Tơdrông tua Rạch Miễu 2 găn ia krông Tiền pơtruh nao rai tơring čar Bến Tre hăng Tiền Giang, rơnoh prăk tuh pơ alin pơkra tơdrông tua anai truh 6.800 klai prăk, hlăk ngă giong, pioh ba yua tañ. Tui anun yơh, Bến Tre-Tiền Giang hơmâo 2 ƀĕ tơdrông tua prong dưi pơtruh nao rai ƀơi dua bơnah hang ia krông mơnuih ƀôn sang hok mơak hrŏm, pơsir hĭ tơlơi tơnap kơđông jơlan nao rai lu thun yun blan laih rơgao. Ơi Trần Văn Bon, Khua Gơnong bruă man pơdong tơring čar Tiền Giang hok mơak brơi thâo:

“Tơdrông tua Rạch Miễu anai hlăk man pơkra giong rơbêh 80%, kơčăo bruă anai kiăng khom giong hlâo kơ lơ 2/9/2025. Anai lĕ, bruă ngă ba glăi boh tơhnal yom pơphăn biă mă pơđĭ kyar bơwih ƀong huă mơnuih mơnam 2 boh tơring čar Tiền Giang hăng Bến Tre laih anun hơdôm tơring čar ter hang ia rơsĭ amăng kual”.

Hăng lu rơnoh prăk mơ̆ng dêh čar, tơring čar rim thun Tiền Giang pơtum abih pran jua tuh pơ alin 800 klai prăk pioh čuk pơkra jơlan nao rai. Lu kơčăo bruă hơmâo pok prong, pơkra glăi hiam klă jơlan rô nao rai phun ngă či giong abih laih, bruă rô nao rai mơ̆ng mơnuih ƀôn sang amuñ hăng gêh găl hloh, rơdêh ôtô dưi nao truh pơ sang să, plơi pla. Ơi Ngô Tấn Lâm, dŏ ƀơi să Tam Bình, tơring glông Cai Lậy, tơring čar Tiền Giang lăi:

“Kâo dŏ pơ anai dua rơnuk kơnuk kơna laih, ƀuh kơnuk kơna ta rơnuk anai yơh mơak hloh, jơlan glông nao rai pơ plơi pla pơđĭ kyar. Djop sang anŏ lêng kơ hơmâo dua, klâo boh rơdêh thut, mơnuih ƀôn sang pơdrong tui. Tơdrông tua, jơlan nao rai ră anai hluh gah nao truh pơ djop bul, plao kah hăng Plao Ngũ Hiệp ră anai tơdrông pơkra găn ia krông nao rai mơak hlak yơh, mơnuih ƀôn sang amra pơdrong đĭ. Hơdôm thun hlâo kơ anai, mơnuih ƀôn sang pơdong sang, atur sang lŏn đôč, samơ̆ ră anai atur sang man hăng ƀêtông, simăng, hơmâo sang anŏ đơ đa man pơdong dlông 3-5 tal pơngŏ. Anih ba hyu sĭ boh troh gơnam đang hmua ăt gêh găl, djru ană plơi pla mơak biă mă”.

Tơring čar Bến Tre hă dưi lăng kah hăng bul pơtâo, plao ia rơsĭ mơ̆n, yua kơ ñu dưi akŏ pơjing rai mơ̆ng klâo boh plao prong mơnai ia krông, ia ania lu čit čiu mơtam. Truh ră anai, lu tơdrun song nan, kom pan anet prong găn ia krông, dưi pơhrua hăng tơdrông tua laih či găn ia krông. Thun hlâo, Bến Tre lĕ, tơring čar blung a ƀơi kual ia krông Cửu Long pơphun man pơdong kơčăo bruă čuk jơlan ter hang ia rơsĭ. Ơi Nguyễn Trúc Sơn, Kơ-iăng Khua jơnum min mơnuih ƀôn sang tơring čar Bến Tre brơi thâo:

“Jơlan rô nao rai treng hang ia rơsĭ, thun 2024 ƀing gơmơi hơmâo pơphun čuk pơkra sa črăn hăng ngă giong sa ƀĕ tơdrông tua. Thun 2025 ƀing gơmơi ăt čuk pơkra jơlan rơbat ter hang ia rơsĭ anai, blung hlâo kiăng pơtruh nao rai hăng tơring čar Tiền Giang wơ̆t hăng tơring čar Trà Vinh, jing dua anih tơkuh pơtruh nao rai hơdôm ring bruă pơprong mơ̆ ƀing gơmơi pơtum pran jua pơphun ngă bruă kiăng pơgiong amăng thun 2025, hăng rơnoh prăk djru hrŏm mơ̆ng thun 2024-2025”.

