Djuai ania Čuru dŏ amăng lu anih pơjing plơi pla, mơnuih tha plơi lĕ jing pô tha hloh lu thun, arăng đăo kơnang, yua ană plơi pla yơh ruah đĭ laih anun ñu pô pơphun ngă yang brơi kơ plơi pla. Djuai ania Čuru juăt dŏ hrŏm sa boh sang anŏ đôč, amăng anun hơmâo 3-4 rơnuk, hnơr thun amăng sang anŏ, ơi yă amĭ ama, ană tơčô truh tơčĕ đơ đa.

Sa tơlơi amuñ thâo krăn lĕ, lăng nao kơ hơbô̆ eng ao djuai ania Čuru đah rơkơi phara hăng đah kơmơi. Samơ̆ đah rơkơi hăng đah kơmơi lêng kơ tuang kưn, akhăn soh ƀơi akŏ. Ƀing đah rơkơi juăt buh ao mrai kô̆, wơ̆t akhăn băk, akhăn tuang kưn hai, čut sum đut, ƀudah mơƀar eng dlông tơkai lêng kơ bơnal kô̆ soh. Ao gru grua đưm juăt ñu buh ngă pơhiam amăng mông ngă yang plơi, mông jơngum lu mơnuih, jing mông hơmâo tơlơi djai brŭ, mơnuih rơngiă amăng plơi, mông mơak pơdŏ rơkơi bơnai....Hrơi tơđar lĕ, arăng buh eng ao, čut h’ô tui hluai thâo hơmâo sum, eng ao đôč đač tŭ mơ̆n. Bơ ƀing đah kơmơi lĕ, buh ao sơmi, mơƀar eng hăng băk akhăn pơhlôm drơi jăn gah anăp tơda, akhăn băk ia kô̆ lĕ mông ngui ngor ngă yang plơi, akhăn jŭ ƀudah mơtah jŭ đôč đač lĕ buh hrơi tơđar.

Hăng djop djuai ania kual Dap Kơdư lăi hrŏm laih anun djuai ania Čuru ƀơi tơring čar Lâm Đồng lăi pha, rêu ƀudah hơkă gui lĕ gơnam yua ƀu kơƀah ôh amăng tơlơi hơdip mơda rim hrơi. Hăng mơnuih ƀôn sang djuai ania Čuru rêu ƀu kơnong gơnam yua đôč ôh, jing anŏ gru grua hiam, gơnam djă pioh pơpŭ kơ lŏn mơnai glai klô, tơlơi hơdip mơda, tơlơi thâo ia rơgơi hơjăn păn mơ̆ng djuai ania.

Amai Ma Hương, plơi Prĕ, să Phú Hội, tơring glông Đức Trọng, Lâm Đồng brơi thâo: Ia iom mă yua lĕ pioh mơñam rup bơnga kơ rêu hơkă juăt lăi rêu brung (brông ƀrê) rêu pang, hơmâo kơti ia mriah, rêu brung boh tơruai ia mriah hăng jŭ, arăng pơjing mơ̆ng kơtăk akha kyâo tơnung, hla kyâo pơtâo amăng glai pioh pik mia ngă ia iom hiam, djrao ƀudah pô-ô pik ia iom arăng krih giong lĕ, mă dưm ƀơi pra apui kiăng ñu jă ia iom hiam, mơñam ngă rup kơ rêu brung:

“Dơ̆ng mơ̆ng amĭ ƀă yă pơjing, truh kơ prô̆ tơdăm prăm dra ƀa tơsâo, kâo hơmâo ơi yă amĭ ama pơtô brơi kơ ta thâo gui rêu hăng mă yua rêu amăng tơlơi dŏ dong ƀong huă. Rêu lĕ gơnam mă yua lu mơta kah hăng pioh gui nao sô̆ ia, gui ia nao pơ hmua, pĕ añăm, hyu wŏk rơbung, hyu duñ boh troh amăng glai, gui glăi. Rêu yom biă mă hăng mơnuih ƀôn sang djuai ania Čuru".

