạm Văn Tuấn, hrăm sang hră Sỹ quan Lục quân 1, Ding jum khul ling tơhan hrŏm hăng ƀing gŏp tơhan ñu hơmâo hrơi gêh gal pioh hơduah ĕp rơđah gru grua akŏ pơjing lŏn ia hăng wai lăng lŏn ia mơng djŏp rơnuk Pơtao Hùng, ăt kah hăng sem lăng gơnam yôm dêh čar ta Hơgor ia kông Ngọc Lũ, Pơsat hơmâo bông rup song Việt Khê amăng hrơi nao čuă lăng anih arăng pơdă prưng:

“Hluai tui jơlan hơdră anai djru gơmơi thâo hluh rơđah hloh kơ gru grua djuai ania ta, pơpŭ, bơni hơ-ơč biă mă kơ rơnuk ơi yă ta đưm akŏ pơdong, pơđĭ kyar lŏn ia. Jơlan hơdră anai yôm hloh dong lơ̆m pơphun djơ̆ hrơi dêh čar ta anăp nao čơkă hrơi huă pơsat ơi pơtao đưm lơ 10/3”.

Tơdơi kơ nao čuă lăng, ƀing hrăm mơng Sang hră Sỹ quan Lục quân 1 hơmâo arăng ba jơlan, nao lăng pel ĕp gru grua tơlơi phiăn đưm mơng djuai ania ta Việt ta kah hăng “Tŏp pơdai hăng dua ƀĕ hlâo” (pơplông tŏp pơdai, hơdơi braih), huak mă akan klua amăng kơƀung, pơkra rup bơnga ƀơi hơgor Ngọc Lũ, pơkra đoan hăng blâo čim pioh đoa amăng hrơi ngui ngor. Gum ngui tom hăng sang hră Sỹ quan Lục quân 1, Ding jum Ling tơhan, adơi Minh, čơđai sang hră hrăm thun rơnuč Sang hră Đại học Văn hoá Hà Nội lăi tui anai:

“Kâo lăng tour anai klă biă yơh, brơi ƀing ta hơduah ĕp gru grua, tơlơi hơdip mơng đưm, biă ñu amăng hrơi jơnum prong anai, anun pơjing rai tơlơi ngui ngor đưm đah mơng hơdor glăi, wơ̆t hăng brơi ƀing hlăk ai ƀuh ƀơi mơta hơdôm bruă ngui ngor kah hăng tŏp pơdai, mă akan klua amăng kơƀung hơdor glăi rơnuk ơi yă ta đưm laih anun thâo hluh rơđah hloh hơdôm gơnam hơmâo amăng sang pơdă gru đưm, biă ñu lĕ gơnam yơ yôm amăng dêh čar ta kah hăng hơgor ia kông Ngọc Lũ”.

Ƀing čơđai sang hră ngui “Mă akan klua amăng kơƀung”

Tui hăng yă Nguyễn Thị Định, Kơ-iăng khua anom bruă pơtô pơhrăm mơnuih mơnam, Sang gru grua đưm dêh čar, bruă lăi pơthâo, ba pơƀuh gơnam đưm wơt hăng bruă ngui ngor jing hơdră klă biă djru ƀing tuai khăp, thâo hluh hloh kơ gru grua tơlơi hơdip djuai ania ta mơng đưm:

“Amăng akŏ blan 3 blan ta, hrŏm hăng hrơi dêh čar hok mơ-ak čơkă hrơi huă pơsat pơtao Hùng, Sang djă pioh gru grua dêh čar ăt pơphun ngui kiăo tui tour “Pơwơ̆t glăi rơnuk Hồng Bàng hăng čang rơmang mơng ƀing gơmơi lơ̆m pơphun tơlơi hyu ngui anai lĕ kiăng ƀing gơyut hyu čuă lăng hơduah ĕp gru grua đưm rah, ƀrô pel ĕp, mă tơl tơngan, ngui hrŏm hơdôm bruă bơdjơ̆ nao tơlơi anai, čang rơmang bơhơdor brơi ƀing gơyut thâo tơlơi gum djru prong prin mơng djŏp rơnuk pơtao Hùng, mơnuih djru akŏ pơjing lŏn ia, pơtô brơi gru grua “ƀong boh hluh kơ pô pla”, “mơñum ia hơdor kơ pô klơi”.

Rơngiao kơ hơdôm bruă ngui phun, mơnuih ƀon sang hơmâo ngui tom tơlơi ngui đưm kah hăng kơdăt kơsu, pơdui hrĕ, kơdăt kơsăk, đĭ song, ngui dar; man gô̆ amô̆ lŏn hăng kơƀang đuăi dar, we rup Đông hồ, rup rơmung....ngă gơnam pioh kơ tuai djă lui. Lăng ƀuh hơdôm tơlơi klă hiam mơ̆ tour čuă ngui “Pơwơ̆t glăi rơnuk Hồng Bàng” ba glăi, Thượng tá Nguyễn Bá Quốc, Khua git gai Ping gah, mơnuih apăn bruă kơđi čar grup 1, Sang hră Sỹ quan Lục quân 1 brơi thâo:

“Rơđah biă yơh, tơdah kơnong pơtô lăi amăng bah soh, kiăo tui amăng hră pơ-ar, amăng rup lĕ ta dŏ pơ sang, lăng tui amăng internet, lăng tivi, pơđok hră hai ăt thâo hloh mơn, samơ̆ rai pơ anai ta pơhmư̆ hăng rup biă, ƀrô hơmâo pel ĕp, ngă tui mơtăm hơdôm tơlơi ngui ngor, tui anun jing yôm, klă hloh laih anun sit mơtăm amra hơmâo tơlơi lăp hơdor prong hloh, dlăm hloh amăng ƀing khua, ling tơhan mơng sang hră anai”.

Man lăng gô̆ lŏn ƀơi kơƀang đuăi dar.

Ngă yang huă pơsat Pơtao Hùng jing hrơi jơnum ngui prong mơng djuai ania ta, jing hrơi pioh pơtô lăi gru grua hiam “Mơñum ia hơdor kơ pô klơi”, pơdah pran jua bơni hơ-ơč prong hăng Pơtao Hùng hơmâo pơjing rai lŏn ia, ƀing ơi yă, mơnuih kơhnâo kơhnăk mơng đưm blah ayăt djă bong lŏn ia ta. Mơng anun, rim čô ƀing ta hrăm hră ƀu pơdơi pơdă, pơrơguăt tui tơlơi rơgơi đah mơng bơwih brơi lŏn ia, lăp hăng pran jua gum djru, djai drơi pô mơng tơhan sông kơtang, ơi yă ta đưm adih. Jơlan hơdră tour “Pơwơ̆t glăi rơnuk Hồng Bàng” amra hơmâo pơphun truh abih lơ 11/4 ƀơi Sang djă pioh gru grua đưm dêh čar.

Thủy Tiên: Čih - Siu H’Mai: Pơblang