Tơlơi ngă yang Črôi Rum Čêk dưi pơphun ƀơi plơi Cà Lăng A Biển, phường 2, plơi prong Vĩnh Châu, tơring čar Sóc Trăng. Tui hăng mơnuih ƀôn sang pơ anai, tơlơi ngă yang anai hơmâo mơ̆ng đưm laih, rơbêh 300 thun hăng anai năng ai ñu. Ngă yang Črôi Rum Čêk pơphun amăng hrơi blan bơrơmi blan dua blan tơƀang rim thun, ñu hơmâo tơlơi kiăng rơkâo anŏ mơak mơai kơ ană plơi pla, rơnuk ngă sang rơnang ngă hmua, angin rơnang phang mơak. Ăt mông anai mơ̆n, mơnuih ƀôn sang kiăng hơdor glăi kơ ƀing khin hơtai mơnuih kơhnâo kơhnăk git gai wai lăng plơi pla dêh čar, bơni kơ yang adai, khul yang rơbang brơi kơ ană plơi pla trơi pơđao, bơni kơ yang ia rơsĭ rông ba lu akan hơdang. Ơi Sơn Thol, Ačar, jing mơnuih apăn akŏ wai lăng pra yang Serei Kro Săng, phường 2, plơi prong Vĩnh Châu, tơring čar Sóc Trăng lăi:

“Ană plơi pla pơ anai lu mơnuih ngă bruă hơduah ƀong mơ̆ng ia rơsĭ, trah akan, mă hơdang yua anun mơnuih ƀôn sang ngă yang rơkâo tơlơi rơnuk rơnua hăng bơni kơ ia rơsĭ hơmâo djru tơlơi hơdip mơda trơi pơđao. Tơlơi ngă yăng dŏ djă pioh pơphun na nao rim thun mơ̆ng đưm truh ră anai”.

Pok blung či ngă yang lĕ, iâu lăi phun ƀơi čư̆ čuah kiăng hơdor tơngia kơ khul atâo yang ơi yă, anong wa đưm hlâo, bơni kơ ia rơsĭ hăng rơkâo hơmâo tơlơi rơnuk rơnua, hiam klă hloh kơ ană plơi pla.Tơdơi kơ anun, nao tơkung rup trah yang yơng mơ̆ng pra yang Serei Kro Săng, ba nao pơ anih ngă yang. Lơ̆m ba nao rup yang yơng truh laih, abih bang kơkuh kơ rup yang yơng, giong anun tơkung rup trah yang yơng ba glăi pơ anih hơđăp. Giong anun ngă yang iâu lăi kiăng kơ ană plơi pla rơnuk rơnua, pô pơđok hră iâu lăi lĕ, pô khua apăn bruă sang yơng, hơmâo lu mơnuih ƀôn sang đăo phơt yơng nao jơnum pơtum.

Tơdơi kơ ngă yang djơ̆ tui tơlơi phiăn, gru grua iâu lăi, tŏ tui dơ̆ng tơlơi ngui ngor mơak, pơplông pơrơguăt drơi jăn, adoh suang amăng plơi pla, tui tơlơi adoh đưm djuai ania. Lu tơlơi ngui ngor mơ̆ng đưm amăng plơi pla hơmâo pơƀuh glăi, kah hăng bruă hyu trah akan, yâo hơdang jing bruă bơwih ƀong huă mơ̆ng ană plơi pơ anai. Adoh suang yơh pơhưč lu mơnuih nao ĕp. Anun lĕ suang yơyư̆ tơpư̆ tơkai rơnang, tơngan rơ-un, hăng đok adoh, pĕ gông ayup đing diăp gru grua djuai ania Khmer.

Hơdôm thun giăm anai, dưi hơmâo tơlơi đing nao, git gai mơ̆ng djop gưl, djop anom bruă, Jơnum ngă yang Črôi Rum Čêk ƀu pơdơi ngă pơhiam tui, pơblih  boh pia, jua pơhiăp anŏ kiăng ngă, jai hrơi lu mơnuih đing nao kah hăng hrĕ tô brơi pơtruh hăng tơlơi khăp, gum pơgôp pơdjru nao rai tơdruă 3 djuai ania Yuan-Khmer-Hoa hlăk dŏ hrŏm amăng kual ter hang ia rơsĭ anai. Ačar Sơn Thol brơi thâo dơ̆ng:

“Hlâo adih pơphun mă anet đôč, samơ̆ ngă yang ngui ngor anai dưi djă pioh na nao.  Hơdôm thun giăm anai, hơmâo tơlơi đing nao mơ̆ng ping gah, Kơnuk kơna, tơring čar, plơi pla, tơlơi ngă yang pơphun prong hloh, lu mơnuih ngă hrŏm. Ră anai, jơlan glông nao rai klă, hơmâo apui lơtrik, anŏ gêh găl pơphun ngui ngor ngă yang klă hloh”.

Thun anai, ngă yang Črôi Rum Čêk mơ̆ng djuai ania Khmer Vĩnh Châu, dưi hơmâo Ding jum Gru grua, Pơrơguăt drơi jăn hăng Tuai čuă ngui pơsit jing gru grua yom pran jua gưl dêh čar.Anai lĕ, tơlơi mơak prong, tơlơi čih pioh anŏ gir run pơgang pioh gru grua hiam mơ̆ng djuai ania Khmer ƀơi Vĩnh Châu. Ơi Sơn Wath, ding kơna khul git gai pra yang Serei Kro Săng, hok mơak lăi:

“Ƀing đăo phơt yơng pra yang Serei Kro Săng, mơnuih ƀôn sang 3 djuai ania adơi ayong mơak biă mă, ngă yang anai hơmâo mơ̆ng hơdôm rơtuh thun baih, ră anai jing kông ngăn pran jua gưl dêh čar jing sa tơlơi mơak prong biă mă”.

Ơi Trần Trí Vân, Kơ-iăng Khua Jơnum min mơnuih ƀôn sang plơi prong Vĩnh Châu, tơring čar Sóc Trăng brơi thâo dơ̆ng:

“Ƀing gơmơi amra kơtưn hyu pơtô lăi, pơhrăm amăng plơi pla, mơnuih ƀôn sang đăo phơt truh pơ ană plơi pla ƀu đăo hai, biă mă ñu ƀing čơđai rơnuk anai thâo tong ten kơ rơnoh yom ngă yang bơni tơlơi tơphă ia rơsĭ brơi juăt lăi ngă yang Črôi Rum Čêk dưi hơmâo Ding jum Gru grua, Pơrơguăt drơi jăn hăng Tuai čuă ngui pơsit kông ngăn pran jua gưl dêh čar, djă pioh pơphun na nao rim thun, rŭ glăi hăng djă pioh tơlơi ngă yang mơak tui tơlơi phiăn đưm, hơdră adoh suang, lir hơbit amăng tơlơi ngă yang”.

Tơlơi ngă yang Črôi Rum Čêk hơmâo gru phun djă pioh mơ̆ng đưm laih, dưi djă pioh na nao truh rơnuk anai. Mah găn rơgao lu thun blan bơyan rơgao hơmâo lu tơlơi lông lăng, blah ngă, pơčlah člap hai, ăt dŏ djă pioh, bang bơngač, pơđĭ tui jing anŏ ngă yang ngui ngor mơak pran jua ană plơi, yom phara biă mă ƀơi tơring čar Sóc Trăng, pơhưč lu tuai rơnguai jĕ ataih nao ĕp hăng dŏ ngui hrŏm.