Tơlơi rô nao rai ha pran jua, dơlăm kơplah wah Việt Nam hăng Lao dưi hmâo hơdôm rơnuk git gai dua Ping gah, dua Kơnuk kơna hăng mơnuih ƀôn sang dua bôh dêh čar hmâo bư̆ bôr. Găn rơgao rơbêh kơ 60 thun yap mơ̆ng hrơi akô̆ pơjing bruă pơtom hiăp truh ră anai, tơlơi rô nao rai phara ha jăn anai jai hrơi jai mut dơlăm hăng ba glăi bôh tơhnal hloh.

Hơdôm hrơi rơgao, tơlơi rô nao rai kơđi čar, pơtom hiăp pơđĭ kyar klă hiam dong, jai hrơi jai kơjăp hăng đăo kơnang. Dua bơnah bơkơtuai nao rai klă gah grŭp, pơbưp gưl dlông hăng hơdôm gưl, djru pơsit jơlan gah abih bang tơlơi rô nao rai dua bôh dêh čar. Gum hrŏm pơgang lŏn ia – rơnuk rơnua plơi pla kơplah wah dua bôh dêh čar dưi kơtưn đĭ dong wot anô̆ klă hiam. Dua bơnah pok pơhai klă hơdôm tơlơi pơkôl, kơčăo bruă gum hrŏm; gum hrŏm wai lăng bruă mut tơbiă nao rai dua bơnah; ngă prai, ngă kơtuă hơdôm mơnuih ngă soh phiăn găn rơgao guai dêh čar.

Gum hrŏm bơwih ƀong, sĭ mơdrô hăng tuh pơplai kơplah wah 2 bôh dêh čar pơplih klă dong. Kiăng ngă gal brơi anom bơwih ƀong hăng mơnuih ƀôn sang 2 bôh dêh čar, dua bơnah kĭ pơkôl Hră čih djă pioh kơ pơđĭ kyar hăng tô nao rai anom mă yua sĭ mơdrô ƀơi guai dêh čar Việt Nam – Lao, Tơlơi pơkôl sĭ mơdrô nao rai gơnam tam Việt Nam – Lao; pok pơhai ba glăi bôh tơhnal Tơlơi pơkôl sĭ mơdrô ƀơi guai dêh čar Việt Nam – Lao. Kơnang kơ gir run mơ̆ng 2 bơnah, prăk pơhrui glăi mơ̆ng gơnam sĭ mơdrô nao rai dua bơnah thun 2024 pơđom pioh gru grua lơm yak rơgao mrô 2,2 klai dolar Mi, đĭ 34% bơhmu hăng thun 2023.

Bruă pơtô pơhrăm hăng bôh thâo đưm ăt jing hơdôm bruă gum hrŏm dưi hmâo 2 bôh dêh čar đing nao. Ră anai, hmâo rơbêh kơ 14 rơbâo čô čơđai sang hră dêh čar Lao dô̆ hrăm hră ƀơi Việt Nam. Dua bơnah glăk ngă klă Akô̆ bruă gum hrŏm pơtô pơhrăm Việt Nam – Lao rơwang 2021-2030 hăng Tơlơi pơtrun pơsit hră kơ gum hrŏm pơtô pơhrăm Việt Nam – Lao. Hrŏm hăng anun, 2 bơnah gir run ngă tui truh kih Kơčăo bruă gum hrŏm bôh thâo – adôh suang hăng tuai čuă ngui. Việt Nam djru Lao pơjing bruă pơđĭ kyar bơkơjăp drơi jăn Lao rơwang 2023-2030.

Gum hrŏm kơplah wah hơdôm anih anom, biă ñu hơdôm anih anom hmâo hrŏm sa jơlan guai dưi kơtưn đĭ dong, jai hrơi jai nao dơlăm, abih bang, djru pơhlôm rơnuk rơnua, hơđong ƀơi hơdôm kual guai dua bôh dêh čar. Hơdôm bôh than mơ̆ng Thun gum hrŏm hơbit Giăng mah Việt Nam – Lao 2022 ăt kah hăng lu bruă mă bơkơtuai giăng mah hơdôm thun rơgao djru kơtưn tơlơi thâo hluh nao rai tơdruă hăng hơkrŭ pran gum hrŏm hơbit kơplah wah mơnuih ƀôn sang dua bôh dêh čar.

Amăng gum hrŏm lu bơnah, dua bơnah gum hrŏm kơjăp, djru nao rai tơdruă ƀơi hơdôm mông bơkơtuai amăng kual hăng jar kơmar, biă ñu amăng rơwang Pơkôl hơdôm bôh dêh čar kual Đông Nam Á, Sang gum hơbit djop dêh čar hăng hơdôm hơdră pơkă kual anet.

Dua bơnah pơphun truh kih Tal jơnum lok 46 Jơnum min pơlir hơbit gong gai dêh čar kơ gum hrŏm dua bơnah Việt Nam – Lao hăng Bruă pơbưp gưl dlông kơplah wah Ping gah Cộng sản Việt Nam hăng Ping gah mơnuih ƀôn sang Hơkrŭ Lao. Hluai tui pơsit hơdôm bôh tơhnal dưi ngă, dua bơnah pơlir hơbit hơdôm tơlơi pơsit jơlan gah gum hrŏm prong pơ̆ anăp anai.

Tơlơi rô nao rai phara ha jăn ƀu hmâo lu Việt Nam – Lao glăk dưi bư̆ bôr đĭ hluai tui kơ Yua tơhnal pơkă hrŏm mơ̆ng dua bôh dêh čar, hăng pran jua jar kơmar bơngač rơđah, ngă brơi bruă hơkrŭ dua bôh dêh čar amăng ƀrư̆ yak rơgao hơdôm tơlơi lông, tơlơi gun.

Việt Nam hăng Lao amra gir run kơtưn đĭ dong hăng ngă dơlăm hloh tơlơi rô nao rai giăng mah, gum hrŏm hơbit phara ha jăn, gum hrŏm abih bang, yua kơ bôh tŭ yua sit nik mơ̆ng mơnuih ƀôn sang 2 bôh dêh čar, yua kơ tơlơi rơnuk rơnua, gum hrŏm hăng pơđĭ kyar ƀơi kual hăng ƀơi rŏng lŏn tơnah./.