Truh ră anai, tơring čar Sóc Trăng hơmâo laih 17 arăt jơlan nao rai tơkuh laih, djru pơgôp hrŏm pơtrut tơlơi bơwih ƀong huă pơđĭ kyar, laih anun pơhưč tuh pơ alin hơdôm kơčăo bruă ba nao amăng tơring čar anai. Boh nik ñu, kiăng truh lơ 30/4 thun anai, tơdrông tua Đại Ngãi 2 hăng črăn jơlan pơtruh nao rai 2 boh tơring glông Long Phú hăng tơring glông Cù Lao Dung tơring čar Sóc Trăng amra ngă giong, pơjing tơlơi rô nao rai amuñ hloh plah wah amăng hơdôm boh tơring čar amăng kual ter hang ia rơsĭ gah Dơnung hăng ƀôn prong Hồ Chí Minh. Ơi Nguyễn Thanh Chiều, Khua sang bruă ngă hrŏm gah đang hmua An Phát ƀơi să Thanh An 1, Cù Lao Dung, tơring čar Sóc Trăng brơi thâo:

“Hlâo adih Cù Lao Dung găn ia krông, tơnap tap biă mă, sit hơmâo bruă găn ia krông hŭi rơhyưt gleh glar đơi. Tơdrông tua Đại Ngãi ngă giong, rô nao rai amuñ anom ngă hrŏm đang hmua ƀing gơmơi amra đĭ kyar tui, dưi hơmâo tơlơi pơkơtưn lu hloh hăng lu mơta gơnam sĭ mơdrô boh troh đang hmua, biă mă ñu lĕ boh pơ-ô̆. Ƀing gơmơi hlăk hơmâo akŏ bruă pok prong anih pơkra ming gơnam sĭ mơdrô mơ̆ng boh pơ-ô̆ ƀhu krô rơ-un huin hăng pơđĭ kyar čơkă tuai hyu ngui ĕp lăng anih anom hiam mơak truh pơ đang hmua, glai klô”.

Ƀơi lu tơring čar pơkŏn kah hăng : An Giang, Đồng Tháp, Cà Mau, Vĩnh Long jơlan glông nao rai ăt hơmâo tuh pơ alin djơ̆ hơdră, ngă giong tañ hloh, dưi pơtruh nao rai plah wah hơdôm tơring čar tañ hloh, pơhrŏ mông mơnit rô nao rai kơ mơnuih ƀôn sang.

Tui hăng Ding jum Man pơdong, ră anai, kual ia krông Cưủ Long hăng hlăk pok pơhai ngă tui 9 kơčăo bruă čuk pơkra jơlan yom kơ dêh čar hăng rơnoh prăk abih tih 106.000 klai prăk. Dưi lăi, aka ƀu hơmâo djơ̆ ôh bruă čuk pơkra jơlan glông nao rai amăng kual ia krông Cưủ Long tuh pơ alin lu kơtang kah hăng ră anai. Tui hăng akŏ bruă truh thun 2030, kual lŏn dăo ia krông Cửu Long hơmâo năng ai ñu 1.200 km jơlan rơdêh đuăi hmar hăng 3 arăt jơlan nao rai anăp nao pơ gah Kơdư hăng Dơnung laih anun yŭ ngŏ. Truh ră anai, kual anai ăt hơmâo pơkă hơnơ̆ng anih ngă tơdron rơdêh por, jơlan glông nao rai amăng ia lơ̆m kual.

Ƀuh rơđah, jơlan glông nao rai khom ngă hlâo, tơlơi bơwih ƀong huă kiăo tui klôn pơđĭ kyar yơh. Thun hlâo, rơnoh pơđĭ kyar bơwih ƀong huă amăng kual ia krông Cửu Long dưi ngă djop 7,3%, lu hloh pơkă hăng anŏ pơpha bơkơnar amăng dêh čar. Rơnoh pơhrui glăi mơ̆ng rim čô mơnuih mă bruă amăng kual, sa thun sa čô rơbêh 80 klăk prăk thun 2024.

Hăng ring bruă, kơčăo bruă čuk pơkra jơlan glông nao rai hlăk ƀuh rơdah dưi ngă giong hăng tañ ngă pơgiong laih anun amăng hơdôm thun pơ anăp sit mơ̆n amra ngă gêh găl brơi lu hloh kual lŏn hơmâo 9 hnoh ia krông hrưn đĭ pô kiăng pơđĭ kyar, yak nao kơjăp kơtang amăng rơnuk phrâo kơ lŏn ia.