Ngă hrŏm amăng pôr pơthâo pơhưč bruă mă ƀơi tơdron lăk ¼, plơi prong Tuy Hòa, tơring čar Phú Yên, Gơnong bruă gru grua Pơrơguăt drơi jăn hăng Tuai čuă ngui  tơring čar Dak Lak pơphun lu bruă mă, pơdah thâo adoh suang, lăi pơthâo gru grua hiam đưm mơnam mrai djuai ania Êđê, bruă pơkra gŏ lŏn mơ̆ng djuai ania Bơnông. Pơdah bruă pĕ gông atông brô̆ đưm djuai ania ƀiă, adoh pơtưh tơdăm dra, adoh lu tơlơi adoh bơni kơ kual lŏn, ană mơnuih mơnam ƀơi Dak Lak.

Lăi pơthâo, tơlơi thâo pla pơjing hăng pơkra ming tơpung kơphê Dak Lak, ĕp lăng bruă hrong ia kơphê hăng mơñum ia kơphê brơi đôč amăng mông jơnum. Anom bruă Mini Game, ƀơk brơi hră hyu ngui tour, hyu ngui amăng tơring čar Dak Lak. Ơi Lại Đức Đại, Kơ-iăng Khua Gơnong bruă Gru grua Pơrơguăt drơi jăn hăng Tuai čuă ngui tơring čar Dak Lak brơi thâo, hơdôm boh yom phun pôr pơthâo, pơtruh nao rai bruă tuai čuă ngui plah wah Dak Lak hăng Phú Yên hơmâo dăp hơdră mơ̆ng tañ laih, kiăng ngă lu tui hơdră jơnum hơdor glăi 50 thun hrơi pơklaih rơngai kual Dơnung, pơlir truh kih lŏn ia jing sa; djru kơ bruă čơkă tuai hyu ngui, anăp nao pơhrui glăi bơwih ƀong huă đĭ truh 8% tui hăng tơhnal pơkă.