Blan 2, blan 3 ƀơi kual Dap Kơdư bơnga kơphê tơbŭk čuh blang amăng hmua kơdư, đang jing mông anun mơ̆n djop plơi pla djuai ania Čuru kual Dap Kơdư juăt ngă tui tơlơi phiăn mă kơnung amĭ, gơñu pơtô ană tơdăm đơr ama, ană dra đơr amĭ khom thâo pơmin kơ bruă pơdong sang anŏ prŏ ƀong, bơwih ƀong huă, pơdŏ rơkơi bơnai. Juăt ñu, bơyan anai đah kơmơi Čuru kah hăng Jarai hơbai mơ̆n, sit tơdăm dra pơkhăp, amĭ ama đah kơmơi jao brơi anong wa ƀudah mơnuih ngă tơgrañ djă nao kông, gông nao rơbưn tơña kơ tơdăm pô đah rơkơi či ngă ung sang, ană rơkơi tơdơi anai. Giong phung wang gah đah kơmơi nao tơña, dua bơnah tŭ ư lĕ, pô tơgrañ akă brơi, pơbuh brơi añŭ kơtor het ƀudah añŭ kông sit nik pioh ngă anŏ djă kông laih anun tơña kơ bruă pơdŏ rơkơi bơnai yơh. Pô pơ ala gah kơnung djuai đah rơkơi, arăng juăt iâu lĕ srĭ, pô anun brơi kơ pô dra jing đah kơmơi či dŏ rơkơi sa boh rơbưn buh ƀơi čơđeng jing lăi tŭ ư yơh, kiăng ngă hơđŭ, ană tao kơ phung wang gah đah rơkơi. Yua kơ anun, hăng ƀing đah rơkơi, đah kơmơi djuai ania Čuru, rơbưn prăk lĕ ƀu kơnong buh kiăng lăng hiam đôč đač ôh, jing anŏ ngă gơnam gru grua, gơnam pơkôl pơkă yom biă mă amăng tơlơi pơdŏ rơkơi bơnai djuai ania Čuru sit jing laih rơkơi bơnai sang anŏ.

Kiăng dưi pơkra ming dua boh rơbưn tơnô ania ƀudah lăi rơbưn rơkơi bơnai anai, ƀing kơhnâo kơhnăk bruă tuh ia prăk, pơkra rơbưn, pơkra ming tong ten biă mă thâo pơkra rơbưn tơnô ania, ƀudah rơbưn mơnŭ ông mơnŭ ania. Mơnuih kơhnăk Ya Tuất dŏ ƀơi să Tu Tra, tơring glông Đơn Dương, tơring čar Lâm Đồng brơi thâo:

“Kâo pơkra rơbưn djuai ania Čuru 20 thun hăng anai laih. Hlâo adih kâo khom hrăm amăng 3 thun kah mơ̆ng thâo pơkra rơbưn laih anun thâo thăi ƀiă truh ră anai. Anai lĕ bruă mă ming pơkra gơnam gru grua đưm, anun gơmơi khom dŏ djă pioh, pơtô glăi kơ rơnuk tơdơi amăng plơi pla ta pô”.

Djuai ania Čuru hơmâo tơlơi pơtưh tơdăm dra, adoh mơak bơ ră ruai, kơtuai akhan, boh nik ñu akhan hri (hre) lu biă mă laih anun gơñu thâo dŏ djă pioh gông brô̆ mơ̆ng đưm, jing čêng, hơgor pah, đing diăp, đing dĕk, đing La ia kông, đing Rơtông, Tenia....Amăng hrơi mơak, gơñu juăt atông hơgor, pah pơng, pĕ gông, ayup đing hăng er tơlơi adoh Tamya, tui yŭ ayun suang mơak amăng plơi pla, abih bang djuai ania Čuru lêng kơ thâo hăng hor biă mă. Djuai ania Čuru hơmâo tơlơi phiăn ngă yang kơ bơngăt atâo ơi yă mơ̆ng đưm hăng lu tơlơi ngă yang hmua pơdai, kơkuh pơpŭ kơ yang rơbang, kah hăng yang ia, yang čư̆ siăng, yang hri bơngăt pơdai, ngă yang huă asơi hle mơak biă mă....