Tơdơi kơ mông ngă yang pŭ kơpan, ngă yang hăng pơpŭ phiăn juăt ƀơi pra yang Âu Lạc ƀơi kơčŏng čư̆ Phượng Hoàng gah Kual tuai čuă ngui drai ia Prenn, plơi prong Đà Lạt, ƀing khua mua hăng mơnuih ƀôn sang tơring čar Lâm Đồng gum hrŏm lu tuai čuă ngui hmâo amăng ƀrư̆ tuĭ ñang. Rơngiao kơ phiăn ngă yang, jơlan hơdră huă pơsat Pơtao Hùng thun anai mơ̆ng tơring čar Lâm Đồng dô̆ hmâo hơdôm bruă pơdah tơlơi adôh suang đưm, hơdôm tơlơi ngui đưm kơrê, đĭ tơmeh pik ia rơmă, hmăt gŏ lŏn, anih pơdă gơnam ƀong huă, anih anom lăi pơthâo gơnam mơñum ia če Việt Nam, čih bôh pia đưm hăng pơdă prưng rup.

Ƀơi Dak Lak, hrơi huă pơsat ơi pơtao Hùng thun 2025 hơmâo pơphun yôm phăn ƀơi anih djă pioh gru grua lŏn ia Đình Lạc Giao, plơi prong Buôn Ma Thuột. Tơdơi kơ mông atông čing Êđê pioh pok pơphun mơng grup atông čing ƀuôn Kŏ Tam, mông huă pơsat ơi pơtao Hùng ƀơi Dak Lak hơmâo pơphun yôm phăn hăng tơlơi ngă yang gru grua yua grup ngă yang pơphun. ɃIng khua mua nao tŭi ñang, dưm guang bơnga hăng pơyơr đĭ gơnam tam, anun lĕ gơnam đang hmua yôm phara mơng ƀôn lan pơpŭ ƀơi pra yang ơi pơtao Hùng; lăi pơthâo tơlơi dưi hăng hơdor glăi gru grua hing ang mơng ƀing ơi pơtao Hùng amăng rơnuk pơjing lŏn ia, rơnuk blah wang pơklaih rơngai, pơlir lŏn ia jing sa. Ơi Nguyễn Tuấn Hà, kơ-iăng khua Jơnum min mơnuih ƀôn sang tơring čar Dak Lak pơ ala gong gai, mơnuih ƀôn sang djop djuai ania tơring čar Dak Lak lăi pơthâo đĭ ƀing ơi pơtao Hùng hơdôm tơlơi dưi mơ̆ mơnuih ƀôn sang djop djuai ania amăng tơring čar dưi ngă amăng hơdôm thun rơgao.

Amăng 2 hrơi pơdơi rơnuč rơwang hrơi tơjuh hăng hrơi pơdơi ngă yang Huă pơsat Pơtao Hùng (mơ̆ng lơ 8 truh lơ 10/3 blan di), hơdôm rơbâo čô tuai hmâo ruah tơring čar Kon Tum lĕ anih nao, hrŏm hăng mơnuih ƀôn sang ƀơi anai anăp nao phun akha djuai ania ngă tui phiăn juăt klă hiam ană tơčô Lạc Hồng. Anih anom čơkă lu tuai hloh ƀơi Kon Tum amăng tal pơdơi jơnum Huă pơsat Pơtao Hùng lĕ tơring kual Măng Đen, tơring glông Kon Plông, hăng giăm hmâo 20.000 wot čô mơnuih. Hrŏm hăng hyu čuă lăng anih anom hiam, găn rơgao lông lăng bôh thâo djop djuai ania ƀơi anai, lu tuai čuă ngui ăt pioh mơn mông nao pơ̆ hơdôm anih djă pioh phiăn juăt pơpŭ kơ pơtao Hùng, kah hăng Đình Lương Khế ƀơi plơi prong Kon Tum, Sang Phơ̆t Kỳ Quang, tơring glông Đăk Hà, pioh gum hrŏm mơnuih ƀôn sang ƀơi anai tuĭ ñang anăp nao phun akha djuai ania.